Category: ནང་ཆོས།

༡༽ ཆོས་ཉན་པ་ལ་དང་པོ་ཆོས་ཐོས་པའི་ཕན་ཡོན་བསམ་དགོས་པས་ཆོས་ཉན་པའི་ཕན་ཡོན་ནི།རང་གིས་མི་ཤེས་པ་དེ་ནོར་འཁྲུལ་ཚང་མ་འབྱུང་ས་ཡིན་པར་ཐོས་པ་ལས་ཤེས་ཏེ། མི་ཤེས་པ་ལས་ལས་བཟང་ངན་འབྱུང་བ་དང་། མི་ཤེས་པ་དེ་མེད་པ་ཆགས་པ་ན་འཁོར་བ་ལས་ཐར་བ་སོགས་ཐོས་པ་ལས་ཤེས་པའི་ཕྱིར། དེ་ལྟར་ཤེས་པ་ལ་བརྟེན་ནས་སྡིག་པ་མ་བསགས་པ་དང་དགེ་བ་གྲུབ་སོགས་བྱེད་པ་འབྱུང་སྟེ། ཐོས་པའི་ཚོམས་ལས།ཐོས་པས་ཆོས་རྣམས་ཤེས་པར་འགྱུར།།ཐོས་པས་སྡིག་ལས་ལྡོག་པར་བྱེད།། ཅེས་གསུངས། དེ་བཞིན་དུ་སྐྱེ་རབས་སོ་གཅིག་པ་ལས་ཀྱང་། ཤེས་རབ་སྐྱེ་ཞིང་གཏི་མུག་མེད་པར་འགྱུར།།རང་གི་ཤས་ཀྱང་དེ་ནི་ཉོ་བར་རིགས།། ཞེས་ཐོས་པ་ལ་བརྟེན་ནས་དཀོན་མཆོག་གི་ཡོན་ཏན་དང་བདེན་བཞིའི་གནས་ལུགས་སོགས་ཤེས་པ་སྟེ། ཐོས་པ་ལས་བླང་བྱ་དང་དོར་བྱ་གང་ཡིན་ལེགས་པར་ཤེས་པས་མི་ཤེས་པ་གཏི་མུག་བྱ་བའི་ཉོན་མོངས་མེད་པར་འགྱུར་བར་སོང་། རང་གི་ལུས་ཀྱི་ཤ་བཅད་ནས་གཞན་ལ་བཙོང་པས་ཀྱང་ཐོས་པ་ཉོ་བར་རིགས་པར་གསུངས་པ་དང་།ཡང་ཐོས་པ་ནི། མི་ཤེས་པའི་མུན་པ་སེལ་བའི་སྒྲོན་མེ་དང་། རྐུ་མས་ཁྱེར་བར་མི་ནུས་པའི་ནོར་དང་། རྨོངས་པའི་དགྲ་འཇོམས་པའི་མཚན་ཆ་དང་། རང་ལ་ཕན་པ་སྒྲུབ་པའི་མན་ངག་སྟོན་པའི་ཆོས་གྲོགས་དང་། འགྱུར་བ་མེད་པའི་མཛའ་བོ་དང་། གནོད་པ་མེད་པའི་སྨན་དང་། དཔལ་དང་གྲགས་པའི་གཏེར་དང་། ཡ་རབས་རྣམས་ཐུག་དུས་སྐྱེས་ཀྱི་མཆོག་སྟེ་རྔན་པ་ཡག་ཤོས་ལྟ་བུ་ཡིན་པར་ཡང་གསུངས། གཞན་ཡང་། ང་ཚོས་འཇིག་རྟེན་འདི་ན་དཀོན་པར་རྩིས་པའི་རྡོ་རྗེ་ཕ་ལམ་སོགས་རིན་པོ་ཆེ་གང་དག་ལས་ཀྱང་སངས་རྒྱས་ཀྱི་གསུང་རབ་ཐོས་པ་ནི་ཆེས་དཀོན་པ་ཡིན་ཏེ། སངས་རྒྱས་འབྱུང་བ་ཤིན་ཏུ་དཀོན་པས་དེའི་གསུང་རབ་དཀོན་པ་ཉིད་ཡིན་པའི་ཕྱིར། དེས་ན། ད་ལྟ་སངས་རྒྱས་བཅོམ་ལྡན་འདས་བྱོན་ནས་ལོ་ཉིས་སྟོང་ལྷག་ལས་སོང་མེད་དུས་འདིར་སངས་རྒྱས་ཀྱི་གསུང་ལ་ཐོས་པ་མ་བྱས་ན། དེའི་རྗེས་ཀྱི་སངས་རྒྱས་འབྱུང་བར་ལོ་གྲངས་བགྲངས་ལས་འདས་ཅིང་། དེའི་ཚེ་ཡང་སོ་སོ་རང་ཉིད་མི་ལུས་ཐོབ་པའི་འདེང་ཚོད་གང་ཡང་མེད་ལ། ཅི་སྟེ་མིར་སྐྱེ་བའི་དབང་དུ་བྱས་ཀྱང་སངས་རྒྱས་གང་ན་འབྱུང་བའི་ཡུལ་དེར་སྐྱེ་བར་མ་ངེས་པས་ད་ལྟ་ལྟ་བུའི་གོ་སྐབས་དེ་འདྲ་ཤིན་ཏུ་རྙེད་པར་དཀའ་བ་བསམ་མོ།། ༢ དེ་ལྟ་ཆོས་ཉན་པའི་ཕན་ཡོན་བསམ་པའི་རྗེས་ཆོས་དང་ཆོས་སྨྲ་བ་ལ་གུས་པ་ཇི་ལྟར་བྱ་བ་ནི།དེ་ཡང་ཆོས་སྨྲ་བ་ལ་གུས་པའི་སྒོ་ནས་ཆོས་ཉན་པ་དགོས་ཀྱི། དེ་ལ་འཕྱ་ལེ་བྱེད་པ་སོགས་ཀྱིས་ཆོས་ཉན་མི་རུང་བ་ཡིན། དེ་བཞིན་དུ་ཆོས་ཉན་པའི་དུས་ཀྱང་ཆོས་སྟོན་པ་པོ་ཐུགས་བདེ་བ་དང་། བྲེལ་བ་མེད་པའི་དུས་སུ་ཉན་པ་དང་། ཆོས་སྟོན་པ་པོ་ལ་ཕྱག་འཚལ་བ་སོགས་ཀྱི་བཀུར་སྟི་བྱེད་པ་དང་། ཀླན་ཀ་མི་ཚོལ་བ་དང་། ཆོས་དེ་དེ་འདྲ་ཙམ་ཞིག་རེད་སྙམ་པ་དང་ཆོས་སྟོན་པ་པོ་དེར་ཧ་ལས་རྒྱུ་ཅང་མེད་ལྟ་བུ་ཁྱད་གསོད་མི་བྱེད་པ་དང་། དེ་བཞིན་དུ་ཆོས་སྟོན་པ་པོ་དེ་ཚུལ་ཁྲིམས་ཉམས་པ་དང་། རིགས་དམའ་བ་དང་། མདོག་ཉེས་པ་ཡིན་པས་བདག་གིས་དེ་ལས་མི་ཉན་ནོ་སྙམ་པ་དོར་བ་དགོས།ས་ཡི་སྙིང་པོའི་མདོ་ལས།གཅིག་ཏུ་དད་ཅིང་གུས་པས་ཆོས་མཉན་གྱི།།དེ་ལ་འཕྱ་ཞིང་སྐུར་བར་མི་བྱའོ།། ཞེས་སོགས་དང་།སྐྱེ་རབས་ལས་ཀྱང་།ནད་པས་སྨན་པའི་ཚིག་ཉན་བཞིན།།རིམ་གྲོ་བསྐྱེད་དེ་ཆོས་ཉན་ཅིག། ཞེས་གསུངས། ༣ དངོས་གཞི་ཆོས་ཇི་ལྟར་ཉན་པའི་ཚུལ་ནི།སྤྱིར་ཆོས་ཉན་པ་ལ་འགལ་རྐྱེན་སྣོད་ཀྱི་སྐྱོན་གསུམ་དང་བྲལ་བ་དང་། མཐུན་རྐྱེན་འདུ་ཤེས་དྲུག་བསྟེན་པ་དགོས་པས། དང་པོ་སྣོད་ཀྱི་སྐྱོན་གསུམ་དང་བྲལ་བ་ནི།༡ སོ་སོ་རང་ཉིད་ཆོས་ཉན་སར་བསྡད་ཀྱང་སྣོད་ཆས་ཁ་སྦུབ་པ་ནང་བཞིན་ཆོས་ཨམ་ཆོག་གིས་ཡག་པོ་མ་ཉན་པ་དེ་འདྲ་མི་བྱེད་པ་དང་།༢ རང་ཉིད་ཀྱིས་ཡག་པོ་ཉན་ཀྱང་སྣོད་ཆས་བཙོག་པ་ནང་བཞིན་རང་ཉིད་མཁས་འདོད་དང་། ཆོས་དང་ཆོས་སྨྲ་བ་ལ་དགག་པ་སོགས་བྱེད་དགོས་སྙམ་པ་ལྟ་བུ་བསམ་བློ་ལ་སྐྱོན་ཞུགས་པ་དེ་འདྲ་མི་བྱེད་པ།༣ གོང་གི་སྐྱོན་གཉིས་ཀ་མེད་ཀྱང་སྣོད་ཆས་རྐུབ་རྡོལ་བ་ནང་བཞིན་ཆོས་ཉན་ཚར་བ་དང་ཡང་ཡང་མ་བསམ་པར་སྣང་མེད་དུ་བརྗེད་དུ་འཇུག་པར་མི་བྱེད་པའོ།།མཐུན་རྐྱེན་འདུ་ཤེས་དྲུག་ནི། (འདུ་ཤེས་ཟེར་ན་དེ་དེའོ་སྙམ་པའི་བསམ་བློ་ཡིན)༡ རང་ཉིད་འདོད་ཆགས་དང་ཁོང་ཁྲོ་སོགས་ཉོན་མོངས་པས་དུས་རྟག་ཏུ་ན་བའི་ནད་པ་ཡིན་པའི་འདུ་ཤེས་བསྟེན་པ་དང་།༢ རང་ཉིད་ཀྱི་ནད་གཞི་དྲག་པོ་དེ་སེལ་བར་བྱེད་མཁན་ཆོས་སྟོན་པ་པོ་ལ་སྨན་པའི་འདུ་ཤེས་བསྟེན་པ་དང་།༣ ནད་དེ་དངོས་སུ་མེད་པ་བཟོ་བྱེད་དེས་སྟོན་པའི་ཆོས་ལ་སྨན་གྱི་འདུ་ཤེས་བསྟེན་པ་དང་།༤ དེས་ཇི་ལྟར་བསྟན་པ་ཉམས་སུ་བླང་བ་ནད་གསོ་བར་བྱེད་པ་དང་འདྲ་བས་ནད་འཚོ་བའི་འདུ་ཤེས་བསྟེན་པ་དང་།༥ དེ་བཞིན་གཤེགས་པ་སངས་རྒྱས་རྣམས་ལ་སྐྱེས་བུ་དམ་པའི་འདུ་ཤེས་བསྟེན་པ་དང་།༦…