Category: ལྷུགས་རྩོམ།

འཛམ་གླིང་ཡུལ་གྲུ་ཀུན་ཏུ་གནས་པའི་ནང་བ་སངས་རྒྱས་པ་ཡོངས་ཀྱིས་ཉིན་གཉིས་ཀྱི་རྗེས་ཀྱི་སྐལ་བཟང་གི་དུས་ཚེས་ཏེ་ས་གའི་ཚེས་པ་བཅོ་ལྔའི་ཉིན་དེར་སྟོན་པའི་འཁྲུངས་སྐར་སྲུང་བརྩི་གནང་རོགས། གཅིག དེ་རིང་ནི་འོད་ཀྱིས་འཇིག་རྟེན་ཁེངས་པའི་ཉིན་མོ་ཡིན་ལ་བལྟ་ན་སྡུག་པའི་མཛེས་པའི་མེ་ཏོག་བདུན་ཚར་གྱི་བཀྲག་མདངས་ཕྱི་རུ་མངོན་པའི་ན་མོའང་ཡིན། དེ་རིང་ནི་རྟེན་འབྱུང་ལྟ་གྲུབ་ཀྱི་ལྐོག་གྱུར་གནས་ལུགས་དང་བྱམས་བརྩེའི་སྙིང་སྟོབས་ཀྱི་གཟི་འོད་གླིང་བཞིར་མཆེད་པའི་ཉིན་མོ་སྟེ་མི་ལོ་ཧྲིལ་བོ་ཉིས་སྟོང་ལྷག་གི་སྔ་རོལ་ཀྱི་དེ་རིང་ཉམས་རྟོགས་འབུམ་གྱིས་ཕྱུག་པའི་སྐྱེས་ཆེན་དམ་པ་ཞིག་གི་སྐུ་ཡི་མཚན་དཔེའི་མེ་ཏོག་འཛམ་གླིང་ཟླུམ་པོའི་དཀྱིལ་འཁོར་དུ་བཞད་ཅིང་དེ་ནས་བཟུང་སྐྱེ་བོ་ཁྲི་སྟོང་མང་པོའི་ཡིད་ཀྱི་ཞིང་སར་བྱམས་བརྩེ་དང་གཞན་གཅེས་ཀྱི་ནུས་པའི་རོ་བཅུད་སྨིན་པའི་འགོ་བརྩམས་པ་རེད།དུས་དེ་ནས་སྐྱེ་བོ་མཆོག་དམན་ཀུན་གྱི་སེམས་ཁམས་སུ་ཡང་དག་པའི་འོད་ཀྱི་ཞིང་ཁམས་སུ་བགྲོད་པའི་ནུས་སྟོབས་ཡོད་པའི་བདེན་དཔང་རྙེད་ཅིང་བདག་ཉིད་བདག་གི་མགོན་པོ་རུ་ལྟ་བའི་བློ་གྲོས་ཀྱི་མིག་ཟུང་ཐོབ། ཉིན་མོ་འདི་ནི་སྐྱེ་འགྲོ་སྤྱི་དང་ཁྱད་པར་དུ་ནང་པ་སངས་རྒྱས་པའི་རྗེས་འཇུག་པ་དག་གིས་ངེས་པར་དུ་དྲན་དགོས་པའི་ཉིན་མོ་ཞིག་དང་དགའ་སྤྲོའི་རྣམ་འགྱུར་དང་དགེ་སྒྲུབ་རྣམ་དཀར་གྱིས་བསུ་དགོས་པའི་རིན་ཐང་གྱི་ཉིན་མོ་གལ་ཆེན་རེད། གཉིས། གལ་ཏེ་དེ་རིང་སྟོན་པ་ཡེ་ཤུ་མཆོག་གི་སྐུ་ཡི་འཁྲུངས་སྐར་ཡིན་ན་ཁོང་གི་རྗེས་འཇུག་པ་ས་ཡ་མང་པོས་ཉིན་མོ་འདིར་རང་གི་སྟོན་པའི་མཛད་རྣམ་ལ་ཡི་རང་གི་བསྔགས་བརྗོད་འཁྲོལ་བཞིན་འཁྲུངས་སྐར་འདི་དགའ་དད་སྤྲོ་གསུམ་གྱིས་བསུ་ངེས་ཤིང་། དེ་བཞིན་རྗེའུ་དང་། ཁ་ཆེ་སོགས་ཆོས་ལུགས་གང་ཡིན་ཡང་རང་གི་སྟོན་པའི་འཁྲུངས་སྐར་ནི་ཆེས་གལ་ཆེའི་ཉིན་མོར་སྲུང་བརྩི་བྱེད་ངེས། ང་ཚོ་སྟེ་འདྲེན་མཆོག་མཉམ་མེད་དཔལ་ཟས་གཙང་སྲ་ཕོའི་རྗེས་འཇུག་ཏུ་ཁས་འཆེས་པའི་ནང་བ་སངས་རྒྱས་པ་དག་གིས་འཛམ་གླིང་འདིར་གནས་འཆའ་བའི་ནང་པ་ཡོངས་རྫོགས་གཅིག་མཐུན་གྱིས་སྟོན་པ་བཅོམ་ལྡན་འདས་ཀྱི་སྐུ་བལྟམས་པ་དང་སངས་རྒྱས་པ་མྱ་ངན་ལས་འདས་པའི་གསུམ་འཛོམས་ཀྱི་དུས་ཆེན་འདིར་ཡོངས་ཁྱབ་རང་བཞིན་གྱི་སྲུང་བརྩི་རྒྱ་ཆེན་ཞིག་བྱེད་མ་ཐུབ་པ་འདི་ནི་ཅི་འདྲའི་བློ་ཕམ་གྱི་རང་བཞིན་ཞིག་རེད་ཨང་། ང་ཚོས་སྟོང་ཆ་འདི་བསྐང་ཆེད་དེ་རིང་བཟུང་དཔལ་མཉམ་མེད་ཤཱཀྱ་སེང་གེའི་སྐུ་ཡི་འཁྲུངས་སྐར་འདི་སྲུང་བརྩི་བྱེད་པའི་ཡོངས་ཁྱབ་ཀྱི་ལས་གཞི་འདི་ལྟར་བརྩམས་དགོས་པས་འཛམ་གླིང་གོ་ལའི་ས་ཕྱོགས་གང་སར་གནས་པའི་ནང་པ་ཡོངས་ཀྱིས་འཁྲུངས་སྐར་ འདི་ལྟར་སྲུང་བརྩི་བྱེད་རོགས། གཅིག ཉིན་མོ་འདིར་རང་རང་གི་ཉེ་འཁོར་དུ་གནས་པའི་སྐྱེ་བོ་ཡོངས་ལ་རང་གི་སྟོན་པའི་མཛད་རྣམ་སྐོར་དང་རླབས་ཆེན་གྱི་སྟོན་པ་ཁོང་གིས་ང་ཚོར་བླང་དོར་གྱི་ལམ་སྟོན་གང་ང་གང་གནང་ཡོད་པའི་སྐོར་ལ་གོ་བསྡུར་དང་བགྲོ་གླེང་བྱ་རྒྱུ། གཉིས། སྟོན་མཆོག་ཁོང་གི་རྗེས་འཇུག་པ་ཞིག་ཡིན་པའི་ངོས་ནས་ཉིན་མོ་འདིར་སྐྱེས་ཆེན་ཁོང་གིས་ཉམས་བཞེས་སུ་བསྟར་བའི་གཞན་གཅེས་དང་བྱམས་སྙིང་རྗེའི་དགེ་ཕན་ལ་སོགས་ལ་བསམ་བློ་བཏང་སྟེ་གཞན་ལ་གནོད་གཞིའི་ལས་མི་བརྩམས་པར་གཞན་ཕན་གྱི་ལས་ཀ་གང་ཐུབ་བསྒྲུབ་རྒྱུ། གསུམ། རང་གི་ནང་མི་དང་གྲོགས་པོ་ཕོ་མོ་ཚོར་རྒྱུད་ལམ་གང་རུང་ཐོག་དེ་རིང་གི་ཉིན་མོའི་གལ་ཆེའི་རང་བཞིན་ངོ་སྤྲོད་དང་སྦྲགས་ཉིན་མོ་འདིར་གཞན་ཕན་གྱི་ལས་སུ་འཇུག་དགོས་པའི་སྐུལ་དེད་བྱ་རྒྱུ། བཞི། དུས་དེབ་དང་། ཚགས་ཤོག དྲ་རྒྱ་སོགས་སུ་སྟོན་མཆོག་ཐུབ་པའི་དབང་པོའི་མཛད་བཟང་ལ་བསྔགས་བརྗོད་དང་དེ་འབྲེལ་གྱི་རྩོམ་བྲིས་སྤེལ་རྒྱུ། ལྔ། རང་ཉིད་ནང་པ་ཞིག་གི་ངོས་ནས་ཉིན་མོ་འདི་ཆེས་གལ་ཆེན་དུ་བརྩིས་ཏེ་་ཉིན་དེའི་དུས་ཚད་ཡོངས་རྫོགས་དགེ་སེམས་འབའ་ཞིག་གི་ངང་ནས་རྫོགས་པར་ཧུར་བརྩོན་བྱ་རྒྱུ། འདི་ནི་ནང་པའི་ཆོས་ཀྱི་རྗེས་འབྲང་པའི་གྲྭ་བ་ཞིག་གིས་ནང་པ་ཡོངས་ལ་ཕུལ་བའི་རེ་སྐུལ་ཡིན་པས་བདག་གི་རེ་བ་འདི་ཅིས་དང་ལེན་གནང་རོགས་ཞུ།།  ནང་པའི་ཆོས་ཀྱི་རོ་བཅུད་ཐོས་བསམ་གྱིས་ཅུང་ཟད་གཞིབ་པའི་མཐུ་ལས་ནང་པ་སངས་རྒྱས་པའི་སྟོན་མཆོག་དམ་པ་ཁོང་ལ་བཅོས་མིན་དད་པ་ཐོབ་པའི་སེར་ཤུལ་རིན་ཆེན་དོན་གྲུབ་ཀྱིས་གུས་པས་ཕུལ། རྩོམ་ཡིག་འདི་ནི་༢༠༡༡ལོར་བྲིས་ཏེ་དྲ་ཐོག་ཏུ་སྤེལ་མྱོང་ཞིང་རེ་སྐུལ་འདིིའི་ཤུགས་རྐྱེན་ནམ་གང་ལྟར་གཞུང་དང་གཞུང་འབྲེལ་མིན་པ་འགའ་ཞིག་གིས་ད་ལོ་ཡོངས་གྲགས་ཐོག་སྟོན་པའི་འཁྲུངས་སྐར་སྲུང་བརྩི་ཐོག་མ་དེ་གནང་སོང་བས་དགའ་སྣང་ཡི་རང་དང་བཅས་སླར་ཡང་རེ་སྐུལ་འདི་སྤེལ་བ་ཡིན། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

སེམས་ཤུགས་འཕེལ་བའི་བོད་ནང་གི་གནས་ཚུལ།ཨ མདོའི་ཕྱོགས་སུ་སྐད་ཡིག་སྲུང་སྐྱོབ་ཀྱི་ལས་འགུལ། རྡོ་རྗེ་ཚེ་བརྟན། བོད་རང་བཙན་སློབ་ཕྲུག་ཚོགས་པའི་རྒྱ་གར་སྡེ་ཚན་གྱི་རྒྱལ་ཡོངས་འགན་འཛིན། ཁ་སང་ལྷག་དཀར་ཉིན་མོར་བདག་གི་སེམས་ཐག་ཉེ་བའི་གྲོགས་པོ་བོད་དོན་འཐབ་རྩོད་པ་ཆབ་སྲིད་བཙོན་ཟུར་ལྷ་མོ་སྐྱབས་ལགས་བདག་གི་ཡིག་ཚང་དུ་སླེབས་སོང་ལ། མཚར་སྣང་དང་རེ་སྒུག་གིས་ཁེངས་པའི་ཁོང་གི་རྣམ་རིག་གྲུང་བོ་མཐོང་མ་ཐག་བདག་གིས་ཁོང་ལ་ནམ་རྒྱུན་དང་མི་འདྲ་བའི་གནས་ཚུལ་གསར་བ་ཞིག་ཡོད་པ་ཤེས་ཐུབ།ཁོང་གིས་རང་ཉིད་ཀྱི་མཐེབ་འཇུག་ལས་བདག་ལ་བོིད་ནང་གི་ཡིད་འགུལ་ཐེབས་པའི་ལྷག་དཀར་སྲུང་བརྩི་བྱེད་སྟངས་ཀྱི་རྣམ་པ་དམིགས་གསལ་བ་ཞིག་བསྟན་སོང་། སེམས་ཤུགས་འཕར་བའི་གནས་ཚུལ་དེས་བདག་གི་ལྷག་དཀར་ཉིན་མོ་དེ་ཡང་དམིགས་བསལ་བ་ཞིག་བཟོས་སོང་། ཕྱི་ལོ་༢༠༡༡ལོའི་ཟླ༠༤ཚེས་༡༥ཉིན་ཨ་མདོ་རྨ་ཆུ་རྩྭ་ཐང་གི་བོད་མི་ཁ་ཤས་ཀྱིས་རང་འགུལ་གྱིས་“བོད་ཕ་སྐད་དམ་སྲུང་མཐུན་ཚོགས།”ཞེས་པ་ཞིག་གསར་འཛུགས་བྱས་འདུག་ལ། དུས་དེ་རིང་མཐུན་ཚོགས་དེའི་བྱ་འགུལ་ཁག་བོད་ཤར་ཕྱོགས་ཀྱི་ཁམས་དང་ཨ་མདོ(ཞིང་ཆེན་མཚོ་སྔོན་དང་། ཀན་སུའུ། སི་ཁྲོན་)སོགས་གཙོ་བྱས་པའི་བོད་རིགས་འདུས་སྡོད་ཀྱི་ས་ཁུལ་ཡོངས་ལ་ཁྱབ་ཡོད་འདུག་ལ།་་གནོན་ཤུགས་དང་དཀའ་ངལ་ཡོད་ཚད་གདོང་གིས་བསུས་ནས་ད་དུང་མཐུན་ཚོགས་དེས་མུ་མཐུད་ས་ཁུལ་དེ་དག་ཏུ་སྐད་ཡིག་སྲུང་སྐྱོབ་དང་རྒྱུན་འཛིན་གྱི་ལས་འགུལ་མུ་མཐུད་སྤེལ་བཞིན་ཡོད་འདུག དེར་བརྟེན། ད་ལྟ་དྭངས་བླངས་ལས་འགུལ་བ་དེ་དག་ལ་གཞི་རིམ་བོད་མི་སྤྱི་ཡོངས་ཀྱི་རྒྱབ་སྐྱོར་དང་གུས་བརྩི་བླ་མེད་ཐོབ་བཞིན་ཡོད་འདུག མི་མང་གི་ཉིན་རྒྱུན་གྱི་འཚོ་བའི་ཁྲོད་དུ་བོད་རང་གི་སྐད་ཡིག་བེད་སྤྱོད་གཏོང་བར་སེམས་ཤུགས་སྤེལ་ཆེད་དུ། སྐད་ཡིག་མཐུན་ཚོགས་དེས་སྦྱར་བྱང་དང་ཅ་དངོས་འདྲ་མིན་བཟོས་ནས་དེ་དག་ལ་བོད་སྐད་ཀྱི་མིང་འདོགས་བྱེད་བཞིན་ཡོད་འདུག་ལ། ཁོ་ཚོས་བཟོས་པའི་སྦྱར་བྱང་དེ་དག་མི་མང་འཛོམས་ས་ཆེ་ཁག་དག་སྟེ་ཟ་ཁང་དང་ཚོང་ཁང་།དགོན་པ་ཁག་དང་མི་མང་གི་ཁྲོམ་ར་ཁག་ཏུ་སྦྱར་འགྲེམ་བྱེད་བཞིན་ཡོད་འདུག འདྲ་པར་དག་ལས་ང་ཚོས་གསལ་བོར་མཐོང་བ་ལྟར་མཐུན་ཚོགས་དེས་བོད་ཁུལ་གྱི་ས་ཆ་འདྲ་མིན་དུ་སྐད་ཡིག་སྦྱོང་བརྡར་འཛིན་གྲྭ་བསྡུ་བ་དང་སྐད་ཡིག་གི་ཡིག་རྒྱུགས་རིགས་འདྲ་མིན་བཀོད་སྒྲིག།དེ་བཞིན་བོད་ཀྱི་ས་ཁུལ་འདྲ་མིན་ནས་མཁས་དབང་དང་ཆེད་ལས་མཁས་པ་འདྲ་མིན་གདན་ཞུས་ཀྱིས་བཀའ་སློབ་དང་ལམ་སྟོན་ཡང་དུས་ནས་དུས་སུ་ཞུ་བཞིན་ཡོད་འདུག མཐུན་ཚོགས་དེའི་ཚོགས་གཙོ་ཡང་མང་གཙོའི་བརྒྱུད་ལན་ནས་འོས་འདེམས་བྱེད་བཞིན་ཡོད་འདུག་ལ་ཁོ་ཚོས་བོད་ཀྱི་སྐད་ཡིག་དར་སྤེལ་གཅིག་པུ་ཙམ་མ་ཡིན་པར་བོད་མི་སྤྱི་བོ་གནམ་བསྟན་ཡོངས་ཀྱི་ནང་ཁུལ་དུ་ཕན་ཚུན་ཕུ་ནུ་ལྟ་བུའི་མཐུན་སྒྲིལ་རྡོག་རྩ་གཅིག་སྒྲིལ་ཡོང་བར་ཡང་ཤུགས་སྣོན་ཆེན་པོ་རྒྱག་བཞིན་ཡོད་འདུག དེར་བརྟེན།ལས་འགུལ་དེས་བོད་ཀྱི་དེང་རབས་གཞོན་སྐྱེས་དག་ལ་ཡ་རབས་བཟང་སྤྱོད་སོགས་ཀྱི་ཤུགས་རྐྱེན་ངེས་ཅན་ཐེབས་བཞིན་ཡོད་འདུག ཉིན་དེའི་ཕྱི་དྲོར་བདག་རྡ་སའི་མེག་ལོར་སྲང་ལམ་དུ་སྐྱོད་སྐབས་གདོང་ལ་འཛུམ་གྱིས་ཁེངས་ཤིང་ལུས་ལ་བོད་ཆས་གཙང་མ་མནབས་པའི་བྱིས་པ་དང་། གཞོན་སྐྱེས།དེ་བཞིན་ཁྲོམ་དུ་སྐོར་སྐྱོད་བྱེད་མཁན་སོགས་མཐོང་བས་བདག་གི་སེམས་པ་རེ་བ་དང་སྤོབས་པས་བརྟས་བྱུང་། ཁོ་ཚོ་ཚང་མར་ཡང་ང་དང་འདྲ་བར་རང་ཉིད་བོད་མི་རིགས་སུ་སྐྱེས་བར་སྤོབས་པས་ཁེངས་ནས་འདུག གནས་ཚུལ་འདི་དག་གིས་བདག་ལ་ལྕམ་ཨང་སན་སོས་སྐྱིད་(Aung Sung Suu Kyi)ལགས་ཀྱི་ཕྱག་དེབ་ (གཞོན་ནུ་མ་ དང་རྨ་བྱ།)ཞེས་པའི་ནང་གི་ལེགས་བཤད་“ཁྱོད་ཀྱིས་བདག་གི་རང་དབང་རྐུ་འཁྱེར་བྱེད་ཐུབ་ནའང་ཁྱོད་ཀྱིས་བདག་གི་རེ་བ་ནམ་ཡང་འཁྱེར་མི་ཐུབ་”ཅེས་པའི་བླ་མ་མེད་པའི་ལེགས་བཤད་དེ་དྲན་ཏུ་བཅུག་སོང་། ལྷག་དཀར་ནི་རང་དབང་ལ་བཅོལ་བའི་རེ་བ་ཡིན། གྲོགས་པོ་ལགས།ཁྱེད་ཀྱིས་འདི་ལྟར་བདག་ལ་ལྷག་དཀར་ཉིན་མོ་དམིགས་བསལ་བ་ཞིག་གནང་བར་ཐུགས་རྗེ་ཆེ་ཞུ། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

སྦྲ་རིགས་ཐོགས་མེད། ལོ་རྒྱུས་ཤིག་ལ་མཚོན་ན་ལོ་ཚིགས་དང་གྲངས་ཀ་སོགས་ནི་ཧ་ཅང་གལ་ཆེ་བའི་ལོ་རྒྱུས་དངོས་དོན་ར་སྤྲོད་ཀྱི་ལྡེ་མིག་ཡིན། དེ་བཞིན་རང་རེ་བོད་ཀྱི་རང་ལུས་མེ་བསྲེག་གི་ཞི་རྒོལ་འཐབ་རྩོད་འདིར་མཚོན་ནའང་གཞུང་འབྲེལ་ཡིན་མིན་ཚང་མས་ཐུན་མོང་གི་གྲངས་ཀ་གསལ་བོ་ཞིག་གཞི་རྩར་བཞག་ནས་ལོ་རྒྱུས་ཡིག་ཚགས་སུ་ཉར་དགོས་པ་ཧ་ཅང་གལ་ཆེན་པོ་རེད། མི་ཞིག་ལ་མཚོན་ན་རང་ཉིད་ཀྱི་ལུས་པོར་མེ་རུ་བསྒྲོན་ནས་མི་རིགས་འཐབ་རྩོད་ཆེད་དུ་བློས་གཏོང་བྱེད་པ་ནི་མི་བུ་སྤྱིར་བཏང་བ་ཞིག་གིས་བསམ་ཡང་མི་ཕོད་པ་ཞིག་རེད། དེར་བརྟེན། རྒྱལ་གཅེས་དཔའ་བོ་ཕོ་མོ་དེ་དག་གི་ལོ་རྒྱུས་དང་། ཁྱིམ་ཚང་གནས་སྟངས་ཁོང་ཚོའི་འདྲ་པར་སོགས་ངེས་པར་དུ་ཞིབ་ཚགས་པོའི་ཐོག་ནས་ཉར་ཚགས་བྱེད་དགོས་པ་གལ་ཆེན་པོ་རེད། མ་འོངས་པར་ཏན་ཏན་འདིའི་སྐོར་ལ་ཆེད་ལས་ཞིབ་འཇུག་མཁན་མང་བོ་འབྱུང་སྲིད། དེ་བཞིན་རང་ལུས་མེ་རུ་བསྒྲོན་མཁན་རྒྱལ་གཅེས་དཔའ་བོ་དཔའ་མོ་ཡང་དཔའ་བོ་ཐུབ་བསྟབ་དངོས་གྲུབ་ནས་ཉེ་ཆར་གྱི་དཔའ་བོ་སྤྲུལ་སྐུ་བསོད་བྷོ་བར་དུ་བརྩིས་ན་ཁྱོན་རྒྱལ་གཅེས་དཔའ་བོ་བཅུ་བདུན་དང་། ཡང་རྒྱལ་གཅེས་དཔའ་བོ་བཀྲ་བྷེ་ནས་བརྩིས་ན་བཅུ་དྲུག། དེ་བཞིན་དཔའ་བོ་བློ་བཟང་ཕུན་ཚོགས་ནས་བརྩིས་ན་བཅོ་ལྔ་བཅས་ཡིན་པའང་ངེས་པར་དུ་བརྗེད་མི་རུང་། གནས་ཚུལ་འདིའི་སྐོར་ལ་འཇར་མན་གྱི་གསར་འགོད་པ་ཞིག་གིས་ཀྱང་གསན་ཚུལ་ཞིག་སྤེལ་འདུག་ལ་བོད་ཀྱི་བུད་མེད་རྩོམ་པ་བོ་འོད་ཟེར་གྱིས་ཀྱང་བོད་ཀྱི་གཞུང་འབྲེལ་ཡིག་ཆ་ཁ་ཤས་སུ་དཔའ་བོ་བཀྲ་བྷེ་ལགས་ཀྱི་མཚན་འཁོད་མེད་པ་གསལ་བཤད་དང་འབོད་སྐུལ་བྱས་འདུག ཉེ་ཆར་རྡོར་གདན་དུས་དབང་གི་སྐབས་སུ་ཡང་བཀའ་ཤག་གིས་དཔའ་བོ་དཔའ་མོ་དག་གི་མཚན་བགྲང་སྐབས་ཀྱང་བཀྲ་བྷེ་ལགས་ཀྱི་མཚན་འཁོད་གནང་མི་འདུག ཉེ་ལམ་གྱི་འཐབ་རྩོད་གཞན་གྱི་གསར་ལམ་ཁག་ཏུ་གྲངས་ཀ་ཁག་མཐོ་ནས་མཐོ་རུ་གཏོང་བཞིན་པའི་སྐབས་སུ་ང་ཚོས་རང་ཉིད་ཀྱི་དངོས་ཡོད་གྲངས་ཀ་ཁག་ཉུང་དུ་གཏོང་དགོས་དོན་མི་འདུག་ཨང་། འདི་དག་ཤོག་ངོས་ཀྱི་མིང་ཚིག་ཁ་ཤས་ཀྱི་མང་ཉུང་ཙམ་མ་ཡིན་པར་མ་འོངས་པར་ལོ་རྒྱུས་དང་འབྲེལ་བའི་གལ་གནད་ཧ་ཅང་ཆེ་བར་མཐོང་ངོ།།  ད་དུང་དེ་ལས་ཀྱང་ཞིབ་ཚགས་སུ་བཏང་ན། རྒྱལ་གཅེས་དཔའ་བོ་དང་དཔའ་མོ་དག་གི་འདས་གསོན་དང་གནས་དུས་འཁོད་པ་འདི། ཆབ་མདོ་ཤེས་རབ་ཀྱི་ངོ་དེབ་ནས་འདིར་འདྲེན་བཀོད་ཞུས་པ་ཡིན། ༢༠༽ ༢༠༡༢།༠༡།༠༨། སྤྲུལ་སྐུ་བསོད་ནམས་དབང་རྒྱལ། འདས། ལོ།༤༢། བོད་མགོ་ལོག ༡༩༽ ༢༠༡༢།༠༡།༠༦། གྲྭ་ཟུར་བསྟན་ཉི། འདས། ལོ།༢༠། བོད་རྔ་བ། ༡༨༽ ༢༠༡༢།༠༡།༠༦། གྲྭ་ཚུལ་ཁྲིམས། འདས། ལོ།༢༠། བོད་རྔ་བ། ༡༧༽ ༢༠༡༡།༡༢།༠༡། གྲྭ་ཟུར་བསྟན་འཛིན་ཕུན་ཚོགས། འདས། ལོ།༤༦། བོད་ཆབ་མདོ། ༡༦༽ ༢༠༡༡།༡༡།༡༠། གྲྭ་བོད་ཕྲུག །གསོན། ལོ།༤༥། བལ་ཡུལ་མཆོད་རྟེན། ༡༥༽ ༢༠༡༡།༡༡།༠༤། ཤེས་རབ་བམ་མིག་དམར། གསོན། ལོ།༢༦། རྒྱ་གར་ལྡི་ལི། ༡༤༽…

བོད་ཀྱི་རིག་གནས་དང་སྐད་ཡིག་གི་ཕྱོགས་ཀྱི་དར་རྒུད་ལ་ཐུགས་ཁུར་ཀྱི་སེམས་པ་ལྷོད་མྱོང་ལ་ཨ་ཐང་ཀྱང་ཆད་མྱོང་འང་།འབད་པ་ཡང་བྱས་མྱོང་བའི་བདག་གིས་འདིའི་ཐད་ལ་བསམ་གཞིགས་གཏོང་ཁུལ་ཞིག་བྱས་པ་ཁྱེད་ཅག་གི་རྣ་བའི་བུ་གར་སྒྲོན་ན་འདི་ལྟར།བོད་ཀྱི་རིག་གནས་དང་སྐད་ཡིག་གི་ཕྱོགས་ཀྱི་དར་རྒུད་ལ་ཐུགས་ཁུར་ཀྱི་སེམས་པ་ལྷོད་མྱོང་ལ་ཨ་ཐང་ཀྱང་ཆད་མྱོང་འང་།འབད་པ་ཡང་བྱས་མྱོང་བའི་བདག་གིས་འདིའི་ཐད་ལ་བསམ་གཞིགས་གཏོང་ཁུལ་ཞིག་བྱས་པ་ཁྱེད་ཅག་གི་རྣ་བའི་བུ་གར་སྒྲོན་ན་འདི་ལྟར།བདག་གིས་དེང་སྐབས་བོད་ཀྱི་རིག་གནས་དང་སྐད་ཡིག་ལ་ཞིབ་འཇུག་དང་རྒྱུས་ལོན་དེ་འདྲ་བྱས་མྱོང་མེད་མོད།མཐོང་ཐོས་ཀྱི་ཁྲོད་གསལ་འོང་བ་ནི་ད་སྐབས་བོད་ཀྱི་སྤྱི་ཚོགས་སུ་གདེང་འཇོག་དང་བག་ཆགས་ཟབ་མོ་འཇོག་མཁན་ནི་ཤེས་ཡོན་པ་དང་གླུ་བ་གླུ་མ་དེ་ཚོ་རེད་པས་བོད་སྐད་ཡིག་སོགས་ཀྱི་དར་རྒུད་ཀྱང་ཁོ་ཚོར་ཅུང་ཧ་ཅང་གི་རེག་ལས་ཀི་བསམ་ཐལ།རྒྱུ་མཚན་ནི་སེམས་པ་རང་རིགས་ལ་དུང་ཀ་དེ་འདྲ་མེད་པའི་གླུ་བ་གླུ་མ་སྐོར་ཞིག་གིས་བོད་སྐད་རྒྱ་སྐད་དབྱིན་སྐད་དང་བཅས་ཏེ་གླུ་ཚིགས་འདྲ་མ་འདྲེས་ལ་རོལ་དབྱངས་གོང་ཆེན་ཞིག་ཉོས་སྟེ་བརྙན་འཁོར་དུ་ཕབ་རྗེས།སྐབས་དེར་མི་རིགས་ཀྱི་འདུ་ཤེས་སེམས་ན་དབེན་པའི་བོད་པ་མང་མང་གི་ཚོགས་དེས་ཀྱང་དེང་རབས་གླུ་དབྱངས་ཟེར་ན་འདི་འདྲ་ཡིན་དགོས་ནི་ཀྱི་སྐད་ཆ་ལབ་བཞིན་ཤེས་མདོག་ཅིག་གིས་ལེན་མཁན་དེས་རྗེས་སུ་རང་ཚུགས་མེད་པར་སྙེགས་འགྲོ་ཀི་རེད།དེ་ནི་ཁོ་ཚོའི་བཞག་པའི་ཤན་ཤུགས་ཡིན་ལ།དེ་དུས་མི་རིགས་རང་ལ་འདུ་ཤེས་ཟབ་པའི་བོད་པ་འང་ཇེ་ཉུང་དུ་འགྲོ་སྲིད་སྙམ་ལ་།སྐབས་དེར་བོད་སྐད་ཀྱི་གླུ་སྐད་གསེབ་ནས་མི་རིགས་ཀྱི་འདུ་ཤེས་དང་ལ་རྒྱའི་འགན་འཁྲི་ཅན་གྱི་མི་བུ་ག་ཚོད་ཡོད་དམ།གཅིག་ཀྱང་མེད་དུས་མི་རིགས་གཞན་ཞིག་ནས་ཁྲིད་ཡོང་ནས་གླ་དགོས་པའི་དཔེ་སྲིད་དམ།དཔེར་ན་ཨ་མ་ལེ་ལྟ་བུ་ཞིག་གིས་བོད་ཀྱི་སྐད་ཡིག་འཛིན་དགོས་སམ།འདི་ནི་མི་རིགས་ཀྱི་ཡོད་ཚད་ལ་ལ་རྒྱའི་འགན་འཁྲི་མེད་པའི་གླུ་བ་གླུ་མ་དེ་ཚོས་བཟོས་པའི་ནག་ཉེས་རེད་བསམ་ཡོད།རྗེས་མ་ཁྱེད་ཚོས་བཅོས་བསྒྱུར་རེ་བྱེད་རྒྱུ་ཕ་སྐད་ལ་ཐུགས་འཁུར་མཛད་བཞིན་པ་རྣམས་པའི་ཚབ་ནས་རེ་བ་ཞུས་པ་ཡིན། འདིར་ཕ་སྐད་གཙང་མའི་ངོས་ནས་གླུ་གཞས་གཏོང་མཁན་དག་ལ་རྗེས་སུ་ཡི་རང་དང་སེམས་དང་རུས་རྐང་སྟེང་ནས་རྒྱབ་སྐྱོར་ཡོད།དེ་ཡང་རྡུང་ལེན་རྒྱ་སྐད་ཀྱིས་ལེན་མི་ཤེས་པ་ཀུན་གྱིས་ཤེས་གསལ་ལྟར་རེད།ལེན་ཤེས་རྒྱུ་ན་མིང་དུ་གྲགས་འདོད་པའི་བོད་པ་འགའ་རེས་ཡང་སྐད་རིགས་འདྲ་མ་འདྲེས་ཀྱིས་ལེན་ན་སྲིད་མོད་སྐད་ཆ་འདི་སྐབས་དང་མི་འབྲེལ་པས་གཡུགས་ཞོག རྗེས་སུ་ཡི་རང་བྱེད་འདོད་པ་དག་ནི་ཕ་སྐད་གཙང་མའི་ལམ་ནས་གླུ་དབྱངས་ལེན་མཁན་གངས་ཅན་པ་སྒྲོལ་མ་སྐྱབས་དང་རིག་འཛིན་སྒྲོལ་མ་སོགས་ལ་བཤད་པ་ཡིན། ཡང་དེ་ནས་ཤེས་ཡོན་པ་ཚོས་སྦྲགས་སྐད་བཤད་པ་ནི་ངོ་མ་སྙིང་ལ་གཟན་པ་ཞིག་རེད།ལྷག་པར་དུ་མཚན་སྙན་གྲགས་ཅན་གྱི་ཤེས་ཡོན་པ་ཞིག་ཡིན་ཚེ་ཁོ་བོའི་མིང་དེ་ངོས་འཛིན་བྱེད་ཞོར་ཁོང་ཚང་གིས་ཀྱང་སྦྲགས་སྐད་བཤད་བཞིན་གདའ་ང་ཚོས་བཤད་ན་སྐྱོན་ནི་མ་རེད་ཟེར་དང་འདོད་མཁན་གྱི་བོད་པ་གླེན་རྒན་འགའ་རེ་མཆིས་པས་མཁས་རྒན་ཁྱོད་ཚོས་ཀྱང་འདིའི་ཕྱོགས་སུ་མནོ་སེམས་རེ་བཏང་ན་བསམ་པའི་བྲིས་པ་ཡིན།ད་ལྟ་ང་ཚོས་བོད་སྐད་ཡིག་ཉམས་དམས་སུ་འགྲོ་བཞིན་པ་འདི་མཐུན་སྒྲིལ་གྱི་སྒོས་མྱུར་དུ་མྱུར་སྐྱོབ་བྱེད་ན་སྐྱོབ་དུས་རེད་སེམས་ཡོད། དེ་མ་གཏོགས་སྲིད་གཞུང་གིས་བོད་པའི་སྐད་ཡིག་དང་རིག་གནས་ཀྱི་རྫོང་གང་སར་འཐུག་ན་དེ་གར་ཁང་བརྩེགས་ཀྱི་འཛུག་བསྐྲུན་གྱི་འཚང་ཁ་རྒོད་པའི་དགོངས་དོན་ང་ཚོས་རྟོགས་སམ། མང་རའི་རབ་ཆུང་། ༢༠༡༡.༠༦.ཚེས་༢༩ལ། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

སྦྲ་རིགས་ཐོགས་མེད། ཕྱི་ལོ་ཉིས་སྟོང་བརྒྱད་ལོའི་ཟླ་གསུམ་པའི་ཚེས་བཅུ་བདུན་ཏེ།ཉམ་ཆུང་བོད་མི་གང་མང་གི་ཚེ་སྲོག་དག་རེ་རེ་བཞིན་ཉེན་རྟོག་དམག་མིའི་མེ་མདའ་དང་བརྡུང་བརྡེག་ཁྲོད་ནས་ཡལ་བཞིན་པའི་གདུག་རྩུབ་ཀྱིས་ཁེངས་བའི་མུན་ནག་གི་མཚན་མོ་ཞིག་ལ།མི་སེམས་དབང་མེད་དུ་འགུགས་པར་བྱེད་ལ་དྭངས་གཙང་དང་བརྩེ་དུང་གི་ཟིལ་ཤུགས་འབར་བའི་བརྩེ་འཕྲིན་འདི།སི་ཁྲོན་འབ ར་ཁམས་མི་རིགས་སློབ་འབྲིང་གི་དགེ་རྒན་ཤེས་མཛངས་གཉིས་ལྡན་གྱི་གཞོན་ནུ་མ་བསྟན་འཛིན་སྒྲོལ་མས།མི་ལོ་ཧྲིལ་བོ་དགུ་ལྷག་གི་རིང་མ་ཤི་གསོན་བྲལ་བྱེད་དགོས་བྱུང་བའི་རང་གི་དཔྲལ་བའི་མིག་དང་ཁོག་གི་སྙིང་ལྟར་གཅེས་པའི་ཆུང་འདྲིས་མཛའ་གྲོགས་བསྟན་འཛིན་ལ་བསྐུར་བའི་འཕྲིན་ཐེངས་གོ་གཉིས་པ་དེ་ཡིན་ལ།འཇིག་སྐྲག་དང་ཉེན་ཁ་གྲངས་མེད་ཀྱི་འོག་ཏུ་གནས་པའི་བོད་རིག ས་གཞོན་ནུ་མ་ཞིག་གིས་རང་གི་མཛའ་བོར་དྲན་གདུང་དང་ཕྱིར་དྲན་གྱི་མིག་ཆུ་ཤམ་ཤམ་བཞུར་གྱིན་བྲིས་པའི་བརྩེ་དུང་གི་འཕྲིན་ཡིག་ཐ་མ་དེའང་ཡིན།སྨྲ་བརྗོད་ཀྱིས་གཞལ་ཐབས་བྲལ་ཞིང་ཁོ་མོའི་ཟུངས་ཁྲག་ལྟ་བུའི་དུངས་ཞེན་གྱི་ཡིག་འབྲི་རེ་རེས་བརྩེ་དུང་གི་སྐྱོ་སྨྲེང་དང་བརྩེ་དུང་གི་གདམ་ག་རེ་རེའི་འགྲེལ་བཤད་ཁུར་ནས་གངས་རིའི་ལས་དབང་གི་འབོད་སྒྲ་དང་མཉམ་དུ་ལེ་བ ར་ཁྲི་ཕྲག་བརྒལ་ནས་སླེབས་བྱུང་། བསྟན་འཛིན་སྒྲོལ་མས་རང་གི་བརྩེ་འཕྲིན་འདི་ཧང་ཀོང་བརྒྱུད་ནས་རྒྱ་གར་དུ་བཏང་ཟིན་པའི་ཉིན་གཉིས་པ་སྟེ།ཟླ་གསུམ་པའི་ཚེས་བཅུ་དགུ་ཉིན་གྱི་ཞོགས་པར་ཁོ་མོ་གཙོས་དགེ་སློབ་སུམ་བརྒྱ་ལྷག་ཁྲོམ་ལམ་དུ་ཐོན་ནས་རང་དབང་འཐབ་རྩོད་ཀྱི་འབོད་སྒྲ་བསྒྲགས་པར་བརྟེན།ཉིན་དེའི་ཕྱི་དྲོར་གློ་བུར་དུ་ཁོ་མོ་དྲག་ཆས་སྤྲས་པའི་ཉེན་རྟོག་དམག་མིས་བཙན་ཁྲིད་བྱས་སོང་ལ།ཉིན་དེ་ནས་བཟུང་ད་ལྟའི་བར་དུ་གཞོན་ནུ་མ་བསྟན་འཛིན་སྒྲོལ་མ་གར་སོང་ཆ་མེད་དུ་གྱུར་སོང་བས།ཁོ་མོའི་ནང་མི་དང་ས་གནས་བོད་མི་ཚོས་མུ་མཐུད་རྩད་གཅོད་བྱེད་བཞིན་ཡོད་མོད།འོན་ཀྱང་།ཡིད་སྐྱོ་བ་ཞིག་ལ་བརྕེ་དུང་དང་རྒྱལ་ཞེན་ཅན་གྱི་གཞོན་ནུ་མ་དེ་ད་དུང་ཡང་གབ་ཚིག་ཅིག་དང་འདྲ་བར་ཐ་ན་ཤི་གསོན་གྱི་གནས་ཚུལ་ཡང་ཤེས་རྟོགས་བྱུང་མེད། བདག་གིས་ཉིན་མཚན་དབྱེར་མེད་དང་ཐ་ན་དུས་ཚོད་སྐར་ཆ་རེ་རེར་ཡང་གཏན་ནས་བརྗེད་མ་མྱོང་བའི་རྒྱང་རིང་གི་སྙིང་སྡུག་འགྱུར་མེད་གཏན་གྲོགས་བསྟན་འཛིན་ལགས། དོ་དགོངས་ཡང་སྔར་བཞིན་ཁྱོད་ཁོ་ནའི་ཆེད་དུ་འཚོ་བཞིན་པའི་རྒྱང་རིང་གི་མཛའ་མོ་ངས།དྲན་གདུང་དང་ཕྱིར་དྲན་གྱི་སྨྲེང་སེམས་རི་རབ་བཞིན་མདུན་དུ་སྤུངས་ནས་ཁྱོད་ལ་བརྩེ་འཕྲིན་ཐེངས་གོ་གཉིས་པ་དེ་འབྲི་བཞིན་ཡོད།སྐྱིད་ལ་སྡུག་པའི་མི་ཡུལ་འདིའི་ལས་དབང་གི་བཀོད་སྒྲིག་འོག་མཛའ་མོ་བདག་ཁྱོད་ཀྱི་ལྷད་མེད་པའི་བརྩེ་དུང་དང་།ཁྲེལ་གཞུང་།བྱམས་སྐྱ ོང་བཅས་ཀྱི་འོད་སྣང་འོག་ནས་མེ་ཏོག་བཞིན་འཚར་ལོངས་བྱུང་།དུས་དེ་ནས་བཟུང་བུ་མོ་ངའི་མི་ཚེའི་ཕྱི་ནང་ཀུན་ནས་དགའ་སྤྲོའི་ཁུ་བྱུག་ཐོག་མར་གྲགས་བྱུང་ལ།དུས་དེ་ནས་བཟུང་གཞོན་ནུ་མ་ཞིག་གི་རྨི་ལམ་ཁྲོད་འཆར་ཡན་དང་མཛེས་སྡུག་གི་སྦྲང་ཆར་ཟིམ་ཟིམ་བབས་བྱུང་།བརྩེ་དུང་ལ་བློ་གཏད་དང།བརྩེ་དུང་ལ་བརྩི་བཀུར།མདོར་ན་བརྩེ་དུང་གི་ཆེད་དུ་ཅི་ཡང་བྱས་མྱོང་བའི་བུ་ མོ་ངའི་མི་ལོ་ཧྲིལ་བོ་དགུ་ལྷག་གི་ཀྱག་ཀྱོག་ཆེ་བའི་ཁེར་རྐྱང་གི་བགྲོད་ལམ་རིངམོའི་ཐོག་ཏུ།བརྩེ་དུང་གིས་བདག་ལ་འཛད་མཐའ་མེད་པའི་སྟོབས་ཤུགས་བསྩལ་ཅིང་བརྩེ་དུང་གིས་བདག་ལ་རྫོགས་མཐའ་བྲལ་བའི་ལམ་སྟོན་གནང་བྱུང་།ད་དུང་བརྩེ་དུང་གིས་བདག་ལ་ཁྲེལ་གཞུང་དང་ཕྱི་ཐག་གི་རིན་ཐང་ཤེས་སུ་བཅུག་ཅིང་།བརྩེ་དུང་གིས་གཞོན་ནུ་མ་ཞིག་ལ་ངེས་པར་དུ་ཡོད་དགོས་པའི་རང་ཚ ུགས་དང་ཡ་རབས་ཀྱི་ཀུན་སྤྱོད་ཀྱང་བསླབས་བྱུང་། ངའི་རྒྱང་རིང་གི་སྙིང་སྡུག་ལགས།གྲོང་གསེབ་ཀྱི་སློབ་ཆུང་དེ་རུ་ཐེངས་དང་བོར་ངེད་གཉིས་འཛིན་ཁང་གཅིག་ཏུ་འཕྲད་ཅིང་རྐུབ་སྟེགས་གཅིག་ཏུ་བསྡད་ནས་ཀ་ཁའི་གླུ་དབྱངས་ཐོག་མར་ལེན་དུས།ཁྱོད་ཀྱིས་ཕུ་བོ་ཞིག་གི་ཚུལ་གྱིས་བདག་ལ་དྲེད་མོང་དང་རི་སྤྱང་གི་གནའ་སྒྲུང་བཤད་མྱོང་ལ།སྡེ་འདབས་ཀྱི་བྱིས་པ་སྣབས་ལུག་ཚོའི་གདོང་དུ་བུད་ནས་ང་ལ་སྲུང་སྐྱོབ ་ཡང་ཐེངས་མང་བྱས་མྱོང་ཨང་།དུས་དེ་ནས་བཟུང་ངས་ཁྱེད་ཀྱི་དྭངས་གཙང་གི་མིག་མདངས་ལས་མཉེས་གཤིན་དང་བརྩེ་བས་བརླན་པའི་འཇིག་རྟེན་གཞན་ཞིག་མཐོང་བྱུང་ལ།དུས་དེ་ནས་བཟུང་ངས་ཁྱེད་ཀྱི་བྱམས་སྐྱོང་དང་ཕྱི་ཐག་ལས་མི་ཡུལ་ཁོ་ནར་ཡོད་པའི་བརྩེ་དུང་གི་དྲོད་ཁོལ་གསར་བ་ཞིག་ཀྱང་ཚོར་བྱུང་།དེ་ལྟར་ལོ་ཟླ་གང་མང་གི་བརྒྱུད་རིམ་ཁྲོད་དུ་ཁྱོད་རང་རིམ་བཞིན་ངའི་བརྩེ་དུ ང་གི་འཇིག་རྟེན་དུ་དཔྱིད་དུས་ཀྱི་རྒྱ་སེ་མེ་ཏོག་བཞིན་ཡོངས་སུ་བཞད་བྱུང་ལ།བུ་མོ་ཞིག་གི་འཚོ་བའི་བརྒྱུད་རིམ་ཁྲོད་མེད་ཐབས་མེད་པའི་ཆ་ཤས་གལ་ཆེན་ཞིག་ཏུའང་ཆགས་སོང་། ངའི་བརྩེ་དུང་གི་རྒྱལ་སྲས་ལགས།ནམ་རྒྱུན་ཁྱོད་ལ་འཕྲིན་ཡིག་འབྲི་ཐེངས་རེ་རེ་དང་ཡང་ན་རང་ཉིད་ཀྱི་ཉིན་ཐོ་ལག་ཏུ་ལེན་ཐེངས་རེ་རེར།ཁྱོད་ཀྱི་མཛའ་མོ་ང་འདི་ལྟར་རང་དབང་མེད་པར་འདས་ཟིན་པའི་མཛེས་སྡུག་གི་འཆར་ཡན་ཁྲོད་དབང་མེད་དུ་ཤོར་འགྲོ།གཅིག་བྱས་ན་འདི་ནི་ལེ་བར་སྟོང་ཕྲག་དུ་མས་བར་ཐག་ཆོད་པའི་སྙིང་སྡུག་ཁྱོད་དང་ངེད་གཉིས་ཁོ་ནར་ཡོད་པའ ི་བརྩེ་དུང་གི་རོལ་མྱོང་བྱེད་སྟངས་གཞན་ཞིག་ཡིན་སྲིད།སྙིང་སྡུག་ལགས།སློབ་གྲྭ་ཆུང་འབྲིང་གི་དགའ་སྐྱོའི་འཚོ་བའི་བརྒྱུད་རིམ་རིང་མོའི་ཁྲོད་དུ་བུ་མོ་ངས་ཉིན་མཚན་དབྱེར་མེད་དུ་ཁྱོད་ཀྱི་ངག་ནས་“ང་རང་ལ་སེམས་གཏིང་ནས་དགའ”ཞེས་པའི་སྐད་ཆ་འདི་དངོས་སུ་ཐོས་པར་རེ་སྒུག་ག་ཚོད་ཅིག་བྱས་ཟིན་པ་ཨེ་ཤེས།གང་ཡིན་ཞེ་ན།ཁྱོད་ཀྱིས་བདག་ལ་སློབ་ཚན་ཟུར་ཁྲིད་བྱེད་ཐ ེངས་རེ་རེ་དང་ཡང་ན་གུང་གསེང་སྐབས་ངེད་གཉིས་ཕ་ཡུལ་གྱི་བཞི་མདོ་དེ་ནས་ཕན་ཚུན་འབྲལ་ཐེངས་རེ་རེར།ངས་ཁྱོད་ཀྱི་འཁྲེངས་ཞེན་གྱི་མིག་མདངས་དང་བརྩེ་དུང་གིས་ཁེངས་པའི་ལུས་ངག་གི་རྣམ་འགྱུར་ལས།ཁྱོད་ཀྱི་སེམས་སུའང་ང་དང་འདྲ་བར་བརྗོད་འདོད་པའི་སྐད་ཆ་གྲངས་མེད་ཅིག་རི་རབ་བཞིན་སྤུངས་ནས་ཡོད་པ་ཚོར་ཐུབ་ལ།ཁྱོད་ཀྱང་ང་དང་འདྲ་བར་ཚུལ་འཆོས་དང་རྫུ་བག་གི་མི་གཤ ིས་འདི་རྒྱབ་ཏུ་བསྐྱུར་ནས་མཛའ་མོ་ང་དང་མཉམ་དུ་ཕོ་མོའི་བརྩེ་དུང་ལ་རོལ་འདོད་ཡོད་པ་གསལ་བོར་ཤེས་ཐུབ། སློབ་འབྲིང་མཐར་ཕྱིན་ལ་ཉེ་བའི་གཟའ་ཉི་མའི་ཕྱི་དྲོ་དེ་ངས་ད་ལྟའང་ད་དུང་གཏན་ནས་བརྗེད་མི་ཐུབ།ཐོག་བརྩེགས་གསུམ་པའི་འཛིན་ཁང་དྲུག་པའི་ནང་དུ་ཁྱོད་ཀྱིས་བདག་ལ་བརྩེ་འཕྲིན་ཐོག་མ་དེ་སྤྲོད་སྐབས།ནམ་རྒྱུན་གྱི་བློ་རིག་རྒོད་ཅིང་སྨྲ་ལྕེ་བདེ་བའི་སྙིང་སྡུག་ཁྱོད།ཉིན་དེར་སྨྲ་བ་ཉུང་ལ་ཐ་ན་མགོ་བོ་ཡང་དགྱེ་མི་ཐུབ་པའི་ཇི་འདྲའི་ཕོ་སར་ཉམ་ཆུ ང་ཞིག་ཡིན་ཨང་།ལུས་ངག་གི་སྨྲ་བརྗོད་ལས་ཐོན་པའི་བཅོས་མིན་གྱི་རྣམ་འགྱུར་འདི་དག་གིས་ཁྱོད་ཀྱིས་རང་གི་མཛའ་མོར་བཅངས་པའི་བརྩེ་དུང་ལ་རིན་ཐང་ག་ཚོད་ཅིག་སྤྲད་ཡོད་པ་རྟོགས་ཐུབ་ལ།ཁྱོད་ཀྱིས་མི་ཡུལ་འདིའི་ཆེས་མཛེས་སྡུག་ལྡན་པའི་བརྩེ་དུང་ལ་བླ་ན་མེད་པའི་བརྩི་བཀུར་དང་གདེངས་འཇོགས་ག་ཚོད་ཅིག་གནང་བཞིན་པའང་ཤེས་སུ་བཅུག་པས།ཉིན་དེར་ཁྱོད་ཀྱི་མཛའ་མོ་བདག ་གོམས་སྲོལ་དང་སྤྱི་ཚོགས་ཀྱི་བཀག་རྒྱ་ལས་རྣམ་པར་རྒྱལ་ཏེ་རྒྱུགས་ཐེངས་གཅིག་གིས་ཁྱོད་ཀྱི་པང་དུ་མཆོངས་པ་དེ་དྲན་བྱུང་ངམ།ཁྱོད་ཀྱིས་ཀྱང་བདག་པང་དུ་དམ་པོར་བཟུང་ནས་སེམས་ཆུང་ངང་དཔྲལ་བར་འོ་ཞིག་བསྐྱལ་དུས།ངས་གནམ་འོག་འདིའི་གཞོན་ནུ་ཕོ་མོ་ཚོའི་ལྷད་མེད་རྣམ་དག་གི་བརྩེ་དུང་ནི་བསིལ་རླུང་བཞིན་ལྷོད་ཀྱིས་ལྡང་ཞིང་གཙང་བོ་བཞིན་དལ་གྱིས་བཞུར་བཞིན་པའི་ སྨྲ་བསམ་བརྗོད་མེད་ཀྱི་མཛེས་སྡུག་མཐར་ཐུག་དེ་ཡིན་པ་མཐོང་བྱུང་ལ།ངས་གཞོན་ནུ་མ་ཞིག་གི་མི་ཚེའི་ནང་གི་རང་ལ་ཐོབ་དགོས་པ་ཡོད་ཚད་དང་དབང་དགོས་པ་ཡོད་ཚད་འདི་ལྟར་སྐར་ཆ་རེ་རེ་བཞིན་བདག་གི་ལུས་ངག་ཡིད་གསུམ་ལ་དབྱེར་མེད་དུ་ཐིམ་སོང་བསམ། བདག་གི་སྙིང་སྡུག་ལགས།འདས་ཟིན་པའི་དྲན་གདུང་དང་སྐྱོ་སྨྲེང་གིས་ཁེངས་པའི་མི་ལོ་ཧྲིལ་བོ་དགུ་ལྷག་གི་འགྲུལ་བཞུད་ཁྲོད།ངས་ཁྱོད་རང་དྲན་ཐེངས་རེ་རེར་ཐོག་བརྩེགས་གསུམ་པའི་འཛིན་ཁང་འདིར་འོང་ནས་མིག་ཆུས་བྲིས་པའི་རང་ཉིད་ཀྱི་ཉིན་ཐོ་དག་དང་ཁྱོད་ཀྱི་བརྩེ་འཕྲིན་དག་ཡང་ཀློག་བསྐྱར་ཀློག་བྱེད་བཞིན་ཡོད།ཁྱོད་རང་ནམ་རྒྱུན་སྡོད་སའི་རྐུབ་སྟེ གས་ཨང་དྲུག་པ་དེའི་ཐོག་ནས་བདག་གིས་དྲན་གདུང་གི་ཉིན་ཐོ་དག་ངུ་ངག་གིས་ཀློག་ཐེངས་རེ་རེར།ངའི་སེམས་ཀྱི་གཏིང་རིམ་ཞིག་ནས་ཁྱོད་ཀྱིས་དུས་ད་ལྟའང་ད་དུང་བདག་པང་དུ་དམ་པོར་བཟུང་ནས་སྐྲ་ལོར་བྱིལ་བྱིལ་གཏོང་ཞོར་བདག་ལ་སེམས་གསོ་གཏོང་བཞིན་ཡོད་པ་ཚོར་འོང་།ཁྱོད་ཀྱིས་དྲན་བྱུང་ངམ་སྙིང་སྡུག་ལགས།སྲིད་ཇུས་ཀྱི་གནོན་ཤུགས་འོག་ལོ་ངོ་དགུ་ལྷག་གི་གོང་དུ་ཁྱོད་ རང་མི་འདོད་བཞིན་གནས་འདི་ནས་འབྲལ་དགོས་བྱུང་བའི་མཚན་མོ་དེར།ཁྱོད་ཀྱིས་བདག་གི་རྣ་བར་ཧ་ཅང་ནན་ཏན་ངང“བདག་གནས་སྐབས་ཁྱོད་དང་འབྲལ་དགོས་བྱུང་ཡང་།ང་རང་ནམ་ཡང་ཁྱོད་ཀྱི་སེམས་ཁོང་དུ་བརྟན་པོར་བསྡད་ཡོད”ཅེས་བརྗོད་མྱོང་ཨང་།སྙིང་སྡུག་ཁྱེད་ཀྱིས་བརྩེ་དུང་ལ་བཅངས་པའི་ཡིད་ཆེས་དང་།ཆོད་སེམས།ཕྱི་ཐག་བཅས་ཀྱིས་བུ་མོ་ངའི་ཀྱག་ཀྱོག་ཆེ་བའི་ཁེར་རྐྱང་གི་མི་ཚ ེའི་འགྲུལ་བཞུད་ཁྲོད་དུ་ཟད་མི་ཤེས་པའི་སེམས་ཤུགས་དང་སྐུལ་མ་ཐེབས་བྱུང་བས།ནམ་རྒྱུན་དགའ་སྤྲོའི་ངང་ཕན་ཚུན་གྱི་དཔུང་བར་འཇུས་ནས་འགྲོ་བཞིན་པའི་མཐོ་སློབ་སྐབས་ཀྱི་དགའ་རོགས་ཕོ་མོ་དེ་དག་དང་།ཡང་ན་ས་སྲོད་ཀྱི་གཞུང་ལམ་ཐོག་ཡིད་དུ་འོངས་པའི་སོ་སོའི་བྱིས་པ་དག་ཁྲིད་ནས་སྤྲོ་འཆམ་ལ་ཕེབས་བཞིན་པའི་དགེ་རྒན་ལས་བྱེད་ཚོ་མཐོང་ཐེངས་རེ་རེར།ང་རང་ཁུ་སིམ་མེ ར་རང་ཉིད་ཀྱི་ཉིན་ཐོ་ཁྱེར་ནས་ཁེར་རྐྱང་ངང་ངེད་གཉིས་མཉམ་དུ་བསྐྱོད་མྱོང་བའི་ལྗོན་གསེབ་དང་།ཡང་ན་ཁྱོད་ཀྱིས་དགའ་མོས་བྱེད་སའི་སློབ་རྭའི་སྐྱེད་ཚལ་སོགས་སུ་སོང་ནས་ཞིམ་མངར་ལྡན་པའི་བརྩེ་དུང་གི་ལོ་ཟླ་དག་ལ་ཕྱིར་དྲན་བྱེད་བཞིན་ཡོད།འདི་ནི་ལོ་ངོ་འདི་དག་གི་རིང་བདག་ཁོ་ནར་ཡོད་པའི་བརྩེ་དུང་གི་རོལ་མྱོང་བྱེད་སྟངས་ཞིག་གམ་ཡང་ན་གཞོན་ནུ་མ་ཤིག་གིས་རང ་གི་དྲན་གདུང་དང་སྐྱོ་སྣང་ལ་སེམས་གསོ་བྱེད་ཚུལ་གསར་བ་ཞིག་ཀྱང་ཡིན་སྲིད། ངའི་རྒྱང་རིང་གི་སྙིང་སྡུག་ལགས།ཁྱོད་རང་གནས་འདི་ནས་འབྲལ་དགོས་བྱུང་བའི་ཉིན་དེ་ནས་བཟུང་།ངའི་བརྩེ་དུང་གི་འཇིག་རྟེན་ལ་ཁེར་རྐྱང་གི་ཁ་བ་ལྷབ་ལྷུབ་ཏུ་འབབ་འགོ་བརྩམས་ཤིང་།ངའི་དགོད་སྒྲས་ཁེངས་པའི་ཉིན་མཚན་མཐའ་དག་སྨྲེང་སེམས་དང་མུན་ནག་གིས་བཟུང་སོང་།དུས་དེ་ནས་བཟུང་།ཁྱོད་དང་ངེད་གཉིས་ཀྱི་བྱིས་དུས་ཀྱི་དགོད་སྒྲ་བསྐྱུར་མྱོང་བའི་ཕ ་ཡུལ་གྱི་གྲམ་གཞུང་དང་གཙང་ཆུ་འགྲམ།ད་དུང་སྡེ་འདབས་ཀྱི་སློབ་ཆུང་སོགས་ནི་ང་ཆེས་དགའ་བའི་འཆམ་འཆམ་བྱེད་ཡུལ་དག་ཡིན་ལ།ད་དུང་དུས་དེ་ནས་བཟུང་།ཁྱོད་དང་ངའི་སྦྲང་རྩིས་གཏམ་པའི་བརྩེ་དུང་གི་གཏམ་རྒྱུད་སྦྲུམ་པའི་མི་རིགས་སློབ་འབྲིང་འདི་ནི་བདག་གི་འབྲལ་མི་ཕོད་པའི་ཁེར་རྐྱང་གི་ཁྱིམ་གཞིས་སུ་གྱུར།མི་རིགས་སློབ་འབྲིང་འདིའི་གྲུ་ཁ་རེ་རེ་ནས་ངེད་གཉིས་མ ཉམ་དུ་དགོད་མྱོང་ལ་མཉམ་དུ་མི་སེམས་འཁོལ་བའི་སྙིང་གཏམ་གང་མང་ལའང་རོལ་མྱོང་།ད་དུང་གནས་འདི་ནས་བདག་གི་སློབ་སྦྱོང་ཆེད་དུ་ཁྱོད་ཀྱིས་རང་གི་གུང་གསེང་གང་མང་བློས་གཏོང་བྱེད་མྱོང་ལ།གནས་འདི་ནས་ཁྱོད་ཉེན་རྟོག་ལས་ཁུངས་སུ་སྐད་བཏང་ཐེངས་རེར་བདག་གིས་མིག་ཆུ་ཡང་གྲངས་མེད་བཏང་མྱོང་ཨང་།ངའི་བརྩེ་དུང་གི་རྒྱལ་སྲས་ལགས།ལྗོན་ཤིང་གི་འདབ་ལོ་འཁྲིགས་པའི་ཨར་འ དམ་གྱི་ལམ་ཆུང་འདིའི་ཐོག་ཏུ་བདག་ཁྱོད་ཀྱི་དཔུང་བར་འཇུས་ནས་ཐེངས་ག་ཚོད་ཅིག་བསྐྱོད་མྱོང་བ་ཁྱེད་ཀྱིས་ཨེ་ཤེས།ད་དུང་ཟླ་འོད་ཀྱི་ལྷང་འཇགས་བཞུར་བའི་མཚན་མོའི་གཙང་འགྲམ་འདི་ནས་བདག་ཁྱོད་ཀྱི་ཕྲག་པར་ཁེན་ནས་མཚན་མོ་ཅི་ཙམ་ལབསྡད་མྱོང་བ་ཁྱོད་ཀྱིས་བརྩིས་ཨེ་མྱོང་།གང་ལྟར་དེ་དག་ཡོད་ཚད་ནི་འཆར་ཡན་དང་མཛེས་སྡུག་གིས་ཕྱུག་པའི་ཁྱོད་དང་བདག་གི་ཁར་སང་གི་གཏ མ་རྒྱུད་དང་དེ་རིང་གི་དྲན་གདུང་འབའ་ཞིག་མ་ཡིན་ནམ། སྙིང་སྡུག་ཁྱོད་ཀྱིས་གསལ་བོར་དྲན་ངེས།དེ་རིང་ནི་བདག་གིས་བློས་མི་ཐོངས་པའི་ཁྱོད་རང་གནས་འདི་དང་ཁ་བྲལ་ནས་མི་ལོ་ཧྲིལ་བོ་དགུ་དང་ཟླ་གསུམ་ཏག་ཏག་ཡིན་ལ།ཉིན་མཚན་དབྱེར་མེད་དུ་ཁྱོད་རང་དྲན་བཞིན་པའི་མཛའ་མོ་བདག་མོ་ལོ་ཧྲིལ་བོ་ཉེར་ལྔ་ཟིན་པའི་སྐྱེ་སྐར་ཡང་ཡིན།གང་ལྟར་ཁྱོད་ཀྱི་མཛའ་མོ་བདག་ད་ལྟ་གཞོན་པའི་ལང་ཚོ་ཡོངས་སུ་སྨིན་པའི་སྨན་ཤར ་གཞོན་ནུ་མ་ཤིག་ཆགས་ཟིན་ལ།ཕ་མ་དང་ཉེ་འབྲེལ་གང་མང་གིས་ཁ་ཏ་དང་སེམས་ཁུར་བྱེད་སའི་མོ་རྐྱང་བུད་མེད་དར་མ་ཤིག་ཏུའང་གྱུར་ཡོད།སྤྱི་ཚོགས་ཀྱི་གནོན་ཤུགས་དང་ཕ་མའི་སེམས་ཁུར་གྱི་འོག་འཚོ་བཞིན་པའི་དེ་རིང་།ཐག་རིང་གི་སྙིང་སྡུག་ཁྱོད་རང་རྒྱབ་རི་ཞིག་གི་ཚུལ་གྱིས་བདག་གི་འགྲམ་དུ་ཡོད་ན་ཅི་མ་རུང་བསམ་ཞིང་།ཡང་ན་བདག་ཁྱོད་ཀྱི་དཔུང་བར་འཇུས་ནས་མི་ཁ་དང་འཕྱ ་སྨོད་ཀྱིས་ཁེངས་བའི་མི་ཚེའི་བགྲོད་ལམ་ཐོག་ཏུ་དཔུང་བ་མཉམ་གཞིབ་ཀྱིས་སྐྱོད་བཞིན་ཡོད་ན་ཅི་མ་རུང་བསམ་བྱུང་ཨང་། འོན་ཀྱང་། ཉེ་ཆར་བདག་གིས་ཁྱོད་ཀྱི་བརྩེ་དུང་གི་མཚོ་མོ་སྐྱོམ་བཞིན་ཕ་མའི་སེམས་ཁྲལ་གྱི་ཁུར་བོ་ཕབ་བཞིན།ངེད་གཉིས་ཁོ་ནར་དབང་བའི་ལྷད་མེད་བརྩེ་དུང་གི་འཇིག་རྟེན་གསར་བ་ཞིག་ཏུ་དཔྱིད་དུས་ཀྱི་སྦྲང་ཆར་བཞིན་ལྷོད་ཀྱིས་འབབ་ཆོག་པའི་གནས་ལུགས་གསར་བ་ཞིག་མཐོང་སོང་།ངའི་རྒྱང་རིང་གི་སྙིང་སྡུག་ལགས།བོད་མིའི་རང་དབང་འཐབ་རྩོད་ཀྱི་འབོད་སྒྲ་ རེ་རེས་ཕོ་ཏ་ལའི་གཟི་བརྗིད་དང་ཡུམ་བུ་བླ་མཁར་གྱི་སྙིང་སྟོབས་ཁུར་ནས་བོད་ཡུལ་སྟོད་སྨད་བར་གསུམ་དུ་ཁྱབ་བྱུང་།རླབས་ཆེ་བའི་འབོད་སྒྲ་འདི་ནི་འགོག་མི་ཐུབ་པའི་རྒྱ་མཚོའི་རྦ་རླབས་བཞིན་མཛའ་མོ་ངའི་བྲང་ཁོག་གཤགས་ནས་ཁྱོད་ཀྱི་བརྩེ་དུང་དང་དབྱེར་མེད་དུ་འདྲེས་སོང།ཁྱོད་ཀྱིས་བདག་ཁོ་ནར་གནང་བའི་ལྷད་མེད་བརྩེ་སེམས་ཀྱི་སྒུལ་ཤུགས་དེ་དང་།ཁྱོད་ཀྱིས་རང་ག ི་མི་རིགས་ལ་ཕུལ་དང་འབུལ་བཞིན་པའི་རླབས་ཆེན་བྱ་བཞག་དེ་དག་གིས་བདག་ཀྱང་རང་དབང་མེད་པར་གནས་ལུགས་དང་ཞི་བདེའི་འཐབ་རྕོད་འདིའི་ཁྲོད་འཐིམས་སུ་བཅུག་སོང་།དེའི་ཕྱིར།དེ་རིང་མཛའ་མོ་ངས་རང་ཉིད་ཀྱང་སྙིང་སྡུག་ཁྱེད་དང་འདྲ་བར་བོད་མི་རིགས་ཀྱི་རླབས་ཆེ་བའི་འཐབ་རྩོད་འདིའི་ཆ་ཤས་ཤིག་ཏུ་གྱུར་ན་ཅི་མ་རུང་བསམ་ཞིང་།རང་ཉིད་ཀྱིས་ཀྱང་སྙིང་སྡུག་ཁྱེད་དང་འདྲ་ བར་རང་གི་མི་རིགས་དང་རྒྱལ་ཁབ་ལ་ལེགས་སྐྱེས་ཅུང་ཤིག་འབུལ་སྙིང་འདོད་བྱུང་།འདི་ནི་ཐག་རིང་གི་སྙིང་སྡུག་ཁྱོད་ཀྱིས་བདག་ལ་གནང་པའི་རླབས་ཆེན་གྱི་གདམ་ག་ཞིག་སྟེ།མཛའ་མོ་ངས་རང་ཉིད་ཀྱི་ཡོད་ཚད་ཁྱོད་ལ་འབུལ་བའི་གོ་རིམ་ཞིག་ཀྱང་ཡིན་ངེས། ངའི་རྒྱང་རིང་གི་སྙིང་སྡུག་ལགས།གཅིག་བྱས་ན་འཕྲིན་ཡིག་འདི་ཁྱོད་ཀྱི་ལག་ཏུ་འབྱོར་དུས་ང་རང་མཛེས་སྡུག་གི་འཇིག་རྟེན་གཞན་ཞིག་ཏུ་བཞུད་ཟིན་ཡོད་སྲིད་ལ།ཡང་ན་མནར་གཅོད་ཀྱི་གོ་རིམ་བཞན་ཞིག་གི་ཁྲོད་དུ་འགྲོ་ལྡོག་བྱེད་བཞིན་ཡོད་ཀྱང་སྲིད།གང་ལྟར་ཡང་ཁྱོད་ཀྱིས་གཏན་ནས་སེམས་ཁྲལ་མ་གནང་རོགས།མཛའ་མོ་བདག་ལ་ཁྱོད་ཀྱིས་གནང་བའི་ལྷད་མེད་བརྩེ་དུང་གི་སྟོབས་ཤུགས་དང་སྤོབས་པ་ཡོད་པས།ངས་འདི་ལྟར་ཁེར་རྐྱང་དང་དྲན་གདུང་ཡོད་ཚད་རྒྱབ་ཏུ་བསྐྱུར་ཏེ་རང་དབང་གི་འཇིག་རྟེན་གཞན་ཞིག་ནས་ཁྱོད་ཀྱི་བརྩེ་དུང་གི་མཚོ་མོ་བསྐྱོམ་དུ་འཇུག་ན་འདོད།ད་དུང་ངས་འདི་ལྟར་རྒྱ་མཚོའི་རྦ་རླབས་བཞིན་འཕྱུར་བཞིན་པའི་རང་དབང་གི་འབོད་སྒྲ་འདིའི་མཐོ་སར་བུད་དེ་ཁྱོད་ཀྱིས་བདག་ལ་གནང་བའི་ལྷད་མེད་བརྩེ་དུང་ལ་བདེན་དཔང་གི་ ཐ་ཚིག་བསྒྲག་ན་འདོད།ངའི་བློ་བརྟན་འགྱུར་མེད་ཀྱི་སྙིང་སྡུག་ལགས།ང་གཏན་དུ་ཁྱེད་ཁོ་ནར་དགའ་ཞིང་ཁྱེད་ཁོ་ནར་དབང་བ་ཡིན། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།