བསྟན་འཛིན་དཔལ་མཆོག ཨོཾ་སྭ་སྟི། ཐབས་ཤེས་ཟུང་འཇུག་ལམ་བཟང་གོམས་པས་སྙིགས་ལྔ་ཆེས་ཆེར་དར་ཚེ་ཡང་།། རིས་སུ་མ་མཆིས་ཐུབ་པའི་ལུགས་བཟང་འཇིག་རྟེན་སྐྱེ་དགུའི་གསོས་གྱུར་པ།།རྟེན་འབྲེལ་ཟབ་མོའི་ཚུལ་ལས་བརྩམས་ཏེ་རིས་མེད་འགྲོ་ལ་འདོམས་མཛད་པའི།།སྨྲ་བ་ཟླ་མེད་ཐུབ་དབང་གཉིས་པ་༧སྐྱབས་གཅིག་བསྟན་འཛིན་རྒྱ་མཚོར་འདུད།། བསྐལ་མང་སྔོན་ནས་ཐུགས་བསྐྱེད་བཟང་པོས་གངས་ལྗོངས་ཕྱག་མཚན་བཞེས་པ་ལྟར།།ཁ་བ་རི་པའི་བསོད་ནམས་གཏུགས་ཀྱང་ཐུགས་བརྩེའི་མདུད་རྒྱ་མ་ལྷོད་པར།།དུས་ཀྱི་གཉན་འཕྲང་ཡང་མཐའ་འདིར་ཡང་ཁ་བ་ཅན་པའི་མགོན་དཔུང་དུ།།བསམ་བཞིན་སྐུ་ཡི་ཟླ་ཞལ་གསར་པ་མདོ་སྨད་སྟག་འཚེར་ཡུལ་ནས་བཞད།། ན་ཚོད་ཤིན་ཏུ་ཕྲ་བ་ཉིད་ནས་སྔོན་གྱི་སྨོན་ལམ་བདེན་མཐུ་ཡིས།།དམག་ཟོར་རྒྱལ་མོའི་རྡོ་རྗེའི་ཕྱག་རྒྱས་དབུས་འགྱུར་ཆོས་ཀྱི་མདུན་ས་ཆེར།།བྱོན་པར་ཆས་ཚེ་གངས་ཅན་པ་རྣམས་བདག་ཅག་མགོན་དང་བཅས་སོ་ཞེས།། རིང་ནས་བརླག་པའི་རིན་ཆེན་རྙེད་ལྟར་དགའ་བའི་ཅ་ཅོས་ནམ་མཁའ་བཀང་།། མཉྫུ་གྷཱོ་ཥ་མི་ཡི་ཚུལ་བཟུང་ཡོངས་འཛིན་བཤེས་གཉེན་དུ་མ་ལས།།ཟབ་རྒྱས་ཆོས་ཀྱི་བགོ་སྐལ་སྤྱོད་ལ་ཉི་མས་གདུངས་པའི་གླང་ཆེན་བཞིན།།གཞོན་ནུ་ཉིད་ནས་ཐོས་བསམ་སྒོམ་པས་བློ་གྲོས་རྒན་པོའི་སྙེམས་པ་བཅོམ།།རིགས་པ་སྨྲ་བ་ཀུན་གྱི་མགོ་ལ་ལེགས་བཤད་གདོང་ལྔའི་སྦར་ཁྱིམ་བཀོད།། ཤར་ཕྱོགས་ཉི་མའི་ཚ་རླབས་འཕྱུར་བ་སྦར་མོས་འགེབས་པར་མ་ནུས་ཚེ།།གངས་ལྗོངས་ལྷ་མི་མགྲིན་དབྱངས་གཅིག་གིས་རེ་ས་ཁྱེད་ལས་མེད་དོ་ཞེས།།རྒྱལ་སྲིད་ཙབ་རལ་ཉམས་ལ་ཁད་པ་ཁྱེད་ཀྱི་ཕྱག་ཏུ་ནན་གྱིས་གཏད།།འོན་ཀྱང་མཛངས་འཕྲུལ་ཐབས་མཁས་རྒྱ་མཚོས་བོད་འབངས་བདེ་ཐབས་སྣ་མང་བརྩམས།། བསམ་སྦྱོར་ངན་པའི་ཀླ་ཀློའི་རང་གཟུགས་ཉིན་བཞིན་ཇེ་གསལ་གྱུར་པ་ན།།རྒྱལ་བསྟན་ཆབ་སྲིད་རྨང་ནས་གསོ་ཕྱིར་འཕགས་ཡུལ་ཆིབས་ཞལ་བསྒྱུར་མ་ཐག།རིང་ནས་དགོངས་པའི་མང་གཙོའི་བདག་དབང་དམངས་ལ་ལྟོས་མེད་བསྩལ་པའི་ཚེ།།ཀུན་གྱིས་མཐུན་པར་མནའ་གན་ཐུ་མོས་བཀའ་བཞིན་སྒྲུབ་པའི་དམ་བཅའ་ཕུལ།། བདེན་པ་བདེན་སར་འཁྱོལ་བར་བྱ་ཕྱིར་དེང་རབས་ཤེས་ཡོན་གལ་ཆེར་དགོངས།།མ་འོངས་སོན་རྩའི་བོད་ཕྲུག་རྣམས་ལ་དེང་རབས་ཤེས་བྱའི་ལྡེ་མིག་གཏད།།འཇིག་རྟེན་འདི་ན་གཅེས་ནོར་གཅིག་པུ་བོད་བརྒྱུད་ནང་བསྟན་འོད་པོ་ཆེ།།མི་ཉམས་འཕེལ་སླད་རིས་མེད་ཆོས་བརྒྱུད་སྲ་བརྟན་ཚུགས་པའི་རྨང་གཞི་གཏིང་།། བདེན་མཐའ་གསལ་བའི་རྨད་བྱུང་ཐབས་ལམ་འཚེ་མེད་ཞི་བའི་རྩ་བ་ཅན།།རྒྱལ་ཕམ་མེད་པར་ཀུན་ལ་འཚམས་པའི་གཉིས་སྨན་དབུ་མའི་ལམ་པོ་ཆེ།།རིང་མོ་ཞིག་ནས་ཐུགས་ལ་དགོངས་བཞིན་དམར་པོའི་ཕྱོགས་སུ་བསྒྲགས་པ་ན།།བདེན་མཐའི་སྐྱ་རེངས་ཤར་དང་ལྷན་ཅིག་ཁྱེད་ཉིད་མཇལ་འདོད་ངུ་དབྱངས་གྱེར།། ཐུབ་པ་མཆོག་དེའི་གདམས་པའི་ཉིང་ཁུ་བྱམས་དང་སྙིང་རྗེའི་རྒྱ་མཚོ་ལས།།ཉེར་ཐོན་འཚེ་བ་མེད་པའི་མཛད་པས་འཇིག་རྟེན་སྐྱེ་དགུའི་ཡིད་འཕྲོག་སྟེ།།མཚན་དང་དོན་མཐུན་འཇིག་རྟེན་ཞི་བདེའི་དེད་དཔོན་ཆེན་པོར་བཀུར་བ་ན།།སྙན་གྲགས་ཚ་ཟེར་ཕྱོགས་བཅུར་འཕྲོས་པས་ནག་ཕྱོགས་སྙིང་ལ་མུན་པ་བབ།། གཞི་ཡི་གནས་ཚུལ་ཇི་ལྟར་ཡིན་ཀྱང་གྲུབ་དོན་གཏན་ལ་འབེབས་པའི་ཚེ།།དེང་རབས་སྐྱེ་བོའི་བློ་དང་འཚམས་པར་ཟབ་མོ་རྟེན་ཅིང་འབྲེལ་འབྱུང་དོན།།རྒྱ་ལས་མི་བརྒལ་འདི་དང་བསྟུན་ཞེས་འཇིག་རྟེན་ཀུན་ཏུ་བསྒྲགས་པའི་མཐུས།།རྟེན་འབྱུང་གཏམ་དེ་རིག་གསར་མཁན་པོའི་གཅེས་ཞིང་ཕངས་པའི་ནོར་དུ་གྱུར།། རང་གི་ཆོས་ལ་ཨ་འཐད་སེམས་ཀྱིས་ཆོས་ལུགས་གཞན་ལ་དམའ་འབེབས་པ།།སྤྱི་སྲོལ་འདྲ་ཡང་དེང་གི་དུས་སུ་སྨྲ་བའི་ཉི་མ་ཁྱེད་ཀྱིས་ནི།།བྱམས་དང་བརྩེ་བ་བཟོད་བསྲན་ལ་སོགས་མཐུན་པའི་བསླབ་བྱ་གཅིག་བསྡུས་ནས།།སྣ་ཚོགས་ཆོས་ཀྱི་གདམས་པའི་ཉིང་ཁུ་འཇིག་རྟེན་ཀུན་ཏུ་གསལ་བར་བསྒྲགས།། ཟབ་མོ་རྟེན་འབྱུང་དེ་ཉིད་ངོ་མཚར་འཕགས་མཆོག་ཀླུ་སྒྲུབ་ལས་འོངས་པ།།དཔལ་ལྡན་ཟླ་བས་བཀྲལ་བ་ཇི་བཞིན་ཉིད་ཀྱིས་ལེགས་པར་དགོངས་པ་གང་།།རིན་ཆེན་སེམས་དང་ཟུང་དུ་འཇུག་པའི་ལམ་བཟང་དམ་པར་ཉིད་གཤེགས་ནས།།ཐུགས་ཀྱི་ཉིང་བཅུད་ཟབ་རྒྱས་བདུད་རྩིས་ལྐལ་ལྡན་ཡིད་ཀྱི་ཤིས་པ་བསྒྲུབས།། གངས་ལྗོངས་བསྟན་སྲིད་ཐུགས་ལ་བརྣགས་པས་གནོད་བྱེད་རྒྱལ་འགོངས་བསྟེན་གསོལ་རྒྱུན།།སྣུབ་པའི་འཕྲིན་ལས་རིམ་གྱིས་མཛད་བཞིན་བོད་འབངས་སྤྱི་ཡིས་བཀའ་བསྒྲུབས་ཀྱང་།།ཅོལ་ཆུང་བསོད་དམན་འབྱུང་པོས་རྒྱུད་བསླད་དམར་པོའི་ནོར་གྱིས་བསླུས་པ་འགས།།ཁུངས་མེད་ཅ་ཅོ་ཕྱོགས་བཅུར་བསྒྲགས་ཀྱང་ཡ་རབས་སུ་ཞིག་ཡིད་རྟོན་བྱེད།། ཐུབ་བསྟན་ཉིན་མོར་བྱེད་པའི་འཕྲིན་ལས་གངས་ཅན་ལྗོངས་སུ་གདལ་བ་ན།།བསྟན་འཛིན་མཁས་གྲུབ་བྱེ་བའི་རོལ་མཚོ་དཔལ་ལྡན་ན་ལནྜ་ཡི་སྲོལ།།བཀའ་བབས་མདོ་྄རྒྱུད་གདམས་པའི་ཞལ་ཆབ་སྐྱོངབའི་གངས་ཅན་ཆོས་བརྒྱུད་རྣམས།།དམ་ཚིག་འོ་ཆུ་གཅིག་ཏུ་འདྲེས་པའི་རྫོགས་ལྡན་བཞིན་རས་གསར་དུ་ངོམས།། མདོར་ན་ཁྱེད་ཀྱི་གསང་གསུམ་མཛད་པར་འགྲན་པའི་ཟླ་ཞིག་འདིར་མཆིས་ན།།དེ་ནི་ཁྱེད་དེ་ཁྱེེད་ཉིད་ལས་གཞན་ཁྱེད་དང་སྐལ་བ་མཉམ་པ་སུ།།དེ་ཕྱིར་བདག་ཅག་བོད་འབངས་རྣམས་ཀྱི་མགོན་དཔུང་དམ་པར་བརྟན་བཞུགས་ནས།།གངས་ཅན་སྐྱེ་འགྲོའི་བསྟན་སྲིད་བདེ་ཐབས་ཐུགས་བཞེད་བཞིན་དུ་ལྷུན་འགྲུབ་ཤོག། བདག་ཅག་ཚེ་རབས་སྐྱེ་བའི་ཕྲེང་བར་མགོན་པོ་ཁྱེད་ཀྱིས་རྗེས་བཟུང་སྟེ།།ངེས་འབྱུང་བྱང་སེམས་ཡང་དག་ལྟ་དང་རིམ་གཉིས་ཟབ་མོའི་རྣལ་འབྱོར་ལམ།།ཐུགས་བཅུད་བདུད་རྩི་བུམ་པ་གང་བྱོར་བདག་ཅག་སྙིང་གི་གཟུངས་སྨིན་ཏེ།།ཇི་སྲིད་འཁོར་བ་མ་སྟོངས་བར་དུ་འགྲོ་བའི་དོན་ལ་སྤྱོད་པར་ཤོག། ཅེས་ ༧རྒྱལ་དབང་སྐུ་ཕྲེང་བཅུ་བཞི་པ་ཆེན་པོའི་གསང་གསུམ་མཛད་འཕྲིན་ལས་བརྩམས་ཏེ་བསྟོད་པ་ཕན་བདེའི་གྲུ་ཆར་འགུག་པའི་དབྱར་རྔ་ཞེས་བྱ་བ་འདི་ནི། འབྲས་སྤུངས་བློ་གསལ་གླིང་རྩེད་ཐང་ཁང་ཚན་གྱི་འདུས་ལས་ནས་བསྐུལ་བ་བཞིན། མགོན་པོ་གང་ཉིད་ཀྱི་ཚིགས་སྔ་ཕྱི་གཉིས་ཀའི་མཁན་བུར་གཏོགས་པའི་སྐལ་བ་ཅན། སྙོམས་ལས་པ་བསྟན་འཛིན་དཔལ་མཆོག་ཏུ་འབོད་པས་ ༢༠༡༡ / ༥ / ༡༥ ཉིན་སྒོ་གསུམ་དང་བ་ཆེན་པོས་རྫོགས་པར་སྦྱར་བའོ།། །། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
Category: བསྟོད་ཚིག
༄། །བླ་མ་དང་འཇམ་དཔལ་དབྱངས་ལ་ཕྱག་འཚལ་ལོ།།
བསྟན་འཛིན་དཔལ་མཆོག རྨོངས་པའི་གདུང་བའི་ཉམ་ཐག་བདག།མཁྱེན་པའི་ཆུ་གཏེར་ཁྱེད་ཉིད་ལས།།རེ་ས་གཞན་ན་མེད་ལགས་པས།།རྗེ་བཙུན་ཐུགས་རྗེས་བདག་ལ་དགོངས།། ༡ ཐོག་མེད་སྙིང་གིི་དཀྱིལ་ཞུགས་པའི།།ཉོན་མོངས་དགྲ་ཚོགས་གཞོམ་པ་ལ།།ཡེ་ཤེས་མཚོན་ཆ་རབ་འབར་བ།།དེ་མེད་བདག་གི་ཇི་ལྟར་བྱ།། ༢སྣང་ཞེན་སྤྲོས་མེད་ཡེ་ཤེས་ཀྱི།།དུས་མཐའི་ཞུགས་ཆེན་འབར་བ་ན།།སྒྲིབ་གཉིས་ལྷུན་པོའི་སྐད་པ་ཡང་།།མིང་གི་ལྷག་མར་བརླག་པར་བྱེད།། ༣ ཆོས་ཀྱི་སྙིང་པོ་རིན་ཆེན་སེམས།།དེ་ཡང་ཤེས་རབ་མཐུ་ལས་ན།།ཤེས་རབ་ནོར་གྱིས་དབུལ་བ་ལ།།གང་ཡང་མ་འབྱོར་ངེས་པ་ཐོབ།། ༤ ཤེས་རབ་མིག་ནི་ལྡོངས་པ་ལ།།ཡིན་ལུགས་ངེས་པ་གང་ལས་རྙེད།།འཁོར་བའི་མུན་ཁུང་ལུས་པ་ཡང་།།ཤེས་རབ་འདྲེན་བྱེད་མེད་པས་ནོངས།། ༥ ཉིན་རེའི་བྱ་སྒོ་ཕྲ་མོ་ཡང་།།རིགས་དང་རིགས་མིན་འབྱེད་དགོས་ན།།གཏན་གྱི་བཙན་ས་ཟིན་པ་ལ།།དེ་མེད་གྲུབ་ཅེས་སྨྱོན་པའི་ཚིག།། ༦ སྙིང་ནས་ཆོས་ཤིག་བྱེད་པ་ན།།དད་པ་ཤེས་རབ་གྲོགས་བཅས་ཀྱིས།།མ་ཡིན་འོལ་ཚོད་བླུན་དད་ཙམ།།ཆོག་མིན་རྣམ་དག་རིགས་པས་གྲུབ།། ༧ དེ་ཕྱིར་སྐྱེ་ཀུན་མགོན་པོ་ཁྱེད།།དགེ་བའི་བཤེས་སུ་རྟག་བྱོན་ནས།།ཀུན་མཁྱེན་རྒྱལ་ས་མ་ཟིན་བར།།མཉེས་བཞིན་རྗེས་སུ་གཟུང་དུ་གསོལ།། ༨ འདོད་གསོལ་དང་བཅས་པའི་ཚིགས་སུ་བཅད་པ་འདི་དག་ཤེས་རབ་ཕྱོགས་མེད་འདོད་པའི་སྙོམས་ལས་པ་ཞིག་གིས་གང་དྲན་ཤར་མར་སྤེལ་བ་དགེའོ།། །། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
རྗེ་བཙུན་མཁྱེན་པའི་གཏེར་ཆེན་ལ་སྨོན་པའི་ཚིག
བསྟན་འཛིན་དཔལ་མཆོག༄། །རྗེ་བཙུན་བླ་མ་རྣམས་དང་དབྱེར་མ་མཆིས་པའི་མགོན་པོ་འཇམ་པའི་དབྱངས་ལ་ཕྱག་འཚལ་ལོ།། རྨོངས་པས་བྲན་དུ་རིང་གནར་བས།། མཁྱེན་གཏེར་ཁྱེད་ལ་སྐྱབས་འཆའ་ན།།་ བདག་གི་གདུང་བ་སྐད་ཅིག་ལ།། བཅོམ་ནས་ཤེས་རབ་སྣང་བ་སྩོལ།། བླ་མ་མཉྫུ་གྷོ་ཥ་ཡི།།སྐྱབས་ཀྱི་དོ་རར་བདག་ཆུད་ནས།།སྐྱེ་ཀུན་མགོན་པོ་འཇམ་དབྱངས་ཉིད།།དགེ་བའི་བཤེས་སུ་བྱོན་པར་ཤོག།དེ་ཚེ་རྣམ་གཡེང་ལེ་ལོ་དག།སྐད་ཅིག་ཙམ་ཡང་མི་སྐྱེ་བར།།ཐོས་བསམ་སྒོམ་པའི་ཤེས་རབ་རྣམས།།ཕྱོགས་མེད་རྒྱུད་ལ་སྐྱེ་བར་ཤོག། དེ་ལྟར་ཤེས་བརྩོན་ཟུང་འབྲེལ་བས།།ས་ལམ་བགྲོད་པ་མཐར་སོན་ནས།།སྐུ་བཞིའི་རྒྱལ་སར་ཕྱིན་ནས་ཀྱང་།།འགྲོ་བའི་དོན་ལ་གཞོལ་བར་ཤོག། རྗེ་བཙུན་མཁྱེན་པའི་གཏེར་ཆེན་ལ་སྨོན་པའི་ཚིགས་སུ་བཅད་པ་འདི་ནི་ཤྲི་མིང་པས་སྨྲས་པའོ།། །། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
བསྟོད་པ་སྒྲ་རྒྱན་ཉི་ཤུ་པ།
འབའ་པ་སངས་རྒྱས་ཚེ་རིང་། ༄༄།།. །། ཟླུམ་ཟླུམ་གོ་ལའི་སྒང་གི་སྐྱེ་བོའི་ཁྲོད།. །ལ་ལ་ཐོབ་དང་གོ་སས་འགྱིང་བ་དང་།. ། མང་མང་དཔལ་དང་འབྱོར་པས་དྲེགས་པས་ཀྱང་། གུས་གུས་ལས་ཀྱིས་གང་ཞབས་གཙུག་ཏུ་བཀུར།། ཞི་དུལ་ཞི་བས་སྐུ་བའི་བཀོད་པ་མཛེས།. །མ་ནོར་མ་འདྲེས་བརྗོད་ལ་དོ་མེད་གསུང་། ། རྒྱ་ཆེར་རྒྱ་མཚོའི་འཇིངས་ལྟར་ཡངས་པའི་ཐུགས།. །ཞི་སྤྱོད་ཞི་བདེའི་སྲོལ་འབྱེད་གངས་ཅན་མགོན།. ། གསལ་གསལ་ཤེལ་དཀར་མེ་ལོང་གཙང་མའི་ངོས།. །མཛེས་མཛེས་བརྙན་རིས་ཇི་ལྟར་བཀྲ་བ་བཞིན།. ། དང་དང་ཡིད་མཁར་གང་གི་གསང་གསུམ་ཀུན།. །ཡང་ཡང་གསལ་བའི་རི་མོ་ཕབ་བྱས་ཏེ། ། འཇམ་འཇམ་འཁྲི་ཤིང་རླུང་གིས་བསྙལ་བ་ལྟར།. །མྱུར་མྱུར་ཡན་ལག་ས་ལ་ཕབ་བཞིན་དུ།. ། དུང་དུང་བློ་ཡིས་བསྟོད་དབྱངས་འདི་སྒྲོག་ན།. །ཀྱེ་ཀྱེ་གངས་རིའི་མགོན་པོ་ཡུད་ཙམ་དགོངས།. ། མང་མང་རྒྱུ་སྐར་ཕྲེང་མཛེས་ཉ་ཟླ་བཞིན།. །བཟང་བཟང་གདུལ་བྱ་ཕོ་མོས་མཐའ་ནས་མཛེས།. །ཟིལ་ཟིལ་དམར་གི་སྔོན་ཆས་དཔའ་བོ་ལྟར།. །དུལ་དུལ་ཞི་བདེའི་རླབས་ཀྱི་ཁ་ལོ་བ།. ། མྱུར་མྱུར་འཛམ་གླིང་གང་བའི་མཛད་བཟང་ལ།. །མཚར་མཚར་ཟླ་བྲལ་བླ་མ་སྤྱན་རས་གཟིགས།. ། ཡང་ཡང་ཡུལ་གྲུ་དུ་མ་ཞབས་བཀོད་ཚེ།. །མང་མང་འགྲོ་ལ་ཞི་བདེའི་གྲུ་ཆར་བསྐྲུན།. ། ལེགས་ལེགས་ལས་ཀྱིས་ལྷག་པར་སྦྲེལ་བ་ཡི།. །དམར་དམར་གདོང་ཅན་བོད་མི་མ་ལུས་པས།. ། མཆོག་མཆོག་ཁྱེད་སྐུ་མིག་ལ་ཤར་བའི་ཚེ།. །ཆེ་ཆེ་དགའ་བའི་དཔེ་ཟླ་རྙེད་པ་མིན།. ། དཀར་དཀར་ཁ་བ་རི་པའི་བསྟན་སྲིད་སླད།. །བསིལ་བསིལ་ཞི་བདེའི་དཔུང་དང་འགྲོགས་པ་ན།. ། ངན་ངན་སྲིད་བྱ་ཀླ་ཀློ་ཀུན་སྐྲག་སྟེ།. །རྩུབ་རྩུབ་ཚིག་གི་ཐན་སྐད་སྒྲོག་ལ་ཐུག. ། དམན་དམན་གཞན་སྨོད་ཆ་ཙམ་མི་མཛད་ཀྱང་།. །འཇིཊ་འཇིཊ་ཀླ་ཀློའི་དཔུང་ཚོགས་སྔངས་བྱེད་པའི།། ལེབ་ལེབ་འཛམ་གླིང་ས་ཆེན་འདི་ཡི་སྟེང་།. །མང་མང་འགྲོ་མགོན་ཁྱེད་ལས་སུ་ཡིས་ཤེས།. ། གསལ་གསལ་འཚེ་བྲལ་རླབས་སྤྱོད་ཉིན་བྱེད་འོད།….
མིག་མི་འཛུམ་གྱི་ཕྱག་གཡས།
འབའ་པ་སངས་རྒྱས་ཚེ་རིང་།༄༄། །བཀའ་བཞིན་སྒྲུབ་ན་ནོར་བའི་སྐྱོན་བྲལ་བས། །ཁྲི་འབུམ་སྐྱེ་བོས་ཁྱེད་ནི་གཙུག་ཏུ་བསྐུར།. ། ཟམ་མི་ཆད་པ་གཞན་དོན་ལྷུར་བླངས་བས།. །གདོང་དམར་བོད་གྱི་མི་ཡི་རིན་པོ་ཆེ།. ། བློ་གྲོས་ཟབ་གསལ་ནམ་མཁའི་དཀྱིལ་འཁོར་ངོས།. །བཟང་སྤྱོད་འོད་སྟོང་དྲ་བས་བསྟར་བྱས་ཏེ། ། བསྟན་སྲིད་དྲི་མེད་པད་དཀར་ཚོམ་བུའི་ཚལ།. །འཛིན་སྐྱོང་བྱེད་པོ་མི་ཡི་ཉི་མ་ཁྱེད།. ། སྔོན་ཚེ་སྔོན་གྱི་བཟང་པོའི་བག་ཆགས་ལས།. །བློ་ཁམས་བློ་ཡི་སྒྲོན་མེ་རབ་གསལ་བས།. ། མི་ཤེས་ཤེས་བྱའི་གནས་ཤིག་མ་དམིགས་ཕྱིར།. །གངས་རི་རི་ཡི་གནས་གྱི་ཀུན་མཁྱེན་ལགས།. ། ཞི་བདེ་བདེ་བས་འཛམ་གླིང་ཁྱབ་པའི་སླད།. །ནང་ཆོས་ཆོས་ཀྱི་ཀྱོ་བ་རྣོ་པོ་ཡིས།. ། མི་མང་མང་གཙོའི་ལམ་དུ་ཁྲིད་མཛད་པ།. །ཁྱེད་ནི་གངས་ཅན་པ་ཡི་དེད་དཔོན་ལགས།. ། ལྷག་བསམ་ལྷད་མེད་ལུས་སྟོབས་ཡོངས་རྫོགས་ཤིང་།. །རབ་བརྗིད་གཞན་ཕན་རླབས་ཀྱི་གཡུ་རལ་དང།. ། ཕུལ་བྱུང་རྣམ་དཔྱོད་རྣོ་བའི་མཆེ་བ་ཅན།. །འཇིགས་མེད་ཁྱེད་ནི་མི་ཡི་སེང་གེ་ལགས།. ། ལྷན་སྐྱེས་ཡོན་ཏན་ཙན་དན་ལྗོན་པ་རུ།. །འབད་པའི་ཡོན་ཏན་ཡལ་ག་རབ་ཏུ་རྒྱས།. ། ཁྲིམས་གཙང་དྲི་ངད་ཀུན་ནས་འཁྱུད་པས་ན།. །ཁྱེད་ནི་གངས་རིའི་མི་ཡི་རྒྱན་གཅིག་ལགས།. ། བདེན་པའི་ངག་གིས་ཕྲེང་བ་སྤེལ་ཙམ་གྱིས།. །གངས་ཅན་བོད་ཀྱི་བསྟན་སྲིད་ནོར་བུའི་ངོས།. ། གནོད་བྱེད་ལོག་སྨྲ་སྐྱེ་བོ་དུ་མ་ཞ྄ིག. །ལྐུགས་པར་བཀོད་ཁྱོད་སྨྲ་བའི་དབང྄་པོ་ལགས།. ། རྒྱལ་དབང་དགོངས་ཟབ་ཐུགས་ཀྱི་དབུས་འཛིན་ཏེ།. །གཞན་ཕན་ཁ་བ་རི་པའི་བསྟན་སྲིད་སླད།. ། ཡོད་རྒུ་སྦྱིན་ནུས་དེང་གི་མཁས་དབང་ཆེ།. །ཁྱེད་ནི་མིག་མི་འཛུམ་གྱི་ཕྱག་གཡས་ལགས།. ། འཁྲུལ་བྲལ་ཐོས་པའི་གཞུང་གི་བརྗོད་བྱའི་ཚུལ།. །ཚུལ་བཞིན་བསམ་པས་སྒྲོ་སྐུར་མཐའ་དང་བྲལ།. ། བྲལ་ཙམ་མ་ལགས྄་སྒོམ་པ་ཕར་མཐར་ཕྱིན།. །ཕྱིན་ཆད་ཁྱོད་ནི་རྒྱལ་བའི་གདུང་འཚོབ་ལགས།. །…