རྗེ་བཙུན་མཁྱེན་པའི་གཏེར་ཆེན་ལ་སྨོན་པའི་ཚིག

བསྟན་འཛིན་དཔལ་མཆོག
༄། །རྗེ་བཙུན་བླ་མ་རྣམས་དང་དབྱེར་མ་མཆིས་པའི་མགོན་པོ་འཇམ་པའི་དབྱངས་ལ་ཕྱག་འཚལ་ལོ།།

བླ་མ་མཉྫུ་གྷོ་ཥ་ཡི།།
སྐྱབས་ཀྱི་དོ་རར་བདག་ཆུད་ནས།།
སྐྱེ་ཀུན་མགོན་པོ་འཇམ་དབྱངས་ཉིད།།
དགེ་བའི་བཤེས་སུ་བྱོན་པར་ཤོག།
དེ་ཚེ་རྣམ་གཡེང་ལེ་ལོ་དག།
སྐད་ཅིག་ཙམ་ཡང་མི་སྐྱེ་བར།།
ཐོས་བསམ་སྒོམ་པའི་ཤེས་རབ་རྣམས།།
ཕྱོགས་མེད་རྒྱུད་ལ་སྐྱེ་བར་ཤོག།

དེ་ལྟར་ཤེས་བརྩོན་ཟུང་འབྲེལ་བས།།
ས་ལམ་བགྲོད་པ་མཐར་སོན་ནས།།
སྐུ་བཞིའི་རྒྱལ་སར་ཕྱིན་ནས་ཀྱང་།།
འགྲོ་བའི་དོན་ལ་གཞོལ་བར་ཤོག།

རྗེ་བཙུན་མཁྱེན་པའི་གཏེར་ཆེན་ལ་སྨོན་པའི་ཚིགས་སུ་བཅད་པ་འདི་ནི་ཤྲི་མིང་པས་སྨྲས་པའོ།། །།