འཇིགས་མེད་ནུབ་པ། དྲ་རྒྱའི་མཐུན་རྐྱེན་ཇེ་ཡག་ཏུ་ཕྱིན་པ་དང་མཉམ་དུ་། མི་རྣམས་ཀྱིས་གློག་འཕྲིན་བརྒྱུད་ཉིན་རེའི་ལས་དོན་མང་པོ་སྒྲུབ་བཞིན་ཡོད་། ད་དུང་། མི་རྣམས་ཀྱིས་གློག་འཕྲིན་བརྒྱུད་གཞན་ལ་འཕྲིན་ཡིག་གཏོང་བ་ཙམ་མ་ཡིན་པར་། འདྲ་པར་དང་ཡིག་ཆ་འདྲ་མིན་སོགས་ཟུར་སྣོན་ (Attachment) བྱས་ནས་ཀྱང་བསྐུར་བཞིན་ཡོད་། འོན་ཀྱང་། གློག་འཕྲིན་བེད་སྤྱོད་གཏོང་མཁན་མང་པོའི་བསམ་པར་། ཟུར་སྣོན་ནི་ཡིག་ཆ་དང་འདྲ་པར་སོགས་བསྐུར་བྱེད་ཀྱི་སྟབས་བདེའི་ཡོ་བྱད་ཅིག་མ་གཏོགས། དེས་སོ་སོའི་གློག་ཀླད་དང་གློག་འཕྲིན་ནང་དུ་དྲ་འབུ་འཁྱེར་ནས་ཡོང་གི་ཡོད་པའི་དོགས་པ་བྱེད་ཀྱི་མེད་ལ། དེའི་སྐོར་གྱི་ཤེས་བྱ་ཡོད་མཁན་ཡང་ཧ་ཅང་ཉུང་ཉུང་ཡིན། ལྷག་པར་དུ་། ཟུར་སྣོན་གྱི་སྐོར་ལ་ཤེས་བྱ་ཉུང་བའི་དབང་གིས། མི་མང་པོའི་གློག་ཀླད་ལ་དྲ་འབུའི་འཇབ་རྒོལ་ཐེབས་ཀྱི་ཡོད་། དོན་དངོས་སུ། ཟུར་སྣོན་བེད་སྤྱོད་གཏོང་བ་ནི། དྲ་འབུ་ཡོང་སའི་སྒོ་ཕྱེས་བ་དང་གཅིག་མཚུངས་ཡིན། ཁྱེད་ལ་སླེབས་པའི་ཟུར་སྣོན་ཅན་གྱི་གློག་འཕྲིན་མང་པོའི་ནང་དུ་དྲ་འབུ་སྐུང་ནས་ཡོད་། དྲ་འབུ་ཁ་ཤས་ནི་མངོན་གསལ་ཅན་དང་ཁ་ཤས་ནི་ལྐོག་ཏུ་ཡིབ་ནས་ཡོད་། གལ་སྲིད་ཁྱེད་ནས་ཟུར་སྣོན་དེའི་རིགས་ཁ་ཕྱེས་བ་ཡིན་ན། སྐད་ཅིག་མ་དེར་དྲ་འབུ་རྣམས་ནད་ཡམས་བཞིན་ཁྱེད་ཀྱི་གློག་ཀླད་ཀྱི་གང་སར་ཁྱབ་པ་མ་ཟད་། དྲ་འབུ་དེ་དག་གིས། ༡ ཁྱེད་ཀྱི་ཡིག་ཆ་དང་སྒེར་གྱི་གནས་ཚུལ་དེ་ཚོ་བརྐུ་གི་རེད་། ༢ ཁྱེད་ཀྱི་གློག་ཀླད་ཀྱི་པར་ཆས་བརྐུས་ནས་ཁྱེད་ལ་ལྐོག་ལྟ་བྱེད་གི་རེད་། ༣ ཁྱེད་ཀྱི་གློག་ཀླད་སྟེང་གི་སྐུད་མེད་ཁ་པར་བརྐུས་ནས་ཁྱེད་ལ་ལྐོག་ཉན་བྱེད་གི་རེད་། ༤ ཁྱེད་ཀྱི་གནས་ཚུལ་བརྐུ་བ་ཙམ་མ་ཡིན་པར་། ཁྱེད་ཀྱི་ངོ་ཤེས་གྲོགས་པོ་དང་ཁྱེད་དང་མཉམ་དུ་གླེང་མོལ་བྱེད་མཁན་དག་གི་གནས་ཚུལ་ཡང་བརྐུ་གི་རེད་། བྱ་སྤྱོད་འདིས་མི་མང་པོའི་བདེ་འཇགས་ལ་དོ་ཕོག་རྒྱ་ཆེར་གཏོང་གི་ཡོད་། འོ་ན། ཟུར་སྣོན་ཡོད་པའི་གློག་འཕྲིན་རིགས་ཚང་མའི་ནང་དུ་དྲ་འབུ་ཡོད་དམ་ཟེར་ན། བརྒྱ་ཆ་དགུ་བཅུའི་ནང་དུ་ཡོད་ཟེར་རྒྱུ་ཡིན། དྲ་འབུ་ཡོད་ཟེར་བའི་གོ་དོན་ནི། ཁྱེད་ཀྱི་གློག་ཀླད་ལ་གཏོར་སྐྱོན་ཆེན་པོ་ཞིག་མ་ཐེབས་ན་དྲ་འབུ་མི་འདུག་སྙམ་པའི་གོ་དོན་དེ་མིན། དཔེར་ན། གོང་དུ་གླེང་བ་བཞིན། གློག་ཀླད་སྟེང་གི་སྐུད་མེད་ཁ་པར་བརྐུས་ནས་ཁྱེད་ལ་ལྐོག་ཉན་བྱེད་པའི་དྲ་འབུའི་རིགས་ནི་མངོན་གསལ་ཅན་མིན། དེར་བརྟེན། དྲ་འབུ་མ་ཡོང་བའི་ལམ་ཁ་ཞིག་བསྟེན་རྒྱུ་ནི་ཕུགས་རྒྱང་རིང་པོའི་བདེ་འཇགས་ལ་འབྲེལ་བ་ཡོད་། བདེ་འཇགས་དེ་ཡོང་བ་ལ་ཟུར་སྣོན་བེད་སྤྱོད་གཏོང་རྒྱུ་མཚམས་འཇོག་པའམ་ཟུར་སྣོན་ལས་ལོགས་སུ་ཐོན་རྒྱུ་ནི་གདམ་ཁ་ཡག་ཤོས་དེ་ཡིན། འདི་ལྟར་བརྗོད་ན། མི་མང་པོའི་སེམས་སུ་ཟུར་སྣོན་མེད་པའི་སེམས་ཁྲལ་དེ་ཡོང་སྲིད་། འོན་ཀྱང་། དེ་སེམས་ཁྲལ་མེད་པའི་སེམས་ཁྲལ་ཞིག་ཡིན། ཁྱེད་ཀྱིས་ཟུར་སྣོན་བེད་སྤྱོད་གཏོང་རྒྱུ་མཚམས་བཞག་རུང་། ཁྱེད་ཀྱིས་ཡིག་ཆ་དང་འདྲ་པར་སོགས་ལས་སླ་བོའི་སྒོ་ནས་བསྐུར་ཐུབ་པའི་དྲ་ཐོག་ཡོ་ཆས་གཞན་པ་ཡོད་པ་མ་ཟད་། དེ་དག་ལ་དྲ་འབུའི་དཀའ་ངལ་མེད་། དཔེར་ན། GoogleDocs དང་ Dropbox གཞན་།…
Author: སྤྱི་ཁྱབ་རྩོམ་སྒྲིག་པས།
གསང་ཚིག་བརྟན་པོ་ཡོད་ན། གློག་འཕྲིན་རྐུན་མར་ཤོར་དཀའ།
འཇིགས་མེད་ནུབ་པ། ད་ལྟའི་སྤྱི་ཚོགས་ནི་བརྡ་འཕྲིན་གྱི་སྤྱི་ཚོགས་ཤིག་ཡིན་། སྤྱི་ཚོགས་འདིའི་ཁྲོད་དུ། མི་སྒེར་བའི་གནས་ཚུལ་དང་གསང་བ་མང་པོ་ཞིག་དྲ་ཐོག་ན་ཡོད་ཅིང་། མི་མང་པོ་ཞིག་གིས་། སྒེར་གྱི་གནས་ཚུལ་དང་གསང་བ་དེ་ཚོ་སོ་སོའི་གློག་འཕྲིན་གྱི་ནང་དུ་ཉར་གི་ཡོད། ད་དུང་། མི་རེ་རེར་དྲ་ཐོག་གི་གློག་འཕྲིན་ཁ་བྱང་རེ་ཡོད་ཅིང་། གློག་འཕྲིན་ཁ་བྱང་རེ་ལ་ཁང་པའི་སྒོ་ལྕགས་ལྟ་བུའི་གསང་ཚིག་རེ་ཡོད་། གལ་སྲིད་ཁྱེད་ཀྱི་གསང་ཚིག་དེ་གཞན་གྱིས་ཤེས་ཚེ་། ཁྱེད་རང་གི་གནས་ཚུལ་ཚང་མ་གཞན་གྱིས་བརྐུ་ཐུབ་པ་མ་ཟད་། ཁྱེད་དང་འབྲེལ་བའི་གྲོགས་པོ་དང་ཉེ་འབྲེལ་སོགས་ཀྱི་གནས་ཚུལ་ཡང་གཞན་གྱིས་བརྐུ་སྲིད་། དེར་བརྟེན། གློག་འཕྲིན་གྱི་གསང་ཚིག་དེ་། བརྟན་པོ་དང་རིང་པོ། མགོ་རྙོག་ཅན་ཞིག་བཟོ་རྒྱུ་ནི། དྲ་ཐོག་གི་རྐུན་མ་འགོག་པའི་ལམ་ཁ་དང་པོ་དེ་ཡིན། ང་ཚོ་སུ་ཡིན་རུང་། སོ་སོའི་གློག་འཕྲིན་ནང་གི་གནས་ཚུལ་དང་གསང་བ་དེ་ཚོ་ཕྱི་མི་ལ་ཤེས་འཇུག་འདོད་མེད་། འོན་ཀྱང་། ང་ཚོས་གནས་ཚུལ་དང་གསང་བ་དེ་ཚོ་དོ་གཟབ་སྒོས་ཉར་གི་མེད་། དོ་གཟབ་སྒོས་ཉར་བ་ལ་གསང་ཚིག་བརྟན་པོ་དགོས། གསང་ཚིག་བརྟན་པོ་ནི་སྒོ་ལྕགས་བརྟན་པོ་དང་མཚུངས། གལ་སྲིད་ཁྱེད་ཀྱི་ཁང་པའི་སྒོ་ལྕགས་བརྟན་པོ་མེད་ན། གཞན་གྱིས་ལས་སླ་བོའི་ངང་ནས་ཁྱེད་ཀྱི་ཁང་པའི་ནང་གི་ཅ་དངོས་རྩ་ཆེན་ཚང་མ་བརྐུ་གི་རེད་། དེར་བརྟེན། གློག་འཕྲིན་གྱི་གསང་ཚིག་ཚོད་དཔག་སླ་བ་དེ་འདྲ་གཏན་ནས་མ་བཟོ། ལྷག་པར་དུ། གསང་ཚིག་གི་ཁོངས་སུ། སོ་སོའི་ནང་མིའི་མིང་ལྟ་བུ་དང་སོ་སོའི་སྐྱེས་ཡུལ་གྱི་མིང་ལྟ་བུ། ཡང་ན་ལོ་རྒྱུས་ཀྱི་དུས་ཚོད་གལ་ཆེན་ལྟ་བུ། ད་དུང་སོ་སོ་སྒེར་དང་འབྲེལ་བའི་ཟླ་ཚེས་གལ་ཆེན་ལྟ་བུ་སོགས་གཏན་ནས་འཇུག་མི་ཉན། རྒྱུ་མཚན། དེའི་རིགས་ནི་དྲ་ཐོག་གི་རྐུན་མས་ལས་སླ་བོའི་ངང་ཚོད་དཔག་བྱེད་ཐུབ། དེར་བརྟེན། གཞན་གྱིས་ཁྱེད་ཀྱི་གསང་ཚིག་ཚོད་དཔག་བྱེད་མི་ཐུབ་པ་དང་རྐུ་མི་ཐུབ་པའི་ཆེད་དུ། གོང་དུ་བཤད་པ་བཞིན། གསང་ཚིག་དེ་རིང་པོ་དང་མགོ་རྙོག་པོ། བརྟན་པོ་བཅས་བཟོས། འོ་ན། གསང་ཚིག་རིང་པོ་དང་མགོ་རྙོག་པོ། བརྟན་པོ་ཇི་ལྟར་བཟོ་དགོས་སམ་ཞེ་ན། གློག་འཕྲིན་གྱི་གསང་ཚིག་བཟོ་དུས། ཐོག་མར་ཚིག་གྲུབ་རིང་པོ་ཞིག་ལ་བསམ་བློ་ཐོངས་། དེ་ནས་ཨང་གྲངས་འགའ་དང་མཚོན་རྟགས་འགའ་བསྣན་ནས་ཚིག་གྲུབ་དེའི་ཁོངས་ཀྱི་མིང་ཚིག་འགའ་བརྗེ་སྤོར་བྱོས། དེའི་རྗེས་སུ། མིང་ཚིག་དང་ཨང་གྲངས། མཚོན་རྟགས་བཅས་ཀྱི་ཡི་གེ་འགོ་མ་དེ་བེད་སྤྱོད་བཏང་ནས་གསང་ཚིག་གསར་བ་ཞིག་བཟོས། དཔེར་ན། གལ་སྲིད་ཚིག་གྲུབ་དེ་དབྱིན་ཡིག་ནང་། Dolma keeps going to Nyamzom…
སྐད་ཡིག་སྲུང་སྐྱོབས།
སེམས་ཤུགས་འཕེལ་བའི་བོད་ནང་གི་གནས་ཚུལ།ཨ མདོའི་ཕྱོགས་སུ་སྐད་ཡིག་སྲུང་སྐྱོབ་ཀྱི་ལས་འགུལ། རྡོ་རྗེ་ཚེ་བརྟན། བོད་རང་བཙན་སློབ་ཕྲུག་ཚོགས་པའི་རྒྱ་གར་སྡེ་ཚན་གྱི་རྒྱལ་ཡོངས་འགན་འཛིན། ཁ་སང་ལྷག་དཀར་ཉིན་མོར་བདག་གི་སེམས་ཐག་ཉེ་བའི་གྲོགས་པོ་བོད་དོན་འཐབ་རྩོད་པ་ཆབ་སྲིད་བཙོན་ཟུར་ལྷ་མོ་སྐྱབས་ལགས་བདག་གི་ཡིག་ཚང་དུ་སླེབས་སོང་ལ། མཚར་སྣང་དང་རེ་སྒུག་གིས་ཁེངས་པའི་ཁོང་གི་རྣམ་རིག་གྲུང་བོ་མཐོང་མ་ཐག་བདག་གིས་ཁོང་ལ་ནམ་རྒྱུན་དང་མི་འདྲ་བའི་གནས་ཚུལ་གསར་བ་ཞིག་ཡོད་པ་ཤེས་ཐུབ།ཁོང་གིས་རང་ཉིད་ཀྱི་མཐེབ་འཇུག་ལས་བདག་ལ་བོིད་ནང་གི་ཡིད་འགུལ་ཐེབས་པའི་ལྷག་དཀར་སྲུང་བརྩི་བྱེད་སྟངས་ཀྱི་རྣམ་པ་དམིགས་གསལ་བ་ཞིག་བསྟན་སོང་། སེམས་ཤུགས་འཕར་བའི་གནས་ཚུལ་དེས་བདག་གི་ལྷག་དཀར་ཉིན་མོ་དེ་ཡང་དམིགས་བསལ་བ་ཞིག་བཟོས་སོང་། ཕྱི་ལོ་༢༠༡༡ལོའི་ཟླ༠༤ཚེས་༡༥ཉིན་ཨ་མདོ་རྨ་ཆུ་རྩྭ་ཐང་གི་བོད་མི་ཁ་ཤས་ཀྱིས་རང་འགུལ་གྱིས་“བོད་ཕ་སྐད་དམ་སྲུང་མཐུན་ཚོགས།”ཞེས་པ་ཞིག་གསར་འཛུགས་བྱས་འདུག་ལ། དུས་དེ་རིང་མཐུན་ཚོགས་དེའི་བྱ་འགུལ་ཁག་བོད་ཤར་ཕྱོགས་ཀྱི་ཁམས་དང་ཨ་མདོ(ཞིང་ཆེན་མཚོ་སྔོན་དང་། ཀན་སུའུ། སི་ཁྲོན་)སོགས་གཙོ་བྱས་པའི་བོད་རིགས་འདུས་སྡོད་ཀྱི་ས་ཁུལ་ཡོངས་ལ་ཁྱབ་ཡོད་འདུག་ལ།་་གནོན་ཤུགས་དང་དཀའ་ངལ་ཡོད་ཚད་གདོང་གིས་བསུས་ནས་ད་དུང་མཐུན་ཚོགས་དེས་མུ་མཐུད་ས་ཁུལ་དེ་དག་ཏུ་སྐད་ཡིག་སྲུང་སྐྱོབ་དང་རྒྱུན་འཛིན་གྱི་ལས་འགུལ་མུ་མཐུད་སྤེལ་བཞིན་ཡོད་འདུག དེར་བརྟེན། ད་ལྟ་དྭངས་བླངས་ལས་འགུལ་བ་དེ་དག་ལ་གཞི་རིམ་བོད་མི་སྤྱི་ཡོངས་ཀྱི་རྒྱབ་སྐྱོར་དང་གུས་བརྩི་བླ་མེད་ཐོབ་བཞིན་ཡོད་འདུག མི་མང་གི་ཉིན་རྒྱུན་གྱི་འཚོ་བའི་ཁྲོད་དུ་བོད་རང་གི་སྐད་ཡིག་བེད་སྤྱོད་གཏོང་བར་སེམས་ཤུགས་སྤེལ་ཆེད་དུ། སྐད་ཡིག་མཐུན་ཚོགས་དེས་སྦྱར་བྱང་དང་ཅ་དངོས་འདྲ་མིན་བཟོས་ནས་དེ་དག་ལ་བོད་སྐད་ཀྱི་མིང་འདོགས་བྱེད་བཞིན་ཡོད་འདུག་ལ། ཁོ་ཚོས་བཟོས་པའི་སྦྱར་བྱང་དེ་དག་མི་མང་འཛོམས་ས་ཆེ་ཁག་དག་སྟེ་ཟ་ཁང་དང་ཚོང་ཁང་།དགོན་པ་ཁག་དང་མི་མང་གི་ཁྲོམ་ར་ཁག་ཏུ་སྦྱར་འགྲེམ་བྱེད་བཞིན་ཡོད་འདུག འདྲ་པར་དག་ལས་ང་ཚོས་གསལ་བོར་མཐོང་བ་ལྟར་མཐུན་ཚོགས་དེས་བོད་ཁུལ་གྱི་ས་ཆ་འདྲ་མིན་དུ་སྐད་ཡིག་སྦྱོང་བརྡར་འཛིན་གྲྭ་བསྡུ་བ་དང་སྐད་ཡིག་གི་ཡིག་རྒྱུགས་རིགས་འདྲ་མིན་བཀོད་སྒྲིག།དེ་བཞིན་བོད་ཀྱི་ས་ཁུལ་འདྲ་མིན་ནས་མཁས་དབང་དང་ཆེད་ལས་མཁས་པ་འདྲ་མིན་གདན་ཞུས་ཀྱིས་བཀའ་སློབ་དང་ལམ་སྟོན་ཡང་དུས་ནས་དུས་སུ་ཞུ་བཞིན་ཡོད་འདུག མཐུན་ཚོགས་དེའི་ཚོགས་གཙོ་ཡང་མང་གཙོའི་བརྒྱུད་ལན་ནས་འོས་འདེམས་བྱེད་བཞིན་ཡོད་འདུག་ལ་ཁོ་ཚོས་བོད་ཀྱི་སྐད་ཡིག་དར་སྤེལ་གཅིག་པུ་ཙམ་མ་ཡིན་པར་བོད་མི་སྤྱི་བོ་གནམ་བསྟན་ཡོངས་ཀྱི་ནང་ཁུལ་དུ་ཕན་ཚུན་ཕུ་ནུ་ལྟ་བུའི་མཐུན་སྒྲིལ་རྡོག་རྩ་གཅིག་སྒྲིལ་ཡོང་བར་ཡང་ཤུགས་སྣོན་ཆེན་པོ་རྒྱག་བཞིན་ཡོད་འདུག དེར་བརྟེན།ལས་འགུལ་དེས་བོད་ཀྱི་དེང་རབས་གཞོན་སྐྱེས་དག་ལ་ཡ་རབས་བཟང་སྤྱོད་སོགས་ཀྱི་ཤུགས་རྐྱེན་ངེས་ཅན་ཐེབས་བཞིན་ཡོད་འདུག ཉིན་དེའི་ཕྱི་དྲོར་བདག་རྡ་སའི་མེག་ལོར་སྲང་ལམ་དུ་སྐྱོད་སྐབས་གདོང་ལ་འཛུམ་གྱིས་ཁེངས་ཤིང་ལུས་ལ་བོད་ཆས་གཙང་མ་མནབས་པའི་བྱིས་པ་དང་། གཞོན་སྐྱེས།དེ་བཞིན་ཁྲོམ་དུ་སྐོར་སྐྱོད་བྱེད་མཁན་སོགས་མཐོང་བས་བདག་གི་སེམས་པ་རེ་བ་དང་སྤོབས་པས་བརྟས་བྱུང་། ཁོ་ཚོ་ཚང་མར་ཡང་ང་དང་འདྲ་བར་རང་ཉིད་བོད་མི་རིགས་སུ་སྐྱེས་བར་སྤོབས་པས་ཁེངས་ནས་འདུག གནས་ཚུལ་འདི་དག་གིས་བདག་ལ་ལྕམ་ཨང་སན་སོས་སྐྱིད་(Aung Sung Suu Kyi)ལགས་ཀྱི་ཕྱག་དེབ་ (གཞོན་ནུ་མ་ དང་རྨ་བྱ།)ཞེས་པའི་ནང་གི་ལེགས་བཤད་“ཁྱོད་ཀྱིས་བདག་གི་རང་དབང་རྐུ་འཁྱེར་བྱེད་ཐུབ་ནའང་ཁྱོད་ཀྱིས་བདག་གི་རེ་བ་ནམ་ཡང་འཁྱེར་མི་ཐུབ་”ཅེས་པའི་བླ་མ་མེད་པའི་ལེགས་བཤད་དེ་དྲན་ཏུ་བཅུག་སོང་། ལྷག་དཀར་ནི་རང་དབང་ལ་བཅོལ་བའི་རེ་བ་ཡིན། གྲོགས་པོ་ལགས།ཁྱེད་ཀྱིས་འདི་ལྟར་བདག་ལ་ལྷག་དཀར་ཉིན་མོ་དམིགས་བསལ་བ་ཞིག་གནང་བར་ཐུགས་རྗེ་ཆེ་ཞུ། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
“མདུད་སྐྱོད་”དུས་དེབ་ཀྱི་སྐྱེས་སྐར།
(མཐོ་རིམ་སློབ་མ་ཁོ་ནའི་བརྩམས་ཆོས།) མདུན་དུ་སྐྱོད། གཅེས་སུ་འོས་པའི་ཕ་ཡུལ་མི་མང་གི་བདེ་སྡུག་ཆེད་དུ།མདུན་དུ་སྐྱོད། ཡིད་དུ་འོང་བའི་རི་ཆུ་གནས་གསུམ་གྱི་མཛེས་སྡུག་ཆེད་དུ། ལྡི་ལིར་མཐོ་སློབ་འགྲིམ་བཞིན་པའི་མཐོ་རིམ་སློབ་མ་ཞིག་ལ་མཚོན་ན་སློབ་སྦྱོང་གི་མི་ཚེའི་འགྲུལ་བཞུད་ཁྲོད་དུ་བོད་དོན་འཐབ་རྩོད་དང་འབྲེལ་བའི་དགའ་སྐྱོ་སྡང་གསུམ་གྱི་གནད་དོན་མང་བོ་ཞིག་དང་གདོང་ཐུག་བྱེད་དགོས་པ་ནི་གཡོལ་དུ་མེད་པའི་གནད་དོན་ཞིག་ཡིན། སྤྱི་ཚོགས་ཀྱི་ཟིང་ཆ་ཆེ་ལ་ཆབ་སྲིད་ཀྱི་འཁྲུག་ཆ་རྒོད་པའི་རྒྱལ་ས་འདིར་ང་ཚོ་བོད་ཀྱི་གནད་དོན་རང་ཉིད་ཀྱི་སྒེར་དོན་བཞིན་རྒྱབ་སྐྱོར་གནང་མཁན་མི་སྒེར་འདྲ་མིན་ལ་ཐུག་མྱོང་ལ། ང་ཚོ་ད་དུང་རྒྱ་གཞུང་གི་རྔ་མར་འཇུས་ནས་བོད་དོན་ལ་ཁ་རྡུང་གཏོང་མཁན་གྱི་མཁས་པ་དང་ཁྱད་ལས་པ་མི་སྣ་འདྲ་མིན་ལ་གདོང་ཐུག་བྱས་མྱོང་ལ། དེ་བཞིན་ང་ཚོ་ཇན་དར་མན་དར་(Jantar Mantar)གྱི་ངོ་རྒོལ་ཁྲོད་ཉེན་རྟོག་པའི་གཅར་རྡུང་འོག་སྨན་ཁང་དུ་ཐེངས་མང་བསྐྱལ་ཅིང་། རྒྱ་ནག་གཞུང་ཚབ་ཁང་ལ་ངོ་རྒོལ་གྱིས་རྒྱ་གར་ཏིས་ཧར་བཙོན་ཁང་དུ་ཡང་ཐེངས་མང་འཇུ་བཟུང་བྱས་མྱོང་། ལྡི་ལིར་མཐོ་སློབ་འགྲིམ་བཞིན་པའི་སློབ་མ་ཞིག་ཡིན་ཚེ་ཕལ་ཆེར་རྒྱ་གར་གྱི་བཙོན་ཁང་གང་རུང་དུ་ཆབ་སྲིད་འཐབ་རྩོད་པའི་མིང་ཐོག་ནས་འཇུ་བཟུང་བྱས་མ་མྱོང་མཁན་ཞིག་མེད་ཟེར་ནའང་ཆོག སྣང་ཚུལ་འདི་དག་གི་མཐོ་རིམ་སློབ་མ་ཞིག་ལ་མཚོན་ན་འཛིན་ཁང་དང་དཔེ་ཆའི་ཕྱི་རོལ་གྱི་འཇིག་རྟེན་ཞིག་ཡིན་ངེས་ལ། གཞུང་ལུགས་ཀྱི་ཕྱི་རོལ་ནས་བསླབས་ཞིང་གཏན་ཚིགས་ཀྱི་ཕ་རོལ་ནས་མྱངས་པའི་གསེར་མདོག་འཚེར་བའི་མི་ཚེའི་དྲན་བྱང་རེ་རེ་ཡིན་ཟེར་ནའང་ཆོག ང་ཚོས་མཛེས་སྡུག་གི་མི་ཚེའི་བརྒྱུད་རིམ་དེ་དག་རྩོམ་རིག་གི་སྨྱུ་གུར་བརྒྱུས་ནས་ཁྱེད་ཅག་གི་མིག་གི་དཔྱིད་ཏུ་བསྟར་ཡོད་ལ། ང་ཚོས་རོ་ཧི་ནི་ས་གནས་གཞོན་ནུ(མཐོ་རིམ་སློབ་མ་ཁོ་ནས་གྲུབ་པའི་གཞོན་ནུའི་ཡན་ལག་ཅིག་ཡིན།)ཚོགས་པའི་ལོ་འཁོར་དུས་དེབ་“མདུན་སྐྱོད”་བརྒྱུད་ནས་སྐྱིད་ལ་སྡུག་པའི་སྐྱབས་བཅོལ་བའི་གླུ་ངག་རེ་རེ་ཁྱེད་ཅག་གི་བག་མར་བཏང་ཡོད་ལ། རྒྱ་བོད་འབྲུག་གསུམ་ནས་འཛོམས་ཞིང་མི་རིགས་ཀྱི་ཤ་ཁྲག་གཅིག་ལ་བརྒྱུས་པའི་གཞོན་སྐྱེས་མི་རབས་གསར་བ་འདིས་གཟེངས་མཐོ་བའི་དཔའ་སྐད་རེ་རེ་གྲོང་ཁྱེར་གྱི་བྲག་ཅ་བརྒྱུད་ནས་ཁྱེད་ཅག་གི་ཐོས་འཛིན་དུ་བསྐུར་ཡོད། དུས་དེབ་འདི་བོད་ཡིག་དང་དབྱིན་ཡིག་གཉིས་ཀྱི་ནང་དུ་དཔར་བསྐྲུན་བྱས་ཡོད་ལ། དོན་གཉེར་ཅན་ཚོས་དཔེ་ཚོང་ཁང་ཁག་དང་ཡང་ན་སྦྲགས་ཐོག་དང་དྲ་ཐོག་གང་རུང་བརྒྱུད་ནས་ཉོས་ནའང་ཆོག འབྲེལ་མཐུད་ཁ་བྱང་། Email: beripalsonam@gmail.comPhone: 9911785756 གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
ཁྱི་རྔོའི་སྨན་སྦྱིན།
དེ་སྔོན་ཁོ་བོས་ཁྱི་མོ་ནད་པ་ཞིག་གིས་ཁྱི་ཕྲུག་འགའ་ཤས་གསོས་ཕྲུག་ཏུ་ཉར་བའི་དངོས་འབྲེལ་གྱི་གནས་སྟངས་དང་འབྲེལ་བའི་རྩོམ་ཡིག་ཁྱར་ཁྱོར་ཞིག་བྲིས་པ་ལས། བྱམས་སེམས་ཅན་གྱི་གྲོགས་པོ་ཀླུ་སྨྱོན་ཧེ་རུ་ཀས་ཁྱི་མོ་དེར་སྨན་བཅོས་དང་ཁྱི་ཕྲུག་དེ་ཚོ་གཙོ་གྱུར་གྱི་དགོན་པའི་གསེབ་གྱི་ཁྱི་དེ་ཚོར་ཕན་རེས་ཨ་སྒོར་༢༠༠ (དེ་དུས་ཧིན་སྒོར་བརྒྱད་སྟོང་ཡན་མན་གཅིག་འདུག) བསྐུར་སོང་། ཁོ་བོས་ཁོང་གི་རེ་འདོད་བཞིན་གྲོགས་པོ་འགའ་ཤས་རོགས་སུ་འབོད་ནས་ཁྱི་མོ་དེར་སྨན་བཅོས་གང་མཚམས་དང་། དེ་བཞིན་ཁྱི་ཕྲུག་དེ་ཚོར་ཤ་གཟན་འོ་མ་སོགས་སྦྱིན་པར་བྱས་པ་ཡིན། ཕྱིས་སུ་ཁྱི་ཕྲུག་རྣམས་རང་མགོ་འཐོན་ཞིང་ཁྱིའི་མ་གཡར་དེ་ཡང་དྲག་བསྐྱེད་བྱུང་མཚམས་ཁོང་ཚོ་ས་གནས་གཞན་དུ་ཕྱིན་ནས་དེ་སྔའི་ས་གནས་དེར་བསྡད་མེད་པར་སོང་། ད་དུང་དངུལ་གང་མཚམས་ལྷག་འདུག་པ་དེ་དག་དགོན་པའི་སང་ལམ་གྱི་ཁྱི་རྔོ་ཅན་དེ་ཚོར་ཕན་ཆེད། རྔོ་སྨན་རིལ་བུ་ཕོན་ཆེ་ཙམ་ཉོས་ནས་ཤ་དང་ལྷན་དུ་སྦྱིན་པར་བྱས། དེ་བཞིན་སྐབས་རེ་ཁྱི་རྨ་ཅན་དེ་འདྲ་མཐོང་དུས་དེའི་ཉེ་འགྲམ་གྱི་མི་དེ་ཚོར་དངུལ་ཏོག་ཙམ་བཞག་པ་སོགས་བྱས་པ་ཡིན། འོན་ཀྱང་ཉེ་ལམ་ཁོ་བོ་གནས་གཞན་དུ་འགྲོ་དགོས་པར་སོང་། འགྲོ་འགྲོན་ཁམས་གཙང་བཟོ་འདོད་བྱུང་བས། ཁྱིའི་ཆེད་དུ་བསྐུར་བའི་དངུལ་དེ་དག་ཁྱི་འབའ་ཞིག་ལ་ཕན་པའི་ཕྱིར་དུ་དངུལ་ལྷག་དེ་དག་གིས་ཁྱིའི་རྔོ་སྨན་བྱུང་རྫས་དང་ཡིག་ཙེ་གང་ཐོབ་(བཅུ་གྲངས་ཡོད།)ཉོས་ནས་བཞག་ཡོད་པས། མོན་གྷོ་གཞིས་ཆགས་ཀྱི་སྦྱིན་བདག་ཅན་གྱི་གཟིམ་ཁྱི་ཕུད་ཉམ་ཆུང་གི་ཁྱི་འཁྱམ་རྔོ་ཅན་དེ་འདྲར་གཟུགས་པོ་བཀྲུ་བ་སོགས་ཀྱི་རོགས་རམ་གནང་བློ་ཡོད་ཚེ། མོན་གྷོ་གཞིས་གྲོང་གསུམ་པའི་བསྟན་པ་བློ་གྲོས་ཚོང་ཁང་ལ་འབྲེལ་བ་གནང་ན། རྔོ་སྨན་གང་ལྷག་དེ་དག་ལས་རིན་མེད་འབུལ་ཡོང་། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།