<<སྡོམ་འཐག་ནི་འབུ་སྲིན་གཞན་དང་མི་འདྲ་བར་རྐང་ལག་བརྒྱད་ཡོད་ལ། འབུ་སྲིན་རྣམས་ཐག་པས་བསྡམས་པ་སོགས་བྱས་ནས་ཟ་བར་བྱེད་ཞིང་༼ཁྲག་གམ་བཅུད་འཇིབ་པ་༽ཡུལ་ལུང་དགའ་ཤེས་སུ་བྱིའུ་ཆུང་ཆུང་དེ་འདྲའང་ཟ་མཁན་ཡོད། བོད་ཀྱི་ཡུལ་ལུང་འགའ་ཤས་སུ་སྡོམ་འཐག་གི་མིང་ལ་རྒྱ་ཀ་ར་དང་། ཡང་ཁ་ཤས་སུ་འདྲེ་ཕོ་བ་ར་ཞེས་ཀྱང་འབོད་ཀྱི་ཡོད།སྡོམ་ཐག་ནི་སྡོམ་གྱི་སྐུད་པ་ཡིན། མིང་གི་རྣམ་གྲངས་ལ། བ་རྒྱ། བ་ཐག སྡོམ་སྐུད། སྡོམ་དྲ།>> སྡོམ་འཐག་ལ་མིག་ག་ཚོད་ཡོད་དམ། <<སྡོམ་འཐག་ཆེན་པོ་དེ་འདྲའི་གློག་བརྙན་གང་མང་འདོན་ཡོད་པ་དེ་ཚོ་འགའ་ཞིག་གི་ནང་སྡོམ་འཐག་གི་མིག་ནི་ཞེད་སྣང་ཚ་པོ་དེ་འདྲ་སྟོན་ཡོད་ནའང་དེ་དག་ནི་ཧོ་ལི་ཝུཌ་ཡི་རྟོག་བཟོ་ཙམ་ལས་དོན་དངོས་དེ་ལྟར་མིན།>> ༡༽ སྡོམ་འཐག་རིགས་འགའ་ཤས་ལ་མིག་དྲུག་དང་བཞི་དང་གཉིས་བྱས་པ་དེ་འདྲ་ཡོད་ཀྱང་སྡོམ་འཐག་ཕལ་མོ་ཆེར་མིག་བརྒྱད་ཡོད་ལ། ཁོང་ཚོའི་མིག་གི་གྲལ་སྒྲིག་སྟངས་ལས་ཚན་རིག་པ་ཚོས་སྡོམ་འཐག་དེ་རིགས་གང་ཡིན་ངོས་འཛིན་པར་ཡང་ཕན་ཐོགས་ཡོང་གི་ཡོད། དེས་ན་ཚན་རིག་མཁན་ཚོས་ཐག་ཉེ་ནས་སྡོམ་འཐག་གི་མིག་ལ་ལྟ་འདོད་ཡོང་ནས་ཐག་ཇི་ཉེ་ནས་ལྟ་བར་གྲ་སྒྲིག་བྱས་པ་རེད། སྤྱིར་བཏང་སྡོམ་འཐག་གི་མགོ་བོའི་སྟེང་མིག་ཁ་ཤས་ཡོད་ནའང་མདུན་དུ་དེ་ལས་མང་བ་ཡོད། དེ་ལྟར་སྡོམ་འཐག་ལ་མིག་དེ་འདྲའི་མང་པོ་ཡོད་ནའང་ཡ་མཚན་པ་ཞིག་ལ་སྤྱིར་བཏང་སྡོམ་འཐག་ལ་མིག་གི་མཐོང་ཤུགས་ཡག་པོ་མེད། ཕལ་ཆེར་ཁོང་ཚོས་གཡས་གཡོན་དུ་འགུལ་བཞིན་པའི་སྣང་མུན་གྱི་དབྱིབས་ཙམ་རིག་གི་ཡོད་པ་ཡིན། སྡོམ་འཐག་གིས་རྔོན་རྒྱག་དུས་མིག་སྐྱོ་བོ་དེ་ལ་ཁྱད་དུ་འཕགས་པའི་གཡོ་འགུལ་ཚོར་ཤེས་དང་ཟས་ཚོར་ཤེས་ཀྱི་ནུས་པས་རོགས་རམ་བྱེད་ཀྱི་ཡོད། སྡོམ་འཐག་གི་མིག་ནི་dragonflyའབུ་བླ་མ་མ་ནིའི་མིག་ནང་བཞིན་མིག་གཅིག་གི་ནང་མཐོང་ངོས་མང་པོ་ཡོད་པ་དེ་འདྲ་མིན་པར་སྤྱིར་བཏང་གི་མིག་མཐོང་ངོས་གཅིག་ཅན་དེ་འདྲ་ཡིན། སྡོམ་འཐག་གི་མིག བླ་མ་མ་ནིའི་མིག ༢༽ དམིགས་བསལ་དཔག་འཆོང་སྡོམ་འཐག་jumping spiderགི་རིགས་ནི་མིག་གིས་ཧ་ཅང་ཡག་པོ་མཐོང་ཐུབ་ཀྱི་ཡོད། ཁོང་ཚོའི་མགོ་བོའི་མདུན་ཕྱོགས་སུ་མིག་ཧ་ཅང་ཆེན་པོ་དེ་འདྲ་ཡོད། དཔག་འཆོང་སྡོམ་འཐག གོང་གི་འདྲ་དཔར་དེར་ཁྱེད་ཀྱི་ལྟས་ཚེ་དོ་སྣང་བྱ་དགོས་ས་གཉིས་ཡོད་པ།༡ མིག་ནག་པོ་ཆེན་པོ་འདི་འདྲའི་གྲལ་ཡོད་པ།༢ དཔར་རྒྱག་མཁན་ལ་ལྟ་བཞིན་ཡོད་པ། དེ་གཉིས་ལ་འབྲེལ་བ་ཆེན་པོ་ཡོད། དཔག་འཆོང་སྡོམ་འཐག་གིས་མིག་ཆེན་པོ་དེ་ཚོས་དངོས་པོ་དཔེ་མང་པོ་མཐོང་ཐུབ་ཀྱི་ཡོད་ལ། དངོས་པོ་གང་ཞིག་འགུལ་བསྐྱོད་བྱས་པ་དང་མིག་དེ་ཚོ་བརྟག་ཞིབ་བྱེད་པར་བེད་སྤྱོད་བྱེད་ཀྱི་ཡོད། དེས་ཁོང་ཚོར་དཔར་རྒྱག་རྒྱུར་དཀའ་ངལ་བཟོ་ཡི་ཡོད། གང་ཡིན་ཟེར་ན། ཁོང་ཚོས་པར་ཆས་ཀྱི་ཤེལ་ཀོ་མཐོང་བ་དང་དེའི་སྟེང་འཆོང་སྡོད་ཀྱི་ཡོད། ཁོང་ཚོར་དཔར་ཞིག་རྒྱབ་པའི་རྗེས་སོ་སོའི་གདོང་པའམ་པར་ཆས་གང་རུང་གི་སྟེང་སྡོམ་འཐག་དེ་འཆོང་ཚར་བ་རེད། སྡོམ་འཐག་དེ་རྒྱུན་ལྡན་ཞིག་མིན་པར་སྟོན་ཆེད་གཤམ་དུ་དཔག་འཆོང་སྡོམ་འཐག་གཞན་པ་ཞིག་གི་དཔར་བཀོད་ཡོད། སྡོམ་འཐག་དེར་མདུན་དུ་མིག་ཆེན་པོ་དེ་འདྲ་མཐོང་རྒྱུ་ཡོད་ལ། ད་ལན་སྟེང་ནས་དཔར་བཏབ་པས་སྡོམ་འཐག་དེར་མདུན་གྱི་མིག་བཞི་ཙམ་དུ་མ་ཟད་པ་ཤེས་ཐུབ་པ་ཡིན། མིག་རྣམས་བདེ་བླག་མཐོང་ཆེད་འདྲ་གཟུགས་ཀྱི་རི་མོ་བཅས། ༣༽ མཇུག་ཏུ་སྡོམ་འཐག་ལ་མིང་གསར་པ་ཞིག་བཏགས་པ། སྡོམ་འཐག་གི་མིང་གི་རྣམ་གྲངས། ལྟེ་བལ་ཅན། འཐག་མཁན། དྲ་བ་ཅན། སྤྲེའུ་འདྲ། བལ་ཅན། འབུ་སྡོམ། རྒྱ་ཀ་ར། འདྲེ་ཕོ་བ་ར་སོགས་སྔར་ནས་ཡོད་ལ་དེ་དག་སྟེང་། ད་ལན་ཁོ་བོས་མིང་གསར་པ་ཞིག་བཏགས་འདོད་པ་ནི་<<མིག་བརྒྱད་པ་>>ཞེས་པ་དེ་ཡིན། ཡང་རྐང་མིག་བརྒྱད་པ་ཞེས་ཀྱང་བཏགས་ཆོག གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
Author: སྤྱི་ཁྱབ་རྩོམ་སྒྲིག་པས།
འགྲུལ་བཞུད་ཐེངས་གཅིག་གི་གླེང་མོལ། (༢༠༡༠ལོའི་ལོ་གསར་ཚེས་གཅིག་ཉིན་མོར་བྲིས།)
བསེ་རུ། ང་རང་ལས་དོན་ཞིག་གི་རྐྱེན་པས་ལྡི་ལིར་འགྲོ་དགོས་བྱུང་བའི་ཕྱི་དྲོ་དེར་སྤྱི་སྤྱོད་རླངས་འཁོར་དུ་ཞུགས་ཏེ། རང་ཉིད་འདུག་སྟེགས་འཚོལ་སྐབས། ངའི་སྡོད་སའི་མདུན་ངོས་སུ་བུད་མེད་སྐྲ་དེ་ཙམ་རིང་པོ་མེད་པའི་གཞོན་ཤ་ཅན་ཞིག་མཐོང་བྱུང་། ངས་ཁོང་ཕྱི་སོག་གི་བུད་མེད་ཅིག་རེད་བསམས་ཏེ་ངས་དེ་ཙམ་དོ་སྣང་བྱས་མེད། དེ་ནས་རླངས་འཁོར་ཐོན་གྲབས་བྱེད་སྐབས། བུད་མེད་དེ་ངའི་འགྲམ་དུ་རྐུབ་སྟེགས་སྟོང་པ་ཞིག་ཡོད་སྟབས་དེར་སྣང་མེད་ངང་བསྡད་སོང་། ཏོག་ཙམ་སྒུག་རྗེས་ངས་དབྱིན་སྐད་ཐོག་ནས་ཁྱེད་རང་གང་ནས་ཡོང་བ་ཡིན་ནམ་ཞེས་དྲིས། ཁོང་གིས་ང་རྒྱ་ནག་ནས་ཡོང་བ་ཡིན་ཞེས་བཤད་མ་ཐག་ངས་འཛུམ་མདངས་དང་བཅས། ཁྱེད་རང་རྒྱ་སྐད་ཤེས་ཀྱི་ཡོད་པ་མ་རེད་དམ་ཞེས་བཤད། ཁོང་གིས་ཡིན་དང་ཡིན་ཞེས་བཤད་བྱུང་། ངས་ཀྱང་དབྱིན་སྐད་དེ་ཙམ་ཤེས་ཀྱི་མེད་སྟབས། སྟབས་ལེགས་པ་ལ་ཨང་སྙམ་བྱུང་། ངས་ཀྱང་རྒྱ་སྐད་ཀྱི་ཐོག་ནས་ཁོང་ལ་འཚམས་འདྲི་བྱས་ཏེ་གཤམ་གྱི་གླེང་མོལ་ཡོད་ཚད་རྒྱ་སྐད་ཀྱི་ཐོག་ནས་བྱས་པ་ཡིན། ངས་ཁོང་ལ། ཁྱེད་རང་རྒྱ་ནག་ས་ཆ་གང་ནས་ཡིན་ནམ་ཞེས་དྲིས་པས། ཁོང་གིས་ང་རྒྱ་ནག་ཧུའུ་ནན་ནས་ཡིན། རྡོ་རྗེ་གདན་དང་ཝ་ར་ཎ་སི་སོགས་སུ་གནས་མཇལ་དུ་ཕྱིན་པ་ཡིན་ལ་༸གོང་ས་མཆོག་གི་དྲུང་ནས་གསུང་ཆོས་དང་རྒྱ་ནག་ནས་ཡོང་མཁན་རྒྱ་མི་སུམ་ཅུ་ལྷག་ཙམ་འདུག་སྟབས། ང་ཚོར་དམིགས་བསལ་མཇལ་ཁ་དང་བཀའ་སློབ་ཀྱང་གནང་བྱུང་ཟེར། སྐད་ཆ་ཤོད་མཚམས་འདིར་སླེབས་སྐབས་ངས་གཞི་ནས་ཁོ་མོའི་མིང་ལ་ཅི་ཟེར་ཞེས་དྲིས་ཤིང་ངའི་མིང་ཡང་ཁོ་མོར་བཤད། མིང་ལམ་སེང་འདྲི་བའི་ལུགས་སྲོལ་མེད་པ་འདི་ང་བསེ་རུའི་ཁྱད་ཆོས་ཤིག་ཡིན་སྲིད་ལ་བསེ་རུའི་རིགས་རྒྱུད་དེའི་ཁྱད་ཆོས་ཤིག་ཀྱང་ཡིན་སྲིད། ངས་ཁྱེད་ཀྱིས་༸གོང་ས་མཆོག་གི་བཀའ་སློབ་ཆ་ཚང་གོ་བྱུང་ངམ་ཟེར་སྐབས། བརྒྱ་ཆ་བརྒྱ་ཐམ་པ་སྐད་སྒྱུར་ལ་བརྟེན་དགོས་སྟབས། ཆ་ཚང་བ་གོ་གི་མི་འདུག གང་ཡིན་ཟེར་ན། བོད་པ་ཚོ་གད་མོ་དགོད་པའི་གནས་ཚུལ་དེ་འདྲ་ཡོང་སྐབས་ང་ཚོར་གད་མོ་དགོད་རྒྱུ་མེད་པ་དེ་འདྲ་ཡང་བྱུང་སོང་ཟེར། ཡང་ངས་རྒྱ་ནག་ནས་ཁྱེད་རང་གཅིག་པུར་རྒྱ་གར་དུ་ཇི་ལྟར་ཡོང་བ་ཡིན་ནམ་ཞེས་དྲིས་སྐབས།ངའི་ཐོངས་མཆན་ལག་ཁྱེར་ལ་བརྟེན་ནས་བལ་ཡུལ་དུ་ཡོང་། བལ་ཡུལ་ནས་རྒྱ་གར་དུ་ཚུར་འཛུལ་ཡོང་བ་ཡིན་ཟེར། ངས་བར་བར་དུ་མོ་རང་སྒེར་གྱི་སློབ་སྦྱོང་བརྒྱུད་རིམ་དང་རང་ཉིད་བོད་ནང་དུ་འཚར་ལོངས་བྱས་ཏེ་སློབ་གྲྭ་འགྲིམ་ཚུལ་སོགས་ཀྱང་བཤད་པ་ཡིན། ཞིབ་ཕྲ་འདིར་དགོས་ཕན་མེད་སྟབས་བྲིས་མེད། ཡང་ངས་ཁོང་ལ་༸གོང་ས་མཆོག་གི་བཀའ་སློབ་སྒྲ་འཇུག་སོགས་བྱས་ཡོད་དམ་མེད་ཅེས་དྲིས་སྐབས། ཁོང་གིས། དེ་འདྲའི་རིགས་རྩ་བ་ནས་བྱས་མེད། དེ་ནི་ཉེན་ཁ་ཆེ་བའི་ལས་ཀ་ཞིག་རེད། འོན་ཀྱང་ངས་གནས་ཚུལ་གལ་ཆེན་རིགས་རྣམས་ཟིན་བྲིས་སུ་བཏབ་ཡོད་ཟེར། ཡིན་ན་ཡང་ཟིན་བྲིས་ནང་དུ་༸གོང་ས་མཆོག་གི་མཚན་གྱི་ཟུར་ཙམ་ཡང་བྲིས་མེད་ཟེར། དེ་ལྟར་ངའི་རྣ་ལམ་དུ་ཐོས་སྐབས། ཁྱེད་རང་རྒྱ་ནག་ཏུ་སྡོད་སྐབས་༸གོང་ས་མཆོག་གི་མཚན་ཐོས་མྱོང་ངམ་ཞེས་དྲིས་པས། མོས་ཏཱ་ལའི་ཞེས་པ་མ་གཏོགས། ཏཱ་ལའི་བླ་མ་ཞེས་གོ་མྱོང་ཐོས་མྱོང་མེད་ཟེར། གང་ཡིན་ཟེར་ན། རྒྱ་ནག་གཞུང་ཕྱོགས་ཀྱི་ཆབ་སྲིད་ཀྱི་དགོས་མཁོའི་དབང་གིས་ཏཱ་ལའི་མ་གཏོགས། ཏཱ་ལའི་བླ་མ་ཞེས་ནམ་ཡང་བེད་སྤྱོད་གཏོང་གིན་མེད་ལ། མི་མང་ཚོའི་ཁྲོད་ཏཱ་ལའི་ཞེས་ཁ་ནས་ཀྱང་འབོད་ནུས་མཁན་མེད་པ་ལྟ་བུ་རེད་ཟེར། དེ་ནས་ངས་རྒྱ་ནག་གི་གསར་འགྱུར་ནང་དུ་དེང་སྐབས་བེད་སྤྱོད་གཏོང་དང་གཏོང་མུས་ཀྱི་༸གོང་ས་མཆོག་གི་མཚན་ལའང་མནོ་བསམ་སླར་ཡང་གཏོང་དགོས་བྱུང་། ངས་དེ་རྗེས་བོད་ནང་གི་གནས་ཚུལ་སྐོར་དྲིས་པ་ཡིན། ཁྱེད་རང་བོད་ནང་དུ་ས་ཆ་ག་པར་ག་པར་འགྲོ་མྱོང་ཡོད་དམ་ཞེས་དྲིས་པས། མོས་ཨ་མདོ་དང་ཁམས་དབུས་གཙང་གི་ས་ཆ་ལྷ་ས་སོགས་ལ་ཐེངས་ཁ་ཤས་འགྲོ་མྱོང་ཡོད། འོན་ཀྱང་དེ་ཚོ་ཉིན་གྲངས་མང་པོ་མ་རེད་ཟེར། ལྷག་པར་ལྷ་སར་ཡོང་སྐབས་ལྕགས་ལམ་གསར་པ་དེ་བརྒྱུད་དེ་ཡོང་བ་ཡིན། རྒྱ་ནག་ནས་ཡོང་མཁན་ཚང་མར་མེ་འཁོར་ནང་ཡོང་སྐབས་དཀའ་ངལ་ཆེ་ཤོས་དེ་ནི་ཐང་གུ་ལ་ཞེས་པའི་ལ་དེ་བརྒལ་སྐབས་དཀའ་ངལ་ཆེ་ཤོས་རེད། ལྕགས་ལམ་བརྒྱུད་ཀྱི་མཐོ་སྒང་གི་ས་བབ་མཐོ་ཤོས་རེད་ལ་ཕལ་ཆེར་མཐོ་ཚད་རྨིད་ལྔ་སྟོང་ལྷག་ཡོད་ཟེར། ངས་ལྷ་སར་ཐེངས་དང་པོ་ཡོང་སྐབས་གནས་སྐོར་ལ་དེ་ཙམ་འགྲོ་ཐུབ་མ་སོང་། པོ་ཏ་ལ་དང་གཙུག་ལག་ཁང་སོགས་དགོན་པ་ཁག་ཕྱི་ནས་བལྟས་པ་ཙམ་ལས་མཇལ་རྒྱུ་རག་མ་བྱུང་ཟེར། ཐེངས་གཉིས་པ་ཡོང་སྐབས་དེ་དག་ལ་མཆོད་མཇལ་དུ་ཕྱིན་པ་ཡིན།…
ལོ་གསར་ལ་བྲིས་པའི་སྙན་ཚིག ༼བཀྲ་ཤིས་བདེ་ལེགས།༽
རབ་ཡངས་གཤོག་ཟུང་མཁའ་རུ་བརྐྱངས་ནས་ངང་པ་ཁྱོ་ཤུག་བགྲོད་པའི་ཤུལ།།ཉི་མ་དམར་པོའི་བཞིན་གྱི་དཀྱིལ་འཁོར་སྐྱོ་ཉམས་དུ་མས་ཁེངས་ནས་ནི།།རྩེ་ཤིང་ནགས་ཀྱི་མགོ་སྤུ་ཟེང་བའི་རི་བོ་ཕ་གིའི་རྒྱབ་ཕྱོགས་སུ།།མི་འདོད་ལས་ཀྱི་རླུང་བུས་དེད་དེ་ལོ་འདིའི་གྱེས་མཇལ་ཐ་མ་ཡིན།། སྨག་རུམ་ཁྲོད་དུ་འོད་མདངས་ཉམས་མེད་ཆེམ་ཆེམ་སྐར་མའི་ཚོགས་འཁོར་འདི།།མི་རིགས་ཆེད་དུ་ཟུངས་ཁྲག་ཟད་པའི་རྒྱལ་གཅེས་དཔའ་བོའི་རྣམ་ཤེས་འདྲ།།ས་ཡ་དྲུག་གི་བདེན་དོན་རྩོད་པའི་མི་ཕམ་ལྕགས་ཀྱི་སྟག་རྒོད་དེས།།བདེ་སྐྱིད་རང་དབང་སླར་གསོ་བྱེད་པར་སྨོན་སྨོན་བྱེད་སྙམ་འཕྱང་མོ་ཉུག། ཁུ་སིམ་ལོ་མཐའི་མཚན་མོ་འདི་ལ་དབུགས་ཀྱི་རྒྱུ་བའི་བར་མཚམས་ན།།རེ་སྨོན་ལྟོགས་པའི་སྟག་གིས་འདྲེད་པས་སྙིང་གི་འཕར་ལྡིང་ཇི་ཆེ་རེད།།གཡོ་རྫུན་བཙན་ཤེད་འཕར་སྤྱང་དེ་ཚོ་རིང་སར་སྐྲོད་པའི་ཡིད་ཆེས་དང་།།རྒྱལ་བའི་གསེར་ཁྲི་གངས་རྩེར་སྟེགས་པའི་རེ་འདུན་དེ་ཡིས་སྙིང་རུས་བཙུགས།། སང་གི་ཐོ་རངས་སྐད་ཆེན་ཤར་ནས་སྐྱ་རེངས་དང་པོ་ཟིན་པ་ན།།ལྕགས་སྟག་ངར་མའི་ལོ་ལ་ཆིབས་ནས་བོད་ཀྱི་རྩ་དོན་རྩོད་དུ་འགྲོ།རིང་མིན་བློ་ལྡན་རི་བོང་སླེབས་དུས་གངས་ཅན་བོད་ཀྱི་ཞིང་ཁམས་སུ།།གཞིས་བྱེས་མཉམ་འཛོམ་ཉི་གཞོན་འོག་ན་སྤྲོ་སྐྱིད་ངང་ནས་ལོ་གསར་ཆོག། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
རྣམ་དབྱེ་གཉིས་པ་དང་བཞི་པའི་ཁྱད་པར་ལ་དཔྱད་པ།
གཡུ་འབྲུག་སྔོན་མོ། བོད་ཀྱི་སུམ་རྟགས་འགྲེལ་པ་སྨྲ་བ་པོ་ཚོས་རྣམ་དབྱེ་གཉིས་པ་དངག་བཞི་པའི་ཁྱད་པར་ལ་བྱ་ཡུལ་དང་འབྲེལ་བའི་ལས་ལ་ཕན་ཐོགས་པ་དང་མི་ཐོགས་པ་ཟེར་ཞིང་དང་པོ་བཞི་པ་དང་གཉིས་པ་རྣམ་དབྱེ་གཉིས་པ་རེད་ཟེར། དེ་བཞིན་དཔེར་བརྗོད་ཀྱང་ཤར་ཕྱོགས་སུ་འགྲོ་ལྟ་བུ་གཉིས་པ་དང་ནད་པ་ལ་སྨན་སྦྱིན་ལྟ་བུ་བཞི་པ་ཟེར། ཡང་ཁ་ཤས་ཀྱིས་རྣམ་དབྱེ་གཉིས་པ་དང་བཞི་པ་ལ་ཁྱད་ཆོས་ལྔ་ཚང་དགོས་པར་འདོད་ཅིང་རྣམ་དབྱེ་གཉིས་པ་དང་བཞི་པ་མཚུངས་པར་སྤྱིར་བྱ་ཡུལ་ཡོད་པ། བྱ་བ་ཡོད་པ། བྱ་ཡུལ་དང་བྱ་བ་གཉིས་ཐ་དད་པ། སུ་ལ་སོགས་པ་ལ་དོན་གྱི་རྐྱེན་བདུན་པོ་གང་རུང་ཐོབ་པ། དེའི་སྟེང་བྱ་ཡུལ་དང་དེ་དང་འབྲེལ་བའི་ལས་ལ་ཕན་མི་ཐོགས་པ་ནི་གཉིས་པ་དང་། ཕན་ཐོགས་པ་ནི་བཞི་པ་ཟེར་རོ།།དེ་ལ་དཔྱད་པ་ནི་ དང་པ་ལྟར་ན་ཤར་ཕྱོགས་སུ་འགྲོ་ཞེས་པ་ཡང་རྣམ་དབྱེ་བཞི་པར་གྱུར་ཏེ། ཤར་ཕྱོགས་སུ་འགྲོ་བས་འགྲོ་བར་བྱེད་པོའི་གང་ཟག་ལ་ཕན་ཐོགས་པའི་ཕྱིར་ཏེ་ཤར་ཕྱོགས་སུ་འགྲོ་བའི་དགོས་པ་གྲུབ་པའི་ཕྱིར་རོ།། གལ་ཏེ་ཕན་མི་ཐོགས་པའི་དབང་དུ་བྱས་སོ་ཞེ་ན་འོ་ན་དགོས་དོན་གང་ཡང་མེད་པར་ཤར་ཕྱོགས་སུ་འགྲོ་ཞེས་བརྗོད་དགོས་པར་འགྱུར་རོ།།གཉིས་པ་ལྟར་ན་དེ་ནི་ཤེས་པ་རྣལ་དུ་མ་གནས་པའི་སྐྱོན་ཏེ་ཇི་ལྟར་ན། སུམ་ཅུ་པའི་འགྲེལ་པ་མ་བཤད་གོང་དུ་ཐུ་མིས་ཡི་གེ་བརྩམས་ཚུལ་བརྗོད་པའི་སྐབས་ཐུ་མི་རྒྱ་སྐད་ལ་མེད་ཅིང་བོད་སྐད་ལ་ཡོད་པའི་ཡི་གེ་གསར་པ་དྲུག་བཟོ་མ་ཐུབ་པར་ཡིད་མུག་ནས་བཞུགས་དུས་མི་ཞིག་འོངས་པ་ལ་ཐུ་མིས་གང་ནས་ཡོངས་དྲིས་པས་ཞང་ཞུང་ནས་འོངས། གང་དུ་འགྲོ་ཞེས་པས་ཟ་ཧོར་དུ་འགྲོ། དོན་གང་གི་ཕྱིར་འགྲོ་ཞེས་པས་ཇ་ཉོ་རུ་འགྲོ་སོགས་བརྗོད་ཚུལ་བཀོད་པའི་ཇ་ཉོ་རུ་འགྲོ་ཞེས་པ་དེ་ལ་དོན་གྱི་དཔེར་བརྗོད་ཡིན་པར་མི་འདོད་དམ་ཅི། མ་འདོད་ན་ལ་དོན་གྱི་ཕྲད་ཡོད་པས་མི་འཐད་ལ་འདོད་ན་ནི་རྣམ་དབྱེ་གཉིས་བཞི་ཚེ་སྐབས་རྟེངནས་གདམས་ངག་སོགས་གང་ཡང་མིན་པས་མི་འཐད་དོ།། གཞན་ནི་རྟོགས་སླ་ལ་རྣམ་དབྱེ་གཉིས་བཞི་མ་ཡིན་ཏེ་ཁྱད་ཆོས་ལྔ་མ་ཚང་བའི་ཕྱིར་ཏེ་དེར་བྱ་ཡུལ་མེད་པའི་ཕྱིར་རོ།།ཡང་ཁ་ཅིག་གིས་བྱ་ཡུལ་ལ་ཕན་ཐོགས་པ་བཞི་པ་ཟེར་ཞིང་དཔེར་བརྗོད་དུ་ཀ་བ་མཛེས་པའི་ཕྱིར་དུ་ཚོན་བྱུགས་ཞེས་དགོས་ཆེད་གསལ་བྱེད་ཀྱི་སྒྲ་སྦྱོར་བར་མཛད་དོ།། འོ་ན་བཀྲ་ཤིས་གསོད་པའི་ཕྱིར་དུ་དུག་བླུད་ཅེས་པ་ཡང་རྣམ་དབྱེ་བཞི་པར་ཐལ་ཏེ་དགོས་ཆེད་གསལ་བྱེད་ཀྱི་སྒྲ་སྦྱར་བའི་ཕྱིར། འདོད་ན་མི་རིགས་ཏེ་བྱ་ཡུལ་ལ་ཕན་མི་ཐོགས་པའི་པྱིར་ཏེ་གནོད་པའི་ཕྱིར་རོ།།དེས་ན་གང་དུ་འགྲོ་ཞེས་པ་ན་ཟ་ཧོར་དུ་ཞེས་པ་ལྟ་བུ་གཉིས་པ་དང་ཅི་ཕྱིར་འགྲོ་ཞེས་པས་ཇ་ཉོ་རུ་འགྲོ་ཞེས་པ་ལྟ་བུ་བཞི་པར་འདོད་ན་ལེགས་ཆ་མི་ཆེའམ་སྙམ་པ་ནི་ཁོ་བོའི་ཀུན་རྟོག་ལགས་པས་དྲ་གྲོགས་རྣམས་ཀྱིས་དཔྱད་འཚལ་ཞུ། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
གོ་བ་ཨེ་བྱུང་། གངས་ཅན་པ།
ཨ་འདུས་མིག་ཆུ།ས་ཆེན་འདི་ཡི་ཕང་བར་གནས་པ་པ་ཡི།།མི་རིགས་སུ་ལ་མེད་ཐབས་མེད་པ་ནི།།སླད་མེད་དྭངས་གཙང་མ་སྐད་རིན་པོ་ཆེ།།ཡིན་པའི་གོ་བ་ཨེ་ཤེས་གངས་ཅན་པ།། རིན་ཆེན་གསེར་ཞེས་རིན་ཐང་ཆེ་ན་ཡང་།།གཞལ་མེད་ངོ་མཚར་གཏེར་གྱུར་རང་སྐད་དེ།ས་ཆེན་འདི་བའི་རྒྱན་དུ་བ་ཡི།།ཚེ་སྲོག་ཡིན་པ་ཨེ་ཤེས་གངས་ཅན་པ།། འདི་ཕྱི་བདེ་བའི་འབྱུང་བའི་གནས་ཀྱི་མཆོག།འཚེ་མེད་ཞི་བདེ་རྟེན་འབྱུང་སྟོན་པའི་གཞུང་།།སྡེ་སྣོད་གསུམ་སོགས་མ་ཚང་མ་ལུས་པ།།སྐད་འདིར་ཡོད་པ་ཨེ་ཤེས་གངས་ཅན་པ།། རང་སྐད་རང་ཡིག་མེད་པའི་མི་རིགས་དེ།།སྲོག་གི་དབང་པོ་རྣམ་པར་ཤེས་པ་གང་།།མེད་པའི་རྡུལ་འདུས་བེམ་གཟུགས་ཕུང་པོ་རུ།།གྲུབ་པའི་གནས་ལུགས་ཨེ་ཤེས་གངས་ཅན་པ།། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།