Category: རིགས་བཀར་མེད།

ཤར་ཕྱོགས་འོད་སྣང་། ཀ་མད་སུམ་ཅུའི་ཡིག་འབྲུ་རེ་ལ་སྙིང་གཏམ་དྲོན་མོའི་གསང་ཚིག་བསྟིམས།།ཁ་བཤད་ཚིག་གི་རྒྱབ་ལྗོངས་རེ་ལ་གཟུགས་མེད་སེམས་ཀྱི་ཚོར་བ་གསལ།།ག་ཤེད་ཡུལ་ན་ངེས་མེད་འཁྱམས་པའི་ཁེར་རྐྱང་ལྡོམ་བུའི་ཆིག་ལབ་འདི།།ང་ཡི་སྙིང་གི་གྲོགས་མཆོག་དམ་པ་རྒྱུན་དུ་དྲན་པའི་ཉིན་ཐོ་ཞིག།ཅ་ཅོའི་ཀུ་རེས་ལབ་གླེང་བྱེད་བཞིན་ལོ་གྲངས་བཅོ་ལྔའི་དུས་ཡུན་དེ།།ཆ་མེད་ངང་དུ་ཡུད་ཀྱིས་འདས་སྐབས་ཉིན་ཞག་འགའ་ཡི་ཚོར་སྣང་འོག།ཇ་ཡུན་ཙམ་ལའང་འབྲལ་བར་མི་ཕོད་ལྷན་ཅིག་འགྲོགས་ཚུལ་དྲན་ཐེངས་རེར།།ཉ་མོ་མཚོ་དང་བྲལ་བ་བཞིན་དུ་ད་དུང་སེམས་གཏིང་སྡུག་གིས་མནར།། ཏ་ལའི་རྒྱལ་པོའི་ཡུལ་གྲུ་འགྲིམས་པའི་ཁེར་རྐྱང་ལྡོམ་པོའི་མི་ཚེ་འདིར།།ཐ་དད་གྱེས་པའི་གསོན་བྲལ་དུ:ཁས་ཉེས་མེད་གཙེས་པའི་སྡུག་སྐད་ཁྲོད།།ད་དུང་ཁྱེད་ཀྱི་ཡིད་འཕྲོག་བཞིན་རས་མིག་ངོར་འཆར་བའི་འཁྲུལ་སྣང་ལྷན།།ན་ཚོད་ཡོལ་བའི་མི་རྒན་ཇི་བཞིན་གཞོན་ནུའི་རང་མདངས་འཇའ་ལྟར་ཡལ།། པ་ཏྲའི་རིས་ལྟར་སེམས་ཀྱི་མདུད་པ་ཕན་ཚུལ་དམ་དུ་སྦྲེལ་ལགས་ཀྱང༌།།ཕ་རོལ་ཡུལ་དུ་མི་ཞུད་དབང་མེད་ལས་དབང་བཙན་པའི་རང་བཞིན་དེས།།བ་ལང་འཚེ་ཡིས་བ་ཁྱུ་བཏོར་བཞིན་ཕན་ཚུལ་བཀྲལ་བའི་ལོ་ཟླའི་ཡུན།།མ་ཐོགས་རིང་མོའི་དུས་ཡུན་ཞིག་དང་ཁྱད་པར་སྤུ་ཙམ་ངས་མ་མཐོང༌།། ཙ་རེ་བ་ཡི་སེམས་སྡུག་དྲག་པོས་ཡུན་རིང་མནར་བའི་གོམས་གཤིས་འོག།ཚ་གྲང་ལྟོག་སྐོམ་ཡིད་ལ་མི་འཁོར་འཁོར་རྒྱུ་དེ་ཀོ་ཁྱེད་ཉིད་ཙམ།།ཛ་དྲག་ཚེ་ཡི་འཕེན་པ་རྫོགས་ཀྱང་འཇིག་རྟེན་ཕྱི་མའི་ཡུལ་གྲུ་ནས།།ཝ་ལེར་དྲན་པའི་བག་ཆགས་དྲག་པོས་སླར་ཡང་ཁྱེད་ཉིད་དྲན་པར་ངེས།། ཞ་ཞིའི་དུས་ནས་གཅིག་སེམས་གཅིག་སྦྲེལ་ཕན་ཚུན་འགྲོགས་པའི་རང་བཞིན་དང༌།།ཟ་ཉལ་འགྲོ་འདུག་གཅིག་ལ་གཅིག་མཚུངས་བློ་སེམས་མཐུན་པའི་ངང་ཚུལ་དེས།།འ་ཅག་ཕན་ཚུན་གཅིག་ལ་གཅིག་འཕྲེང་ལས་དབང་དྲག་པོའི་དཀའ་སྡུག་འོག།ཡ་མ་བརླ་ཡི་འཇིག་རྟེན་འདི་ན་ཇི་ཙམ་མནར་བ་སུ་ཡིས་རྟོགས།། ར་ཡིག་གཉིས་པས་གླུ་དབྱངས་སྙན་མོ་དར་དིར་སྒྲོགས་པའི་དུས་ཚིགས་ཏེ།།ལ་ལུང་ཀུན་ཏུ་དཔྱིད་ཀྱི་དཔལ་ཡོན་མངོན་པར་འཆར་བའི་ཉིན་མོ་དེར།།ཤ་ཉེ་ཁྱེད་ཉིད་མི་རིང་མཇལ་བའི་སྨོན་འདུན་ལྷང་ལྷང་གྱེར་བཞིན་དུ།།ས་མཐའ་འདི་ནས་ཁེར་རྐྱང་ལྡོམ་བུས་ཁྱེད་ལ་སྐུ་ཁམས་བཟང་བར་སྨོན།། ཧ་ལམ་ངེས་མེད་མི་ཚེའི་ནང་དུ་ཕན་ཚུན་འཕྲད་པའི་གོ་སྐབས་ཤིག།ཨ་ཁ་འཆི་བདག་གཤིན་རྗེས་མི་འཕྲོག་རབ་འབྱམས་རྒྱལ་བས་ཐུགས་རྗེ་གཟིགས།། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

སྙེ་འཕྲིན་ལས། གཉེན་ལ་བྱམས་པའི་གཞུང་དྲང་གི་དཔའ་མོ་ཞིག མེས་པོའི་སྲོལ་རྒྱུན་རིག་གནས་ཀྱི་རྗེས་འཛིན་པ་ཞིག རྒན་ལ་གུས་ཞིང་ཆུང་ལ་བརྩེ་བའི་བྱམས་བརྩེའི་བདག་ཉིད་ཅན་ཞིག བཞིན་ལེགས་དཔལ་ཡོན་ལྡན་པའི་མཛངས་མ་ཞིགབདག་གི་སྙིང་དབུས་ཀྱི་པད་དཀར་སྡུག་གུ་མ། ངེད་གཉིས་ཀྱི་དབར་བརྩེ་དུང་ལས་འཕྲོའི་མདུད་པས་བཅིངས་པས། བློ་སེམས་གཅིག་མཐུན་གྱི་དམ་བཅའ་འགྱུར་མེད་བྲག་ལ་བཅོལ། ཟས་ལ་རྩམ་ནག་ཆུ་ནག་ལས་མེད་ཀྱང། མཉམ་ཟ་མཉམ་འཐུང་གི་དགའ་བདེའི་ལོངས་སུ་སྤྱད་པས། འཇིག་རྟེན་གྱི་བདེ་སྐྱིད་མཐའ་དག་ངེད་གཉིས་ལ་དབང་བ་འདྲ། བདེ་བ་དང་དགའ་བས་མྱོས་པའི་ངེད་གཉིས་ལ། བྱ་བྱིའུ་ཡིས་ཀྱང་གླུ་དབྱངས་ཀྱི་སྨོན་ཚིག་ཞུ་མྱོང་ལ། རྩི་ཤིང་མེ་ཏོག་གིས་ཀྱང་གར་ལྡེམ་འཁྲབ་སྟོན་གྱི་རྟེན་འབྲེལ་ཞུ་མྱོང། བདག་གི་སྙིང་སྡུག་མ། ད་ལྟའི་ཟང་ཟིང་ཁོར་ཡུག་འདིས། ཁྱོད་ལ་ངན་ཤན་གྱིས་གོམས་འདྲིས་གསར་པ་ཞིག་སྤྲད་ན་ཡང། དུས་ཀྱི་འགྱུར་བ་དེ་ཇི་ལྟར་སོང་ན་ཡང། ཁྱོད་ཀྱི་རང་གཤིས་བཟང་པོ་འགྱུར་དགོས་དོན་ཅི། ད་ལྟ་ཁྱོད་ཀྱིས་རྒྱུ་ནོར་ཆེད་དུ་གང་ཡང་བྱེད་ཕོད་ལ། མི་ཆོས་དང་བྲལ་བའི་ངེད་གཉིས་ཀྱི་ཕྲུ་གུའང་བཙོང། ལས་འབྲས་གང་ལ་ཡང་ཁྱད་གསོད་ནུས་པ་འདི་འདྲ། སུ་ཞིག་གི་དབང་ཤུགས་ཀྱིས་ཁྱོད་ཀྱི་ཀླད་པར་བཙན་འཛུལ་བྱས། ཡང་ན་སུ་ཞིག་གི་དངུལ་ལོར་གྱིས་ཁྱོད་ལ་སླུ་བྲིད་བྱས། བདག་གི་སྙིང་སྡུག་མ། ཁྱོད་རྨོངས་གཉིད་ལས་སོད་དང། རྒྱུ་ནོར་གྱི་སྐྱ་སྒྲིབ་ཕོག་པའི་མིག་ཟུང་དེ་ཕྱེ་ནས། མུན་འཐོམ་གྱི་འཚོ་བ་ལས་ལོངས་དང། དངུལ་ལོར་གྱིས་བདེ་སྐྱིད་ཉོ་མི་ཐུབ་པས། སྔོན་ཆད་ངེད་གཉིས་ལ་དབང་བའི་བདེ་སྐྱིད་དེ། ད་ལྟ་ཁྱོད་ལ་ཨེ་འདུག་བསམ་གཞིགས་གྱིས་དང། བདག་གི་སྙིང་སྡུག་མ། ངས་ཁྱོད་ཀྱི་ཆེད་དུ། ངའི་བློ་དཀར་གྱི་མདའ་མོ་དེ་གཞུ་ལྟར་བཀུག་མྱོང་ལ། བྱུ་རུའི་དོ་ཤལ་ཞིག་ཁྱོད་ཀྱི་མགུལ་དུ་བསྒྲོན་ཆེད། འཚོ་བའི་རྒྱ་མཚོ་ནས་དཀའ་སྡུག་ཐེངས་མང་བརྒྱུད་ཀྱིན། ཚེ་སྲོག་གི་གྲུ་ཆུང་དེའང་ཞིག་ལ་ཁད། ནམ་མཁས་ངུ་ངག་འདོན་ཞིང་མིག་ཆུའི་ཕྲེང་ཐག་མི་ཆོད་ལ། ས་གཞི་སྐྱོ་གདུང་གིས་མནར་བས་ལུས་པོ་འདར་སིག་སིག རྩི་ཤིང་མེ་ཏོག་གིས་ཀྱང་མགོ་བོ་འཁྱོག་གིན་སྨྲེ་ངག་འདོན། བདག་གི་སྙིང་སྡུག་མ། ཁྱོད་མྱུར་བར་རྟོགས་པ་གཉིད་ལས་སོད་དང། རང་གི་ཕུགས་བསམ་དང་ཕ་མེས་ཀྱི་རེ་འདུན་གང་ཡང་མིནཔའི། མུན་འཐོམ་གྱི་འཚོ་བ་དེ་ནས་འོད་ཟེར་གྱི་ལམ་ལ་ཁ་ཕྱོགས་དང། ངེད་གཉིས་ཀྱི་བདེ་སྐྱིད་འཚོ་བ་དེ་ན་ཡོད། ངེད་གཉིས་ཀྱི་བརྩེ་དུང་གི་དོན་སྙིང་དེ་ན་ཡོད། བདག་གི་སྙིང་སྡུག་མ། ངས་རྟག་ཏུ་དཀོན་མཆོག་ལ་གསོལ་བ་འདེབས་ཀྱིན། སྔར་སོང་གི་སྤྲོ་དགའ་དྲན་གྱིན། མ་འོངས་པའི་བདེ་བསྐྱིད་ལ་བསམ་གྱིན། ངེད་གཉིས་སྔར་བཞིན་བློ་སེམས་གཅིག་མཐུན་ངང་། དགའ་སྐྱིད་ཀྱི་འཚོ་བ་གསར་པ་དེ་ལ་བསྙེག་ན་འདོད། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

དུས་བབ་དྲ་རྒྱ་ལས་བཤུས། དྲི་བ། སྐུ་ཉིད་ཀྱིས་བཙན་བྱོལ་སྤྱི་ཚོགས་ནང་རེག་དུག་གི་ན་ཚ་དེ་ཚབས་ཆེ་ཆུང་གང་འདྲ་ཞིག་ལ་གཟིགས་ཀྱིན་ཡོད་དམ། ལན། ན་ཚ་དེ་བོད་མིའི་སྤྱི་ཚོགས་ཙམ་མ་ཟད་འཛམ་གླིང་ཁྱོན་ཡོངས་སུ་ཚབས་ཆེན་པོར་མཐོང་གི་ཡོད་ལ། ཉེན་ཁ་ཡང་ཆེན་པོ་རེད། འཛམ་གླིང་ནང་དེང་སྐབས་ཚན་རིག་དང་ཉམས་ཞིབ་ཐོག་ཡར་རྒྱས་ཤུགས་ཆེར་འགྲོ་བཞིན་ཡོད་ནའང་། ན་ཚ་འདིའི་རིགས་ལ་སྨན་བཅོས་བྱེད་མ་ཐུབ་པར་སྐད་རྒྱག་གི་ཡོད། ལྷག་པར་དུ་བོད་མིར་མི་འབོར་ཉུང་ཉུང་ཞིག་ལས་མེད་སྟབས་མི་གཅིག་ལ་ན་ཚ་འདི་ཡོད་ནའང་བོད་མི་རིགས་ཉམས་ཆག་ཏུ་འགྲོ་རྒྱུའི་ཉེན་ཁ་ཡོད། བོད་མིའི་གཤིས་སྤྱོད་ནང་ན་ཚ་འདིའི་རིགས་བྱུང་སྐབས་སྦ་གསང་བྱེད་པ་དང་ངོ་ཚ་བྱེད་རྒྱུའི་གོམས་གཤིས་ཤིག་ཡོད། དེར་བརྟེན་སྤྱི་ཚོགས་ནང་ན་ཚ་འདིའི་རིགས་ཡོད་མཁན་གཅིག་བསླེབ་ནའང་རྩྭ་ལ་མེ་མཆེད་པ་ལྟར་ལམ་སང་ཁྱབ་འགྲོ་རྒྱུའི་ཉེན་ཁ་ཡོད། དྲི་བ། བཙན་བྱོལ་སྤྱི་ཚོགས་ནང་བོད་མི་ཅི་ཙམ་ལ་གཉན་ནད་རེག་དུག་གི་ན་ཚ་ཡོད་པར་ཚོད་དཔག་གནང་བཞིན་པ་དང་། སྨན་རྩིས་ཁང་ལ་ན་ཚ་དེ་ཡོད་མཁན་གྱི་བོད་མིས་སྨན་བསྟེན་བྱེད་མྱོང་ངམ། ལན། དེ་ལ་རིགས་གཉིས་ཡོད། གཅིག སྨན་རྩིས་ཁང་ལ་ནད་པ་རང་ཉིད་ཚུར་ཡོང་སྟེ་སྨན་བསྟེན་བྱས་ན་མ་གཏོགས་ཕར་ཉམས་ཞིབ་བྱེད་པ་དང་། ན་ཚ་དེ་ཡོད་རིགས་ལ་སྨན་སྤྲད་དེ་ཕན་ཐོགས་གང་འདྲ་ཡོད་མེད་བརྟག་དཔྱད་བྱེད་ཀྱི་མེད་སྟབས་ལབ་ཐུབ་ཀྱི་མེད། ཡིན་ནའང་། ང་ཚོས་དེ་སྔོན་ཧོ་ལན་ཌིར་འབྲེལ་བ་བྱས་ཏེ་སྨན་རྩིས་ཁང་གི་ངོས་ནས་ཕར་སྨན་པ་གཏོང་གི་ཡོད་ལ། སྨན་པ་གཏོང་ས་དེ་འཛམ་གླིང་ནང་ན་ཚ་འདིའི་རིགས་ཧ་ཅང་མང་བོ་ཡོད་སའི་ལུང་པ་ཞིག་རེད། ཉམས་ཞིབ་བྱས་མྱོང་མེད་སྟབས་ན་ཚ་འདིའི་རིགས་ལ་བོད་སྨན་གྱིས་བརྒྱ་ཆ་བརྒྱ་ཕན་གྱི་འདུག་ཟེར་རྒྱུ་ཁག་ནའང་། ང་ཡང་ཐེངས་མང་བོར་སྨན་བཅོས་བྱེད་དུ་འགྲོ་མྱོང་བས། བརྟག་དཔྱད་དང་ཉམས་ཞིབ་བྱས་ཏེ་རེག་དུག་གི་ན་ཚར་ངོས་འཛིན་བྱས་པའི་ནད་པ་དེ་འདྲ་ཕྱི་ལུགས་ཀྱི་སྨན་པས་ཟླ་བ་གསུམ་དང་དྲུག་ལ་མ་གཏོགས་གསོན་ཐུབ་ཀྱི་མ་རེད། གཟུགས་པོའི་གནས་སྟངས་ཀྱི་ཆ་ནས་ལྕོགས་ཀྱི་མ་རེད་ཟེར་བ་དེ་འདྲ་བོད་སྨན་ཟོས་ཏེ་ལོ་ལྔ་དང་དྲུག ད་ལྟའང་མ་ཤི་བར་བསྡད་ཡོད་པ་ཧ་ཅང་མང་བོ་ཡོད། དེར་བརྟེན་བོད་སྨན་གྱིས་ཕན་གྱིན་འདུག གང་ཡིན་ཟེར་ན་མིའི་བསམ་བློའི་ངོས་ནས་བརྒྱ་ཆ་བརྒྱ་ཕན་གྱི་ཡོད། བོད་སྨན་གྱི་ཁྱད་ཆོས་མ་འདྲ་བ་དེ། ནད་པར་སྨན་བཅོས་བྱེད་སྐབས་ནད་པར་དམིགས་བསལ་གྱིས་ལམ་སྟོན་མ་འདྲ་བ་དང་། ནད་པར་ན་ཚ་གང་འདྲ་ཞིག་ན་རུང་རང་གི་སེམས་ནང་དུ་ན་ཚར་བའི་རྗེས་སུ་དོ་སྣང་བྱེད་དགོས་པ་དང་། དོ་སྣང་བྱེད་སྟངས་ཤེས་དགོས་པར་མ་ཟད། ན་ཚ་དེ་རང་གི་གཟུགས་པོའི་ནང་བསླེབས་པའི་རྒྱུ་མཚན་རང་ཉིས་ཀྱིས་ངོས་ཟིན་པ་བྱས་ཏེ། དེའི་ཐོག་ཟས་བཅུད་དང་ཉིན་རེའི་སོ་སོའི་མི་ཚེ་སྐྱེལ་སྟངས་སྐོར་ལ་ཡིད་གཟབ་དགོས་པའི་བསླབ་བྱ་བརྒྱབ་དུས། བསླབ་བྱ་དེས་ནད་པ་མང་བོར་སེམས་ཀྱི་ཚོར་བ་བདེ་བ་ཞིག་དང་། ཡག་པོ་བསླེབས་ཏེ་གཟུགས་པོའི་ནང་དུ་སྨན་ལྟར་ཕན་རླབས་ཆེན་པོ་ཡོང་གི་ཡོད། བོད་སྨན་བསྟེན་སྐབས་སྨན་འཐུང་བ་ཙམ་གྱིས་མི་ཆོག་པར་ཟས་དང་ལུས་ངག་ཡིད་གསུམ་གྱི་སྤྱོད་ལམ་གལ་ཆེན་པོ་ཡིན་སྟབས། ནད་པར་སློབ་གསོ་ཐེབས་ཏེ་ན་ཚ་དེས་སྡུག་བསྔལ་ག་ཚོད་མྱོང་གི་ཡོད་ནའང་། བདེ་བའི་ཚོར་བ་ཤུགས་ཆེ་རུ་ཕྱིན་ཏེ་གཟུགས་པོའི་ནང་དུ་ན་ཚ་སྔོན་འགོག་བྱེད་པའི་ཤུགས་དེ་རང་བཞིན་གྱིས་སླེབས་ཡོང་གི་ཡོད། དེ་བཞིན་ནད་པས་ཟ་མ་ཟ་དགོས་པ་དེ་གལ་ཆེན་པོ་ཡིན་པ་ཤེས་ཀྱི་ཡོད་ལ། ཟ་མ་མ་ཟོས་ན་གཟུགས་པོ་འཚོ་ཐུབ་ཀྱི་མེད་པ་དེ་ཡང་ཤེས་ཀྱི་ཡོད། ཟ་མ་ཟ་བ་དེ་བོད་ཀྱི་སྨན་གཞུང་ནང་དུ་ལུས་ཟུངས་བདུན་ཟེར་ལ། ལུས་ཟུངས་བདུན་གྱི་དྭངས་མ་དེ་གཟུགས་པོའི་ནང་གི་སྙིང་དང་རྩ་ལམ་དུ་ཕྱིན་ཏེ། མིའི་ཚེ་སྲོག་གནས་པའི་གཞི་བྱེད་ཀྱིན་ཡོད། དེ་གལ་ཆེན་པོ་རེད། གཉིས་པ། སྨན་དེ་ནད་པའི་གཟུགས་པོའི་ནང་གི་གནས་བབ་དང་ན་ཚའི་ཚབས་ཆེ་ཆུང་ལ་བལྟས་ཏེ་སྤྲོད་སྐབས། སྨན་གྱིས་ཕན་པ་མ་གཏོགས་གནོད་རྒྱུ་གང་ཡང་མེད། གང་ཡིན་ཟེར་ན་བོད་སྨན་ནི་ཕྱི་རྒྱལ་གྱི་སྨན་ལྟར་དམིགས་ཡུལ་གཅིག་གི་ཆེད་དུ་དམིགས་ཏེ་བཟོས་པ་མིན་པར། མི་སོ་སོའི་གཟུགས་པོའི་གནས་སྟངས་ནང་རླུང་མཁྲིས་བད་ཀན་གསུམ་གྱིས་གཉེར་བའི་ཆ་སྙོམས་དང་མ་སྙོམས་ཟེར་བ་ཡོད་སྟབས། རླུང་མཁྲིས་བད་ཀན་གསུམ་ནི་མི་ཚང་མའི་གཟུགས་པོའི་ནང་དུ་ཡོད་པ་ཞིག་རེད། དེ་མེད་ན་མིའི་གཟུགས་པོའི་ནང་དུ་བསམ་བློ་གཏོང་བ་དང་འགུལ་སྐྱོད་བྱེད་པ་སོགས་དོན་ལྔ་སྣོད་དྲུག་གི་ལས་ཀ་བྱེད་པར་སྟངས་འཛིན་བྱེད་ཐུབ་ཀྱི་མེད། དེར་བརྟེན་རླུང་མཁྲིས་བད་ཀན་གསུམ་གྱི་ཆ་ཤས་ལ་བལྟས་ཏེ་བོད་སྨན་གྱི་སྦྱོར་བ་ནི་ཕྱི་རྒྱལ་གྱི་སྨན་དང་མ་འདྲ་བའི་ཁྱད་ཆོས་ལྡན་པ་ཞིག་རེད། དེའི་ཆ་ནས་ནུས་པ་ཆེན་པོ་འདོན་ཐུབ་ཀྱིན་ཡོད།…

བློ་བཟང་ཡོན་ཏན། གསར་བཏོད་གནའ་བོའི་བཟོ་བཀོད་ཀྱི་ཇ་ཁང་།།ལྕང་ལོ་དལ་གྱིས་བབ་པ་ཡི་ནགས་རྫོང་།།མི་ཚོགས་དགོད་སྒྲ་འཕྱུར་བ་ཡི་སྤྱི་གླིང་།།བློ་གསལ་གནའ་བོ་ཇ་ཁང་གི་ངང་ཚུལ།། དྭངས་གཙང་ཤེལ་གྱི་དཀར་ཡོལ་གྱི་ཕོར་པར།།བཅུད་ལྡན་འོ་མ་ཀ་ར་དང་བསྲེས་ནས།།དྲི་ཞིམ་ཇ་ལོའི་འདབ་མ་ཡི་བྲོ་བ།།ལྷགས་རླུང་བསིལ་པོ་ལྷན་གཅིག་ཏུ་ལྡང་སོང་།།སྣ་ཚོགས་མཛེས་སྡུག་བཀྲ་བ་ཡི་མེ་ཏོག །རྐང་ལམ་ཕྲ་མོའིགཡས་གཡོན་ལ་འགྲེངས་ནས།།འདབ་བརྒྱ་དགོད་འཛུམ་བཞད་བཞིན་དུ་མགྲོན་པོར།།བསུ་བ་ཚུལ་མཐུན་བྱེད་པ་ཡིས་མཚར་སོང་།། ཐོགས་ཀར་རྩྭ་ཡིས་བླ་གབ་ཀྱི་རྣམ་པ།།ཟུར་བཞིར་སྨྱུག་མ་བསྒྲིག་པ་ལས་གྲུབ་པ།།ཀ་བར་ནག་སྣུམ་དུད་ཚོན་གྱི་བྱུགའ་པའི།།བློ་གསལ་གནའ་བོའི་ཇ་ཁང་དེ་མཛེས་སོ།། ཉེ་དུས་གསར་དུ་ཕྱེ་བའི་བློ་གསལ་གནའ་བོའི་ཇ་ཁང་དུ་ཇ་འཐུང་ཞོར་དུ་བྲིས།། ༢༠༡༡/༡/༧ཉིན། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

ཚོད་ཚོད་ལ། ཚོར་བ་འདི་འདྲ་ཞིག་སྐྱེས། ཚོད་ཚོད་ལ། ཁྱོད་ཉིད་དྲན་འོངས་ཤིང་།དྲན་ཐེངས་རེར། སེམས་པར་འདར་ཟུག་ཅིག་རྒྱག་འོངས།དྲན་སྟངས་དེ་དག འདར་ཐེངས་རེ་རེར། གསང་བའི་སྒོ་མོ་གང་ཞིག་གི་ལྡེ་མིག་གཞན་ལག་ཏུ་ཤོར་བ་འདྲ་ལ།རང་ཉིད་ཀྱི་ནག་ཉེས་གང་ཞིག་སླར་ཡང་དྲན་པ་དང་མཚུངས།འཇིག་རྟེན་ཧྲིལ་བོ་ལ་ཁ་ལོ་བསྒྱུར་མཁན་ཁྱོད་ཉིད་ཡིན་ནམ།དུས་ཚོད་ཀྱི་མདའ་རྩེ་ཡོད་ཚད་ཁྱེད་ཕྱོགས་སུ་ཤོར་འགྲོ།རྨིས་རྨིས་པའི་རྨི་ལམ་ཚང་མ་སྟོང་བ་ཡིན་ནམ།དུས་གསུམ་གྱི་འགུལ་བསྐྱོད་ཐམས་ཅད་བོར་བརླགས་ཐེབས་སོང་།གློག་ཀླད་ཀྱི་ངོ་གདོང་ལ་ཅེར་བཞིན།ཁྱོད་ཉིད་གང་སར་བཙལ།མདའ་རྩེ་ཡིས་ངལ་དུབ་མེད་པར།དྲ་ངོས་ཀྱི་ལ་ལུང་བརྒལ། འཕྲད་མི་རུང་བ་དེ་ཁྱོད་ཉིད་ཡིན་ནམ།ཁྱོད་ཀྱིས་གྲིབ་གཟུགས་མཐོང་དུས་ང་རང་གཟུར་ནས་འགྲོ་འདོད།འཚོལ་མི་རུང་བ་དེ་ཁྱོད་ཉིད་ཡིན་ནམ།ཁྱོད་ཉིད་རྒྱང་དུ་གྱེས་དུས་ང་ཡིས་ཀི་རིང་འདེབས་འདོད། ངའི་ཕུགས་འདུན་དང་བྱ་བཞག་ཡོད་ཚད་ལ།ཁྱོད་ཀྱིས་ལག་རྩེད་བྱེད་ཀྱིན་འདུགངའི་འཛུམ་མདངས་དང་ཚེ་སྲོག་གི་ཁྲག་རྒྱུན་མཐའ་དགཁྱོད་ཀྱིས་རང་གི་ཁེ་གྲགས་ཀྱི་འགྱིག་རྡེའུ་རུ་བརྩིས་འདུག ངས་བསམ་ཞིང་བརྩི་བཞིན་པ་དེ་མི་སྡེ་ཡི་ནམ་མཁའ་ཡིན།ངས་བསྙབ་ཅིང་སྙེག་གིན་པ་དེ་དྲང་བདེན་དང་གནས་ལུགས་ཡིན།ང་ལ་དགོས་པ་དྭངས་གཙང་དང་སླད་མེད་ཡིན།ང་ཡིས་བསམ་པ་བརྩེ་སེམས་དང་དྲོད་ཁོལ་ཡིན། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།