རེ་སྨོན་སྟོང་གི་སྔར་ནས་བསུས་པ་ཡི།།ལོ་གསར་ཉིན་བྱེད་དབང་གི་རྒྱལ་མོའི་འོག།དུས་ཀྱི་སྐར་ཆ་རེ་ཡང་འབྲས་བཟང་གི།ལོ་ཏོག་འབུམ་གྱི་རྒྱུ་རུ་འགྱུར་བར་སྨོན།། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
Category: རིགས་བཀར་མེད།
དུས་ཚོད།
བསྟན་འཛིན་ཤེས་རབ། དངངས་འཚབ་ཀྱི་ཚོར་བ་ཞིག་གློ་བུར་དུ་འོང་ཞིང་གློ་བུར་དུ་འདས་སོང།བཞུད་འགྲོ་བའི་རྟ་ཕོ་ཁྲི་སྟོང་རྨིག་སྒྲ་ལྷང་ལྷང་།ཡུད་ཙམ་ཡུད་ཙམ་ངང་མཐོང་ལམ་ནས་ཡལ་སོང་།རི་བོའི་རྩེ་མོ་རུ་འཛེག་གིན་པའི་མི་ཕོ་དེ་དག་དང་།ཆུ་བོའི་ཕ་རོལ་ཏུ་རྐྱལ་བཞིན་པའི་བྱིས་པ་དེ་དག་ཀྱང་།འདྲིལ་ཞོར་འཛེག་ཞོར་དང་སྣུབ་ཞོར་རྐྱལ་ཞོར་དུ།ཨུ་ཚུགས་ཀྱིས་མདུན་ནས་མདུན་ནས་སྐྱོད་བཞིན་འདུག ལག་མཐིལ་ནས་ཟགས་བཞིན་པ་དུས་ཚོད་ཡིན་ནམ།གཡས་འཐུ་གཡོན་འཐུ་བྱས་པའི་འབྲུ་རྡོག་སྣ་ཚོགས་དེ་དགལ་ལུང་གང་སར་གཡེངས་པའི་རི་དྭགས་བཞིན།རང་རང་ས་ནས་ས་རུ་འཐོར་སོང་། སྐྱ་གོག་གེར་གྱུར་པའི་མཁར་ཤུལ་དེ་རུ།ས་རྡུལ་རེ་འཁུར་བཞིན་པའི་རླུང་བུ་ཞིག་ལས་ཅི་ཡང་མི་འདུག་མོད།རྨི་ལམ་ཐན་ཐུན་རེ་ད་དུང་རྨི་ཆོག་གམ། གློ་བུར་དུ་འོང་ཞིང་གློ་བུར་དུ་འདས་སོང་བ་དེ་དུས་ཚོད་རེད།བྱིས་པ་ཚོས་རྒྱུ་ངོམ་བྱེད་པ་བཞིན།ས་བོན་རེ་འགའ་རེ་གཏོར་ཞིང་ས་བོན་རེ་འགའ་རེ་བརླགས་བཞིན་བུད་སོང་།ཧད་མ་ཧོད་དུ་ལུས་པའི་དུས་ཚོད་དེས།ཁ་དོག་སྣ་ཚོགས་ཀྱི་ངོ་རིས་ལ་བལྟ་བཞིན།རྗེས་མའི་དུས་ཚོད་ལ་བསྒུག་གི་ཡིན་ཟེར། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
ཡང་མིན་ན་འདི་ལྟར་བྱེད།
བསྟན་འཛིན་ཤེས་རབ། མྱུ་གུ་ཕོན་པོ་ཞིག་ལྗང་མདོག་འཁྱིལ་ལེར་སྐྱེས་སོང་།གཤོག་པ་སྡེབ་བཞིན་པའི་བྱེའུ་ཆུང་དེས་མགྲིན་པ་སངས་བཞིན།རི་བོའི་ཕ་རོལ་ཏུ་འགྲོ་འདོད་ཟེར།རི་བོའི་ཕ་རོལ་ན་ཅི་ཞིག་ཡོད་དམ། ནམ་ཡང་ཡིད་ཆེས་ཀྱིས་འདྲོངས་པའི་མི་ཨང་།སྐྱོ་བ་དེ་སེམས་ཀྱི་ཕྱི་རོལ་ཏུ་འདེད་རོགས།ཕུགས་བསམ་ལ་མཚོན་རྩིས་ཤན་ནམ།ཁྱོད་ལ་མངོན་གྱིན་པའི་ཁང་མིག་གསོར་མོ་དང་།མེ་དྲོད་ཀྱི་སོས་བཞིན་པའི་སེམས་ཁམས་དྭངས་མོ་དེ་དགནུབ་ཕྱོགས་ན་ལྡང་བའི་དྲི་ངད་དང་སྦྲེལ་ཐབས་མི་འདུག སེམས་པ་དེ་རྣལ་དུ་འབེབས་རོགས།ལམ་ཕྲན་ཉིས་ཚེབ་དེར་མིག་གིས་འཚོ་རོགས། ཕྱི་རོལ་ན་རྒྱུ་བའི་རླུང་བུ་དེ་སེར་བོ་རེད། ནག་པོ་རེད། དཀར་བོ་རེད། སུ་ཞིག་གིས་ཁྱོད་ལ་དྲོད་འཇམ་གྱི་ཕྱག་ཟུང་བརྐྱང་སྲིད་དམ།ཡང་མིན་ན་ཁྱོད་ཀྱིས་ཁ་སང་གི་ངོ་གདོང་ལ་ལྟ་རོགས།ཕྲག་གོང་ན་ལྗིད་ཏིག་གེར་ཡོད་པ་དེ་ཕ་རོལ་ཀྱི་འདོད་རྔམ་རེད། སེམས་ངལ་གྱི་ཁུར་བོ་ཅི་ཙམ་ཁུར་ཟིན།དལ་ཅག་གེར་བཞུད་ཟིན་པ་དེ་ཁྱེད་ཀྱི་ཚེ་སྲོག་རེད།ཕ་གའི་ཉིན་ཁ་ནས་དྲོད་ཁོལ་ཅི་ཙམ་བསྐྱལ་བྱུང་། རི་བོའི་ཕ་རོལ་ཀྱི་སེམས་ལྗོངས་དེ་ཕྱིར་ལ་གཤོལ་ཅིགམཛེས་སྡུག་དང་གསོན་ཉམས་ཐམས་ཅད་འཁྲུལ་སྣང་རེད།དུས་ཚོད་ཀྱི་ལོང་བུ་དེར་དམ་གྱིས་འཐོམས་དང་།ཟུངས་ཁྲག་གི་བཞུར་རྒྱུན་ཐམས་ཅད་ཡུན་གྱིས་ཟད་འགྲོ།མིག་མདུན་གྱི་མུ་ཏིག་དེ་དག་ལག་པས་སྒྲུག་རོགས།འགྱིག་རྡེའུ་ཕྲ་བོ་དེ་རྡོག་པས་བརྫི་རོགས།ལྗང་མདོག་གི་མྱུག་ཕྲན་དེ་དག་ལྷོད་ཀྱིས་འཇོག་རོགས། རི་བོའི་ཕ་རོལ་ན་གསོལ་སྟོན་གྱི་འདུ་འགོད་བསྡུ་བཞིན་འདུགསྲེད་པ་སློང་བྱེད་ཅིག་དང་འདྲ་བའི་ལག་པའི་ཕྱག་རྒྱ་དེ་ཚོ།རྫིང་བུའི་ངོགས་སུ་བྲིས་པའི་ཡི་གེའི་འཆིང་རྒྱ་བཞིན།ཡུད་ཙམ་ཡུད་ཙམ་ངང་ནུབ་སོང་།ཁོད་ཀྱི་མགོ་ཐོག་ན། གས་འཐོར་དུ་སོང་བའི་ཟླ་བ་ཞིག་ལྗིད་ཏིག་གེར་བགྲད་འདུག བསིལ་རླུང་འཇམ་པོ་ཞིག་གིས་ཁྱོད་ལ་རེག་འོས་སམ།ཕ་རོལ་ནས་ཁྱོད་ལ་ད་དུང་རྨི་ལམ་རྨི་སྟངས་ཤིག་འཆད་བཞིན་འདུགའབོར་གྱིན་པའི་ཁྱོད་ཀྱི་རྒྱང་ཤེལ་དེ་ཨང་།མྱོང་སྣང་དང་ཚོར་བའི་བར་ནས་ཇི་ལྟར་ཉར་ཚགས་བྱེད་དམ། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
དབྱངས་ཅན་ལྷ་མོ།
རབ་ཡངས་གླིང་འདིའི་ང་རོ་ཐ་དག་གཅིག་ཏུ་འདུས་ནས་འགྲན་པས་ཀྱང་།།རབ་སྙན་ཁྱེད་གསུང་ཆ་ཙམ་མི་བཟོད་སྙན་འཇེབས་རྡུལ་སྙེད་དཔལ་ལྡན་པ།།རབ་རྒྱས་མྱོས་བུམ་ཟུང་གི་མདུན་ནས་རྒྱུད་མངས་སྦྲེང་པའི་ཚུལ་འཛིན་མ།།རབ་དཀར་དབྱངས་ཅན་ལྷ་མོའི་སྐུ་ཡི་འོད་རླབས་དེ་ཡིས་བདག་ཡིད་འཕྲོག། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།
དྷི་ལི།
ཞོགས་དྲོའི་ཉི་གཞོན་ས་གཞིའི་མཐའ་ནས་ནམ་མཁར་མཁྱུད་ཟིན་རུང་དྷི་ལཱིའི་གྲོང་འཁྱེར་དེ་ནི་དུ་རླངས་དང་མུག་པས་གྲིབ་ནས་རབ་རིབ་ཙམ་ལས་གསལ་མི་ཐུབ་ལ། སྐྱེ་བོ་རྣམས་ནི་བྲེལ་ཚུབ་ཚུབ་གིས་རང་རང་གི་ལས་ཀར་གཡེང་བ་ལས་ལམ་ཟུར་གྱི་མིར་ཁ་གཏའ་ཙམ་ཡང་བྱེད་རྒྱུའི་དུས་ཚོད་མེད་པ་ལྟ་བུར་འཆར། དེང་དུས་ཀྱི་ཚན་རིག་གིས་གྲོང་འཁྱེར་དེ་ཧ་ལས་དགོས་པའི་འཕེལ་རྒྱས་བཏང་ཡོད་པ་དེ་རྩོད་མེད་ཀྱི་གནས་ཚུལ་ཞིག་ཡིན་ལ། ཤེལ་གྱི་མཆོད་རྟེན་ལྟ་བུའི་ཐོག་བརྩེགས་ཅན་དང་ འབུ་གྲོག་མ་ཡི་ཁྱུ་ཚོགས་ལྟ་བུའི་འགྲིམས་འགྲུལ། དར་གོས་སྣ་ཚོགས་ཀྱི་འོག་ནས་དཀར་གསལ་འོད་མདངས་ཀྱི་ཁྱབ་པའི་མི་རྣམ་ཀྱི་རྣམ་གྱུར་ནས་འཕེལ་རྒྱས་གང་འདྲ་ཞིག་བྱུང་བ་གཟིགས་ཐུབ། དེ་དང་ཆ་སྙོམས་ཀྱི་ཉམ་ཆགས་ཡང་མི་ཉུང་བ་ཞིག་བྱུང་འདུག་པ་དེ་ཁྱོད་ཀྱི་ཨེ་གཟིགས། སྔོ་ལྗང་གི་ལྗོན་ཤིང་དང་རང་བྱུང་གི་སྲོག་ཆགས། བདེ་སྐྱིད་ཀྱི་ཁུར་ཡུག་རྣམས་དེང་དུས་ཀྱི་གོམ་བགྲོས་རྗེས་མ་ཟིན་པར་འཆི་ཁའི་མར་མེ་ཞིག་དང་དབྱེར་མེད་པར་འདུག ༼ཐག་་་་། ཐག་་་་་། གློག་སད་རེན་སོང་།༽ གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།