ལོ་དུས་ནི་ཆུ་ཚོད་སྐར་མ་རེར་སྡོད་ལོང་མེད་པར་རྟག་ཏུ་འགྱུར་བཞིན་པ་ནི་སངས་རྒྱས་ཀྱི་གསུང་རབས་ཀྱི་ནང་དུ་ཡང་ཡང་ནན་ཏན་དུ་གསལ་བཞིན་པའི་དངོས་པོའི་གཤིས་ལུགས་མི་རྟག་པ་ཞེས་བྱ་བ་དེ་ཡིན། ཇི་ལྟར་དངོས་པོ་རྣམས་མི་རྟག་པ་ཡིན་མིན་ལ་མ་བལྟོས་པར་ང་ཚོས་མི་རེ་ངོ་རའི་ལས་ལ་བཀོད་པའི་མི་ཚེ་གཅིག་པུ་འདི་དང་། མི་རབས་ནས་མི་རབས་བར་གནས་དགོས་པའི་འགྲོ་བ་མི་སྤྱི་དང་། བྱེ་བྲག་སྐབས་འབྲེལ་བོད་མི་རིགས་ཀྱི་ཡ་རབས་བཟང་སྤྱོད་ཀྱི་ལེགས་སྦྱངས་དག་ལ་གཅེས་སྤྲས་ཀྱི་བསམ་བློ་ནན་པོ་གཏོང་རྒྱུ་དེ་གལ་ཆེན་པོ་ཡིན། བོད་རིགས་ཀྱིས་ས་གནས་གང་སར་གཏོང་བཞིན་པའི་ལོ་གསར་ལྟ་བུ་ཞིག་ལ་ཆ་མཚོན་ན། གུང་སེང་དང་དགའ་དགའ་སྤྲོ་སྤྲོའི་རྣམ་པ་ཅན། སྲོལ་རྒྱུན་རྙིང་པ་ཞིག་ཏུ་རྩིས་ནས་སྐབས་རེ་ལོ་གསར་གཏོང་རྒྱུ་བརྗེད་པ་དང་། སྐབས་རེ་ཆེད་མངགས་གཏོང་རྒྱུ་བཞག་པ་སོགས་འབྱུང་བ་ནི་རྣོ་ཞིང་གཟུ་བོར་གནས་པའི་བསམ་བློས་དཔྱད་ན། རང་གིས་རང་ལ་རྨས་སྐྱོན་བཏང་པ་ལས་དོན་དངོས་གཟི་བརྗིད་ལྡན་པའི་བྱ་ཞག་གལ་ཆེན་པོ་ཞིག་གྲུབ་མེད།
གནའ་བོའི་སྲོལ་རྒྱུན་ལ་ཡོད་པའི་ལོ་གསར་སྲུང་རྩིས་ཚེས་གྲངས་དང་བྱེད་སྒོ་སོགས་ཀྱིས་བོད་མི་རིགས་ཀྱི་ངོ་བོ་མ་འཐོར་བར་ཆིག་སྒྲིལ་དུ་གནས་པར་བྱེད་ཡོད་ལ། ད་ལྟའི་ཆར་ཡང་བོད་མི་ཡུལ་གྱར་བ་ཚོས་སོ་སོ་ས་གནས་གང་ཡོད་ལ་མ་བལྟོས་པར་དུས་ཐོག་གཅིག་ལ་གང་ཐུབ་ཀྱིས་ལོ་གསར་སྲུང་རྩིས་བྱེད་ནས་བོད་མིའི་ངོ་བོ་མ་ཡལ་བ་དང་། ལྟ་བ་དང་ལངས་ཕྱོགས་ཚ་གྲང་ལྟ་བུའི་འགལ་ཟླ་ཡོད་ནའང་ལོ་གསར་དུས་ཐོག་གཅིག་ལ་བཏང་ནས་བོད་རིགས་གཅིག་པ་ཡིན་པའི་རྣམ་པ་གསལ་པོར་སྟོན་གྱི་ཡོད། དེ་བས་མ་ཟད་ལོ་གསར་གྱི་དུས་སྟོན། སྔ་ཕྱི་བར་གསུམ་གྱི་རྒྱུད་རིམ་ལས་བོད་མི་གཞོན་སྐྱེས་ཚོས་བོད་པའི་ཐུན་མོང་མིན་པའི་ལེགས་སྦྱངས་ཀྱི་ཆར་གཏོགས་པའི་ཡ་རབས་དང་ཆོས་ཕྱོགས་ཀྱི་ཡོན་ཏན་མང་པོ་ཞིག་ཞོར་ལ་སློབ་ཐུབ་པ་ཡོང་གི་ཡོད།
དགུན་དུས་ཞིང་ལས་སོགས་ཀྱི་འདུ་འཛི་མེད་དུས་དང་བསྟུན་ནས་བོད་མི་ཚོས་ས་གནས་སོ་སོར་ལོ་གསར་བཏང་ནས་དང་པོ་ཉེ་འཁོར་གྱི་མི་མང་མཉམ་འཛོམས་དང་ཤ་ཆང་ཞབས་བྲོ་སོགས་ཀྱི་བདེ་སྐྱིད་མཉམ་སྤྱོད་ཀྱིས་དམངས་གཞིའི་སྤྱི་ཚོགས་ཀྱི་རང་བཞིན་གོང་མཐོར་བཏང་ཡོད་ལ། དངོས་གཞི་སྤྱི་པའི་ལོ་གསར་སྐབས་ལྷ་བླ་མ་མཇལ་རྒྱུ་དང་། ཕ་མ་ལ་གུས་ཞབས་ཞུ་རྒྱུ་དང་། ཁྱིམ་ཚང་སོ་སོ་དང་སྤུན་མཆེད་ཕན་ཚུན་བར་གྱི་བརྩེ་སེམས་ཀྱི་འབྲེལ་བ་ཉམས་པ་གསོ་བ་དང་མི་ཉམས་པ་གནས་པ་དང་བསྐྱེད་པར་བྱེད་ཀྱི་ཡོད། དེང་སང་ཉི་ཤུ་དགུ་ཆད་པའི་སྐབས་ཉི་ཤུ་དགུའི་བྱེད་སྒོ་ཚེས་གྲངས་གང་དུ་བྱེད་དགོས་མིན་རྩོད་བཞིན་པ་འདི་ཡང་བོད་མི་ཚོའི་གཅིག་འགྱུར་གྱི་ཡུལ་སྲོལ་གོམས་གཤིས་ཀྱི་འབྲེལ་བ་དམ་ཟབ་ཡོད་པ་དེས་ཡིན། ད་བར་སྐྱ་རེངས་ན་གཞོན་བོད་ཀྱི་རྩོམ་ཡིག་དྲ་བས་བོད་ཀྱི་རིགས་གནས་བཟང་པོ་དག་གཞོན་སྐྱེས་ཚོར་མ་ཉམས་རྩིས་སྤྲོད་ཞུ་རྒྱུའི་ཀུན་སློང་བཟང་པོ་ཞིག་ཁྱེར་ནས་སྔོན་མ་དུས་དེབ་དང་ད་ཆ་དྲ་ལམ་ཆུང་ཆུང་འདི་གཉེར་བཞིན་ཡོད་ན། མ་འོངས་པའི་ལོ་གསར་པ་འདི་ནང་ང་ཚོའི་དྲ་རྒྱར་བོད་ཀྱི་ལེགས་སྦྱངས་དང་བོད་མིའི་ཤེས་ཡོན་ལ་ཕན་པའི་རྩོམ་ཡིག་གང་མང་ཡོད་པའི་རེ་བ་ཞུ་གི་ཡོད། བཀྲ་ཤིས་བདེ་ལེགས།། །།
སྙན་ངག་སྒེའུ་ཁུང་།
ར་ས་ཕོ་ཉས།
ཕུལ་བྱུང་རིག་པའི་གསེར་གྱི་ལྷུན་པོ་ལ།།
བློ་གྲོས་བྱམས་པའི་སེམས་ཀྱི་རྒྱས་བཏབ་ཚེ།།
སྲིད་འདིའི་བླང་དོར་མིག་མེད་ཉམས་ཐག་རྣམས།།
བསིལ་ལྡན་ཐར་པའི་གྲོང་དུ་བདེ་བླག་འཛུད།།