Category: རིགས་བཀར་མེད།

ཀླུ་སྨྱོན་ཧེ་རུ་ཀ ལོ་ནའི་དབང་གིས།ཉི་མ་དྲོ་དུས་ང་རང་ཉི་མར་ལྡེ་བཞིན་ཡོད།ཨ་རིའི་བོད་པ་ཚོ་ཇི་འདྲའི་བྲེལ་བ་ཚ་ནའང་།ང་རང་ལྷོད་ལྷོད་ངང་ཉི་མར་ལྡེ་བཞིན་ཡོད།ཐག་ཉེ་རུ་བྱ་བྱེའུ་འགས་སྡོང་མགོ་རུ་ཅ་ཅོ་འབྱིན་པ་དང་།ཐག་རིང་ས་རུ་གནམ་གྲུ་ཆེན་པོ་ཞིག་ཞི་བདེའི་རྒྱ་མཚོའི་མཁའ་དབྱིངས་ནས་འདི་ཕྱོགས་སུ་འཕུར་ཡོང་ན་ཡང་།ང་རང་བྲེལ་བ་ཅི་ཡང་མེད་པར་ཉི་མར་ལྡེ་བཞིན་ཡོད།འདི་ནས་དཔག་ཚད་གཅིག་གི་ཕ་རོལ་ཏུ།མཚེའུ་ཞིག་ཡོད་ཅིང་། དེའི་མཐའ་སྐོར་ན་གཅེར་ཧྲེང་མང་པོ་ཞིག་བྲང་དང་རྐུབ་ཉི་མར་བསྟན་ནས་ཉི་མར་ལྡེ་བཞིན་ཡོད།ང་རང་སྐབས་རེར་དེ་ཚོའི་གསེབ་ཏུ་འཛུལ་ནས་ཉི་མར་ལྡེ་བར་དགའ་བར་ཧ་ཅང་དགའ།ཞི་མོ་ཚོའི་ནུ་མ་དང་ཞི་ལི་ཚོའི་དཔུང་ཤ་ཡིས་ཁོ་རང་ཚོར་སེམས་ཚོར་མི་འདྲ་ཅི་ཙམ་ཞིག་སྤྲོད་ན་ཡང་།ང་རང་ནི་ཞི་གནས་གྲུབ་པའི་དྲང་སྲོང་ཞིག་དང་མཚུངས་པར།ལུས་སེམས་གཉིས་ཀ་ཉི་མར་ལྡེ་བ་ལས།ཁོ་ཚོར་ཇུས་གཏོགས་ཅི་ཡང་བྱེད་ཀྱིན་མེད།གང་ལྟར།ཉི་མ་དྲོ་དུས།ང་རང་བྲེལ་བ་ཅི་ཡང་མེད་པར་ཉི་མར་ལྡེ་བཞིན་ཡོད། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

བེ་རི་འཇིགས་མེད།སྟོན་མཇུག་བརྩེ་མེད་ཚ་བའི་རླུང་གིས་ལྗོན་ཤིང་དག་ནི་གཡོ་ཞིང་འདར།།ལྗང་མདོག་ཉམས་པའི་ཨམྲའི་འདབ་ལོ་སྐོར་ཞིང་སྐོར་ཞིང་མཁའ་ལ་ཁྱེར།།ཡིད་འོངས་མཛེས་སྡུག་མེ་ཏོག་སྐྲ་ལོ་རྐང་པའི་རྡུལ་གྱི་ཁྲོད་དུ་བསྙེས།།ངལ་ཞིང་དུབ་པའི་ཁྲུང་ཁྲུང་རྣམས་ནི་ཁྱུ་དང་ཁྱུར་བྱས་ལྷོ་ལ་འཕུར།། ཀུན་གསལ་གོས་སྔོན་ཉི་མས་གདུང་སྟེ་མྱ་ངམ་ཐང་གི་མདངས་ལྟར་སྐྱ།།ལང་ལོང་གཡོ་བའི་ཆུ་འཛིན་ཕྲེང་བ་དལ་བུར་དལ་བུར་ཕྱོགས་སུ་བསྐྱོད།།གནག་རྫིའི་བུ་རྣམས་ཨ་མྲའི་ལྗོན་འོག་འདུ་ཤེས་འགགས་ཏེ་རྔུན་པ་བྱེད།།མ་ཧེ་དག་ཀྱང་འདམ་རྫབ་གསེབ་ཏུ་ཆུ་ཤིང་སྨྱུགས་མའི་གྲིབ་གཟུགས་བསྟེན།། བྱི་འུའི་ཁྱུ་དང་ཅོ་ཀ་དག་ནི་ཡལ་འདབ་གསེབ་ནས་དབུགས་ངལ་བརྩེགས།།དུས་ཀྱིས་བཏབ་པའི་སྔོ་ལྗང་འབྲས་ཞིང་གཡུ་མདོག་ཉམས་པའི་རྩྭ་སོག་སྐྱ།།མ་རྨོས་ལོ་ཏོག་སྟོན་འབྲས་བསྡུས་ཤུལ་ལྗང་མདོག་ཤོར་བའི་རྩྭ་ལྡུམ་ཁེངས།།བདག་ཀྱང་སྐྱོ་དང་ཚ་བའི་གདུང་བས་སྙིང་གི་འཕར་རྩ་གཡོས་གྱུར་ཏེ།། སྣུམ་ནག་བྱུགས་པའི་ལམ་ཟུར་ཞིག་ཏུ་ལྗོན་པའི་བསིལ་འོག་གཉིད་ལ་ཡུར།།ཐུན་གསུམ་གཉིད་ཀྱི་རྨི་ལམ་ཞིང་ནས་སྐྱོ་བའི་ལྟད་མོ་འདི་ལྟར་སྣང༌།།ཁོ་བོ་འགྱོད་དང་སྐྱོ་གདུང་བྱེད་བཞིན་ཧི་མ་ལ་ཡའི་རི་རྒྱུད་ནས།།འཁྱག་འཁྱོག་གོམ་འགྲོས་སྤོ་ཤུགས་དྲག་པས་བསིལ་ལྡན་ཞིང་དུ་ཁ་ལོ་བསྒྱུར།། ལྷུང་ལྷུང་འབབ་པའི་གངས་ཆུ་སིལ་མ་འཐུང་ཞིང་འཐུང་ཞིང་མདུན་དུ་བསྐྱོད།།བགྲང་བྱ་སོ་ལྔའི་ཡོལ་བའི་འོག་ནས་གཞིས་ལུས་སྤུན་ཟླ་མི་དམངས་རྣམས།།གངས་ཆུས་གསོས་པའི་སྙིང་སྟོབས་བཙན་པོའི་གངས་སེང་དཀར་མོའི་རིཊ་བསྙེཊ་ཏེ།།གཞན་དག་ཡོལ་ནག་མུན་པའི་གསེབ་ནས་རེ་བའི་འོ་འདོད་ལྷོ་ལ་འབོད།། ཀྲོང་ངེ་འགྱིངས་པའི་གྲུ་འཛིན་གཉིས་པ་པོ་ཏཱ་ལ་ཡི་ཕོ་བྲང་གིས།།སྟོང་ཕྲག་དྲ་མའི་སྨིན་མ་བསྐྱོད་དེ་རེ་བའི་མིག་ཞགས་ལྷོ་ལ་འཕེན།།གཙུག་ལག་ཁང་གི་རྒྱ་ཕིབས་རྩེ་ནས་དངུལ་གྱི་དྲིལ་ཆུང་གཡེར་ཁ་རྣམས།།རླུང་གིས་བསྐུལ་བའི་ཅོང་བརྡའི་དབྱངས་ཀྱིས་རེ་སྒུག་བྱེད་པའི་སྐྱོ་གླུ་ལེན།། རྒྱལ་གཅེས་དཔའ་བོ་སྤུན་ཟླ་གྲངས་མེད་རང་དབང་དོན་དུ་སྲོག་བཏང་བའི།།དམར་ནག་ཁྲག་དྲོན་གཞུན་པའི་རྒྱུན་གྱིས་བར་སྐོར་བྱུ་རུའི་མདོག་ཏུ་བསྒྱུར།།དམར་ནག་ཁྲག་དྲོན་གཞུན་པའི་རྒྱུན་གྱིས་བར་སྐོར་བྱུ་རུའི་མདོག་ཏུ་བསྒྱུར།།སྲ་མཁྲེཊ་ལྕགས་ཀྱི་བཙོན་ཁང་ནང་ནས་བཙོན་པ་རྣམས་ཀྱིས་འོ་འདོད་འབོད།། ཤེས་ཡོན་ཅན་དང་གནད་ཡོད་ཕལ་ཆེར་ཁྱིམ་བྱ་བཞིན་དུ་ལྐོག་ནས་བཀུམས།།བགྲང་བྱ་བརྒྱད་ཅུའི་བགྲེས་སོང་རྣམས་ཀྱིས་མཁར་བའི་སྟེང་ནས་སྡུག་སྐད་འབྱིན།།ཕ་བསད་མ་བཟུང་བྱིས་པའ་ཁྱུ་ཚོགས་ངུ་འབོད་དྲག་པོས་ས་གཞིར་ཁེངས།།ལ་ལ་རྙི་ཐག་ཆད་པའི་བྱ་བཞིན་འགྱོད་གདུ་དྲག་པོས་ལྷོ་ཕྱོགས་བྲོས།། བརྩེ་མེད་ཁྲག་གི་དཔང་རྟགས་འདོགས་པའི་ལྗང་མདོག་གོས་ཅན་དམག་གི་དཔུང༌།།གྲོང་ཁྱེརཀྱལཁ་གྲའི་ཕྱོཊ་དང་ཕྱགས་མམས་ལུག་ཁྱུའཋ་མཐའ་ན་བཤན་པ་བཞི།གསོད་བཟུང་རྡུང་བརྡེག་ལས་ལ་ཞུཊ་ཚེ་དགའ་བའི་འཛུམ་རས་གདོང་ལ་ཤར།།ཆང་རག་ནག་མོས་མྱོས་པའི་དཔོན་རྣམས་ཁང་སྦུག་ཏུ་ར་རོར་གྱུར།། རྙིང་ཞིང་གུད་པའི་པུ་ཤུའི་འོག་ཏུ་ཁང་བྱིའུ་རྣམས་ཀྱིས་སྐྱོ་གདུང་བྱེད།།འདབ་ལོ་བྲལ་བའིསྡོང་སྐམ་རྩེ་ནས་སྐྱ་ཀ་དག་གིས་སྨེ་ངག་འདོན།།སྐྱེད་ཚལ་གུད་སྟེ་བུང་བ་རྣམས་ནི་འདབ་གཤོག་ཟད་ནས་རྣམ་ཤེས་ཡལ།།རྔོན་པས་བསྐོར་བའི་སྤང་གཤོང་དཀྱིལ་ན་རི་སྐྱེས་ཕལ་ཆེར་ཆོ་ངེར་འདོན།། ནག་ཀླུང་ཟད་ནས་རི་སྐྱེས་རྣམས་ནི་གཏད་སོ་མེད་པར་མཁའ་ལ་ལྡིང༎སྟག་གཟིག་དོམ་དང་བྱེའུའི་ཁྱུ་ཚོགས་སྡོད་ཁྱིམ་བྲལ་བས་མྱ་ངན་བྱེད།།སྐྱི་བསེར་གྲང་ལྷགས་རླུང་གིས་བདས་པས་རྩྭ་སྐྱ་འཇག་མས་ཀྱུར་གླུ་ལེན༎འདམ་རྩྭ་གསེབ་ནས་ངང་པ་རྣམས་ཀྱིས་འཇིཊ་དངས་དང་བཅས་རྒྱང་ལྟ་བྱེད།། ཀྱེ་མ་མེས་པོས་ཤུལ་དུ་བཞག་པའི་ང་ཡི་ཕ་ཡུལ་བསིལ་ལྡན་ལྗོངས།།སེམས་ལྡན་སྲོག་ཆཊ་རྣམས་དང་སེམས་མེད་རང་བྱུང་འབྱུང་བའི་ཁམས་རྣམས་ཀྱིས།།འོ་འདོད་པའི་ཆོེ་ངེ་སྒྲ་ཡིས་ས་གཞི་དག་ཀྱང་འདར་བྱེད་པ།།རང་བྱུང་འབྱུང་བ་འཁྲུགས་པ་ཡིན་ནམ་གཞན་གྱིས་བཙེས་པའིཚོར་བ་ལཊ།། དེ་ལྟར་བསམ་བཞིན་ཁོ་བོའི་སྙིང་ནས་བཟོདཐབས་མེད པའི་རྦ་རླབསཤིག།ཤག་ཤག་གྱེན་དུ་ཕྱུར་བའི་ཚུལ་ནི་རླུང་གིས་བསྐུལ་བའི་རྒྱ་མཚོ་བཞིན།།བདག་ནི་བ་ལང་གཅུན་ལྟར་འཁྱོག་པའི་གོམ་སྟབས་མགྲོན་ཁང་ཞིག་ཏུ་བསྒྱུར།། དེ་ན་བཞུགས་པའི་ཤེས་ལྡན་ཞིག་གིས་བདག་ལ་གསང་ཚིག་འདི་སྐད་སྨྲས།། བུ་ཁྱོད་སྐྱོ་ནས་སྤོབས་པ་མ་ཤོར་ཞུམ་མེད་སྙིང་སྟོབས་སེམས་ལ་འཆང༌།།ཞི་བའི་དེད་དཔོན་ཅི་གསུང་བཀའ་སྒྲུབས་གཞིས་བྱེས་ཆོལ་གསུམ་ཆིག་སྒྲིལ་མཛོད།།མེས་པོའི་རིག་གཞུང་ལེགས་པར་ཤེས་དེང་རབས་ཤེས་བྱའི་གནས་ལ་སློབས།།དམངས་གཙོའི་རུ་ཚོན་མཁའ་ལ་འཕྱར་ཏེ་འཚེ་མེད་ཞི་བའི་མཐའ་རྩོད་བྱོས།། དངུལ་དངོས་འབྱོར་བའིབསླུ་བྲིད་རྫས་ངན་ལྕགས་ཀྱུའི་ཁ་ཡི་ཉ་ཟོན་ཡིན།།ཆོས་དང་ཆོལ་ཁའི་ཕན་ཚུན་འཐེན་ཁྱེར་ཕུག་བསམ་གཅོད་པའི་སྟ་རེ་ཡིན།།སྤྱི་དོན་དོར་ནས་སྒེར་སེམས་འཆང་བ་ལ་རྒྱ་སྲེགས་པའི་མེ་ལྕེ་ཡིན༎དེ་ལྟར་བུ་ཁྱོད་བླང་དང་དོར་བྱའི་གནས་ལུགས་ལེགས་པར་མཁྱེན་མཛད་དང༌༎ ལྗང་མདོག་ཤོར་བའི་ཤིང་ལོ་དག་དང་བཀྲག་མདོག་ཉམས་པའི་མེ་ཏོག་རྣམས།།སྟོན་རླུང་རྩུབ་མའི་མཚོན་གྱིས་བཏབ་སེ་རྐང་པའི་རྡལ་དང་བསྲེས་ན་ཡང༌།།དྲོད་བག་ལྡན་པའི་དཔྱིད་ཀྱི་དཔལ་ཡོནམི་རིང་ཅིས་ཀྱང་ཤརབ ངེས།།དེ་ལྟརམིན་ན་དགུན་ཤིང་སྡོང་པོས་རེ་བའི་ངང་སྒུགས་སུ་ལ་བྱེད།། ནམ་མཁའི་མེ་ཏོག་སྐྱེས་བུར་གྱུར་ཏེ་མོ་གཤམ་བུ་ལ་ཞོན་ཡང་སྲིད།།རི་བོང་རྭ་ཡི་མེ་མདའི་ཁ་ནས་ཆུ་ནང་སྐར་མ་འཕེན་ཡང་སྲིད།།རྦ་རླབས་འཁྲུག་པའི་རྒྱ་མཚོ་ཀློང་ནས་དུས་མཐའི་མེ་ལྕེ་འབར་ཡང་སྲིད།།གངས་ཅན་རང་དབང་བདེན་པའི་ལོ་རྒྱུས་བསྐལ་པའི་མཐར་ཡང་ནུབ་མི་སྲིད།། ཁུ་བྱུག་སྔོན་མོས་དགའ་བའི་གླུ་དབྱངས་ལྷོ་ཡི་ཕྱོགས་ནས་ལེན་པར་ངེས།།ཁ་བ་རི་བའི་ལ་རྒྱའི་སྤྲིན་སྔོན་ལྷོ་ཡི་ཕྱོགས་ནས་ལྡིང་བར་ངེས།།པ་ཏྲའི་དབྱིབས་ཀྱིས་ཁྲུང་ཁྲུང་ཁྱུ་རྣམས་ལྷོ་ཡི་ཕྱོགས་ནས་འཕུར་བར་ངེས།།མུན་པའི་དགྲ་བོ་ཞི་བདེ་འོད་སྣང་ལྷོ་ཡི་ཕྱོགས་ནས་ཤར་བར་ངེས།། ཞེས་གསུངས་ངེས་བཞིའི་ཚིག་གི་གསང་བ་རྣ་བའི་སྤྲིན་གསེབ་ལྡིར་བ་ན།།ཡ་ཆུང་ངོས་ལ་འཇཊ་ཐབས་བྲལ་བའི་རེ་སྒུག་གདུང་འབོད་དབྱངས་སུ་གྱེས།།དེ་དང་ཆབས་གཅིག་སྣུམ་ནག་ལམ་ནས་མོ་ཊ་རྒྱུག་པའི་འུར་སྒྲ་ཡིས།།སྐྱོ་གདུང་འཁྲུཊ་པའི་རྨི་ལམ་གྲོང་ནས་འཇིཊ་དངངས་དང་བཅས་དཀྲོཊ་ཏེ་སད།། མགོ་བོ་བགྱེས་ཏེ་ཕན་ཚུན་བལྟས་པས་ལམ་འགྲུལ་ཕལ་ཆེར་རང་ཁྱིམ་ལོག།དམར་མདངས་གསལ་བའི་ཉི་མའི་ཐུན་མཚམས་ནུབ་རིའི་རྩེ་ནས་དལ་བུར་བསྐྱོད།།འདམ་སྐྱེས་རྣམས་ནི་འདབ་མ་བསྡུས་ཏེ་རྨི་ལམ་ཞིང་དུ་ཞུགས་པར་རྩོམ།།རྒྱ་སྐྱེད་ཤིང་དང་ཨ་མྲའི་གྲིབ་གཟུགས་ཇེ་རིང་ཇེ་རིང་གྱུར་ནས་ཡལ།། གནག་རྫིའི་བུ་རྣམས་མ་ཧེ་ཁྱུ་དང་བ་གླང་དང་བཅས་ཁྱིམ་དུ་དེད།།ཀོ་ཀི་ལ་དང་བྱེ་འུའི་ཁྱུ་རྣམས་གྲེ་འགྱུར་དང་བཅས་འཚང་ལ་འཕུར།།ཕྱོཊ་མཐར་གནས་པའི་གྲོང་ཁྱིམ་དག་གིས་དུ་སྤྲིན་ཀ་བ་མཁའ་ལ་འཛུག།གྲོད་ལྷུག་ངང་བའི་འགྲོས་དང་བསྟུན་ནས་བདག་ཀྱང་སྐྱོ་བཞིན་རང་ཁྱིམ་ལོག། གལ་ཏེ་ཁོ་བོ་འཕུར་རྩལ་ཤེས་པའི་འདབ་ཆགས་བྱེའུ་ཞིག་ཡིན་གྱུར་ན།།རླུང་བཞོན་ནམ་མཁའི་དབྱིངས་སུ་ལྡིང་ནས་རང་རིཊ་གཞིས་བྱེས་སྤུན་ཟླའི་བར།།གསང་འཕྲིན་སྐྱེལ་བའི་ཕོ་ཉ་བྱས་ཏེ་དགྱེས་འཛོམས་རང་དབང་བསྐྲུན་པའི་སླད།།བདོས་བཅས་ལུས་འདི་སྐྱ་ཁྲས་ཟོས་ཀྱང་འགྱོད་པའི་ཕོངས་སེམས་བདག་ལ་མེད།རྒྱ་གར་ཕྱོགས་མོན་གྷོ་འདོད་རྒུ་གླིང་དུ་1994་ལོར་བྲིས། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

ཟླ་བ་གཞོན་ནུ། བརྩེ་བ་འོད་ཀྱིས་འཕྲོ་བའི་ཟླ་ངོགས་ཀྱི་ལྡུམ་རྭ།།སེམས་པ་ཕྱག་གིས་འགྱོགས་པའི་ན་གཞོན་གྱི་བརྩེ་འདང༌།།བྱད་བཞིན་འཛུམ་དུ་འཁྱིལ་བའི་ཕྱུགས་ཆུང་གི་འཇོ་སྒེག།འདོད་ལྡན་མིག་དབང་འཕྲོག་པའི་གཞི་མ་རུ་བསྟབས་འདུག། མུ་ཏིག་ཚོམ་བུར་འཐོར་བའི་ཨ་སྔོན་གྱི་དབྱིངས་རིམ།།བརྩེ་བ་སྤྱན་ནས་འཛུམ་པའི་དགའ་མ་ཡི་ལང་ཚོ།།ཆེ་ཆེར་བཞད་ཅིང་འཚེར་བའི་སྐར་ཆེན་གྱི་མིག་ཞགས།།དུང་བ་སྙིང་ལ་འཇོ་བའི་སེམས་སོང་གི་རེ་སྨོན།། ཆུ་དྭངས་རྫིང་བུར་ཟགས་པའི་འོད་དཀར་གྱི་ཟླ་གཞོན།།ལྗང་སྣུམ་པད་འདབ་མཉེན་མོའི་སེང་རས་ཀྱི་ཕག་ནས།།ཤབ་ཤུབ་སྙིང་གཏམ་མཆེད་པས་མཚན་གུང་གི་ལྷིང་འཇགས།།དཀྲོགས་ལ་མཚར་སྣང་སྟོང་གི་རྣ་བ་དེ་བླགས་འདུག། སྐར་ཚོགས་བྱེ་བས་བཏུམས་པའི་ཉ་གང་གི་ཟླ་བ།།མཛའ་མོ་གློ་བ་དགའ་བའི་བཞིན་སྣོད་དུ་འདོད་ནས།།སྲིད་རིང་གནམ་སྐས་སྐྱོར་བའི་དགུ་ཚིགས་ཀྱི་རྨུ་ཐག།ཟླ་བ་ཕྱག་གིས་ལེན་པའི་རྨི་ལམ་དུ་བཟུང་འདུག། ཟླ་འོད་ཆེམ་ཆེམ་འབབ་པའི་སྟོན་གཞུང་གི་མཚན་ལྗོངས།།རོགས་ལོ་སེམས་རྩ་དྲོ་བའི་གཞི་མ་རུ་ཤེས་ནས།།དྭངས་གཙང་བྱིས་བློའི་སྦུབས་ཀྱི་ཉམས་ཆུང་གི་སེམས་པ།།ཉིན་བྱེད་དབང་པོ་འགོག་པའི་རྔུལ་ཆུ་རུ་འཐིམས་སོང༌།། མཁའ་ན་ཆེམ་གྱིས་བསྣར་བའི་རྒྱུ་སྐར་གྱི་མུ་ཏིག།མཛེས་ལྡན་སྙིང་ལ་འབབ་པའི་མགུལ་རྒྱན་དུ་བསམས་ཏེ།།རྒྱ་ཁབ་རྩེ་ལས་རྣོ་བའི་དུང་སེམས་ཀྱི་ཚོར་བས།།ཕྲ་རིང་ཕྱི་ཐག་དུང་གི་སྲད་བུ་ལ་བརྒྱུས་སོང༌།། ཡངས་པའི་ནེའུ་གསིང་སྤྲས་པའི་དུང་མདོག་གི་ཟླ་ཞུན།།སྒེག་མོའི་བརླ་ཤ་གསལ་བའི་རང་བྱུང་གི་སྣོན་པ།།ཁྲ་ཆིལ་བགྲང་ལ་ངལ་བའི་རྒྱང་རིང་གི་སྤྱན་འོད།།དགའ་སྣང་འབུམ་གྱིས་མྱོས་པའི་སྒྱུ་རྩལ་ལ་འཕྲོས་འདུག། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

བེ་རི་འཇིགས་མེད།སྤྱི་དང་བྱེ་བྲག་ཆོས་ཀུན་གསལ་ལེར་གཟིགས།།ཆོས་དང་ཆོས་མིན་རྣམ་པར་འབྱེད་ཅིང་བསལ།།བྱོན་དང་འབྱོན་འགྱུར་རྣམ་འདྲེན་ཀུན་གྱི་གཙོ།།སྲིད་དང་ཞི་བའི་མགོན་པོ་ཟས་གཙང་སྲས།། རྣམ་དག་ཆོས་དབྱིངས་གདོད་མའི་ཕ་མཁར་ནས།།རྣམ་གསུམ་མཁྱེན་པའི་བཞོན་རླུང་ཤར་བའི་ལྷ།།རྣམ་དག་མཚན་དཔེས་རབ་མཛེས་འཇམ་དཔལ་དབྱངས།།རྣམ་ཀུན་སྤྱི་བོའི་གཙུག་གི་རྒྱན་དུ་མཆོད།། ཀ་དག་གནས་ལུགས་སྒྲོ་འདོགས་མ་ཆད་པར།།ཁ་རྐྱང་སྐམ་པོས་མི་ཚེ་མཐར་སྐྱེལ་ཏེ།།ག་ལེར་བཏགས་པའི་མིང་ཙམ་ཐོབ་པ་ཡི།།ང་རྒྱལ་མངོན་རློམ་ཅན་དེ་ཆོས་པ་མིན།། ཅ་དངོས་མཁོ་སྒྲུབ་བྱི་བའི་འདུ་ལོང་གིས།།ཆ་སྤྱོད་ཆོས་བརྒྱད་འབྱོར་པའི་བང་མཛོད་ནས།།ཇ་ཐུག་སྐུ་འགྱེད་སྙན་པའི་མིང་གྲགས་ཕྱིར།།ཉ་གའི་འདེགས་འཇོག་རྩེན་དེའང་ཆོས་པ་མིན།། ཏ་ལའི་ཤིང་ལོ་རླུང་གིས་དེད་པ་ལྟར།།ཐ་གྲུ་གྲོང་སྡེ་རྣམས་སུ་ཁྱི་བཞིན་དུ།།ད་ལྟའི་ལྟོ་གོས་དོན་དུ་གྲོང་ཆོག་ལ།།ནར་མར་རྒྱུག་པ་དེ་ཡང་ཆོས་པ་མིན།། པ་ལོ་རལ་བའི་ཐོར་ཅོག་མགོ་ལ་བཅིངས།།ཕ་རིའི་ཁྱིམ་བཞག་ཚུར་རིའི་རྫ་སྲུབ་ཏུ།།བ་རྫིའི་སྒྲུང་མཁན་བྱ་བྲལ་བྱི་བའི་བུ།།མ་རབས་སྒོམ་ཆེན་དེ་ཡང་ཆོས་པ་མིན།། ཙཀྲ་གསུམ་གྱི་མདོ་སྔགས་དགོངས་འགྲེལ་ལ།།ཚ་གྲང་ཁྱད་གསོད་ཐོས་བསམ་མི་བྱེད་པར།།ཛ་ཡའི་སྲས་སུ་རློམ་པའི་ཆེར་རློམ་པ།།ཝ་སྐྱེས་སེང་ལྤགས་ཅན་དེའང་ཆོས་པ་མིན།།ཞྭ་དབྱིབས་རང་ལུགས་གྱོན་པ་ཤེས་ཙམ་གྱིས།།ཟ་གོས་དོན་དུ་གང་བྱུང་མང་བྱུང་གིས།།འ་རེ་འུ་རེར་བཀའ་ལུང་དབང་འཁྲིད་སོགས།།ཡ་མེད་རང་དགར་བྱེད་དེའང་ཆོས་པ་མིན།། ར་བ་གངས་ཅན་པ་ཡི་མདོ་སྔགས་ཆོས།།ལ་ལུང་གཞན་དུ་མི་ཚེ་སྐྱེལ་བའི་ཆེད།།ཤ་ཟིན་སྤུ་ཟིན་ཁུངས་མེད་ལུང་མེད་ཀྱིས།།ས་བསྲེ་སྡོ་བསྲེ་བྱེད་དེའང་ཆོས་པ་མིན།། ཧ་ལོ་དུག་འབྲས་མཚར་པའི་མེ་ཏོག་བཞིན།།ཧ་ཅང་སེམས་རྒྱུད་རྩུབ་པའི་མཁས་རློམ་ཅན།།ཧ་རེ་ཧོ་རེར་ཐོས་རྩོད་ལྷུར་བླངས་པའི།།ཧ་ལས་མཁས་གྲགས་ཅན་དེའང་ཆོས་པ་མིན།། ཨ་དོན་སྐྱེ་མེད་སྨྲ་བའི་རིགས་པའི་འཕྲུལ།།ཨཱརྱ་དེ་བའི་དཔལ་ལ་འགྲན་བཟོད་ཅིང༌།།ཨ་ཅརྱ་ཡི་སྙན་པའི་མིང་ལྡན་ཡང༌།།ཨ་རེ་ཉམས་ལེན་མེད་ན་ཆོས་པ་མིན།། ཨ་མཆོད་ཆོས་ཀློག་ནེ་ཙོའི་མ་ཎི་ཡིས།།ཨ་འཐས་མི་ཚེ་ཕུད་ཐབས་མི་བྱེད་པར།།ཨ་དོན་མཁས་པའི་བཤེས་ལ་བསམ་སྦྱོར་གྱིས།།ཨ་མ་བཞིན་དུ་སྟེན་དེ་ཆོས་པ་ཡིན།། ཧ་ཅང་རྙེད་དཀའི་དལ་བྱོར་རྟེན་བཟང་པོ།།ཧ་ཧ་ཧོ་ཧོ་ངང་དུ་མི་སྐྱེལ་བར།།ཧ་ལོའི་དུག་དང་འདྲ་བའི་འཁོར་བ་ལས།།ཧ་རེར་ཐར་ཐབས་བྱེད་དེ་ཆོས་པ་ཡིན།། ས་འོག་ས་སྟེང་ས་བླར་གནས་པ་ཡི།།ཤ་ཚ་སྙིང་རྗེའི་སྤྱོད་ཡུལ་ལུས་ཅན་ཀུན།།ལ་འུར་འཁོར་བའི་མཚོ་ལས་སྒྲོལ་བའི་ཕྱིར།།རྭ་འཁྱོག་སེམས་རྒྱུད་སྲོང་ན་ཆོས་པ་ཡིན།། ཡ་རབས་ཕྱི་སྤྱོད་ཉེ་བར་འཁོར་བཞིན་དུལ།།འ་འུར་སྐྱེས་སྦྱངས་ཤཱ་རིའི་བུ་ལྟར་འབར།།ཟ་འོག་ཞྭ་བཀྲ་ལྷམ་མཛེས་མི་དགོས་པར།། ཞྭ་གོས་ཆོག་ཤེས་སྤྱོད་ན་ཆོས་པ་ཡིན།།ཝ་ལེར་ངེས་དོན་དཀའ་གནད་ལེགས་རྟོགས་ནས།།ཛ་ཡའི་ལུགས་བཟང་བཤད་པས་སྤེལ་བ་དང༌།།ཚ་གྲང་ཁྱད་བསད་སྒྲུབ་པའི་རྒྱལ་མཚན་དཔལ།།ཙ་ཀུ་ར་ལྟར་འཛིན་ན་ཆོས་པ་ཡིན།། མ་གྱུར་འགྲོ་བའི་སྡུག་བསྔལ་གསུམ་གྱི་ནད།།བ་རུ་ར་སོགས་ལྷག་བསམ་བཟང་དྲུག་གི།ཕ་རོལ་ཕྱིན་པའི་སྨན་གྱི་སྦྱོར་བ་ལ།།པ་སངས་མདངས་ཀྱིས་མཛེས་ན་ཆོས་པ་ཡིན།། ན་འཆིའི་གདུང་བ་རྩད་ནས་འཇོམས་པའི་ཕྱིར།།ད་ལྟའི་མི་ཚེའི་ཆེད་དུ་མི་བྲེལ་བར།།མཐའ་བྲལ་ལྟ་སྤྱོད་སྒོམ་པའི་ལམ་བཟང་འབུམ།།ཏ་ལེར་ཡིད་ལ་ཤར་ན་ཆོས་པ་ཡིན།། ཉ་ཉོག་བསྲེས་པའི་ཆོས་བརྒྱད་མ་འདྲེས་པར།།ཇ་ཧང་མདངས་མཛེས་མིང་དོན་གཉིས་མཚུངས་ཀྱིས།།ཆ་ལུགས་ཚངས་སྤྱོད་བྱ་བྲལ་སྤྱོད་པ་ཡིས།།ཅ་གེ་བློས་གཏོང་ནུས་ན་ཆོས་པ་ཡིན།། ང་འཛིན་མེད་པའི་ཆོས་ཕུག་སྤྲང་ལ་བརྟེན།།ག་སར་མི་རྒྱུག་སྤྲང་ཕུག་ཤི་ལ་བརྟེན།།ཁ་ཞེ་མེད་པའི་ཤི་ཕུག་བྲག་ལ་བརྟེན།།ཀ་ཁོལ་སྙིང་ལ་བཅང་ན་ཆོས་པ་ཡིན།། ཆོས་དང་ཆོས་མིན་འབྱེད་པའི་བློ་མིག་ཅན།།ཆོས་ལ་རྩེ་གཅིག་སྒྲིམ་པའི་དཀའ་སྤྱོད་མཁན།།ཆོས་ལམ་འཛུད་ནས་ཚུལ་བཞིན་སྒྲུབ་པ་ཡི།།ཆོས་པ་དེ་དག་སུ་ཡིས་སྨད་པར་བྱེད།། ཆོས་བཞིན་ཆོས་ཀྱི་ཚུལ་ལུགས་འབྱེད་པའི་འཕྲུལ།།ཆོས་ཀྱི་རྗེས་འབྲངས་རིགས་པ་སྨྲ་བའི་དཔལ།།ཆོས་ཀྱི་རྒྱལ་མཚན་འཛིན་པ་དེ་དག་ནི།།ཆོས་ལྡན་རྒྱལ་ཁམས་མཛེས་པའི་རྒྱན་གཅིག་ཡིན།། ཆོས་པའི་སྤྱི་ཚོགས་སྒྲིག་གི་སེང་གེའི་པགས།།ཆོས་མིན་ལོག་པར་སྒྲུབ་པའི་ཝ་སྐྱེས་ཀྱིས།།ཆོས་བརྒྱད་རྫི་ཡིས་མྱོས་ཏེ་གྱོན་པས་ན།།ཆོས་དད་ཅན་རྣམས་མ་བརྟགས་སུན་སྣང་སྐྱེས།། ཆོས་རྗེས་འབྲངས་པའི་རྣམ་དཔྱོད་མི་ལྡན་ཞིང༌།།ཆོས་ཀྱི་གནས་ལུགས་ཚུལ་བཞིན་མི་ཤེས་པར།།ཆོས་པའི་སྒྲིག་ཞུགས་དཀོར་ནག་དུག་ཟོན་པས།།ཆོས་ཀྱི་སྲོལ་བཟང་སྲོག་གི་རྩ་བར་གཟན།། ཆོས་ཚུལ་ལེགས་ཉེས་ཇི་བཞིན་མི་འབྱེད་པར།།ཆོས་གཟུགས་སྤྱོད་ངན་འགའ་ཡི་རྒྱུ་མཚན་གྱིས།།ཆོས་མེད་ཅོལ་ཆུང་འགའ་ཞིག་གྱ་ཚོམ་དུ།།ཆོས་ལ་སྐུར་བའི་བབ་ཅོལ་སྨྲ་བྱེད་མོད།། ཆོས་ལྡན་རྒྱལ་ཁབ་ཁ་བ་རི་བའི་ཞིང༌།།ཆོས་བཞིན་སྐྱོང་བའི་སྔོན་གྱི་དམ་པ་རྣམས།།ཆོས་སྲིད་ལུགས་གཉིས་དར་ཆེན་བསྒྲེངས་པ་ཡང༌།།ཆོས་དང་ཆོས་པའི་གཞི་རྩའི་ལག་རྗེས་ཡིན།། ཆོས་མིན་སྤྱོད་པ་འགའ་ཞིག་ལ་བརྟག་པའི།།ཆོས་པའི་བླང་དོར་དྲང་པོར་ཅུང་ཞུས་པར།།ཆོས་བརྒྱད་མངོན་རློམ་ཅན་རྣམས་ཁྲོ་འགྱུར་མོད།།ཆོས་སེམས་ཅན་རྣམས་ཅིས་ཀྱང་དགའ་བར་རིགས།། ཆོས་པ་ཡིན་མིན་འབྱེད་པའི་རབ་བྱེད་འདིའང༌།།ཆོས་ལ་ཕན་པའི་ལྷག་བསམ་ལྷུར་བླངས་ཏེ།།ཆོས་ལྡན་རྒྱལ་པོའི་འཁོར་འབངས་འཇིགས་མེད་པས།།ཆོས་སྡེ་ཆེན་པོ་འབྲས་སྤུངས་གླིང་དུ་བྲིས།། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

རྩོམ་པ་བོ། སྒོ་ཡོན་ཏན་བཟང་བོ། ཉི་འོད་མེད་ཅིང་ཟླ་བ་མི་གསལ་བའི།།སྨག་རུམ་མཐུག་པའི་ཕ་གིའི་རི་སྒང་དེར།།འཁར་བ་མེད་པའི་ན་གཞོན་ཁེར་རྐྱང་ཞིགའཚོལ་སྙེག་ཁྲོད་ནས་མདུན་དུ་འགྲོ་བཞིན་ཡོད།། ཁྱོད་ནི་ཡུལ་འདིའི་དྲང་སྲོང་མ་ཡིན་ལ།།ཁྱོད་ནི་ས་འདིའི་དར་ཆ་མ་བྱས་མོད།།རང་གི་མིག་ལ་རང་ཉིད་ཡིད་རྟོན་པའི།།མི་བུ་ཁྱོད་ལ“ལྟ་ལོག་པ”ཞེས་འབོད།། ལྟ་ལོག་པ་ལ་རྒྱུ་དང་དབང་ཤུགས་མེད།།ལྟ་ལོག་པ་ལ་གཟུགས་དང་གཡོ་བསླུ་མེད།།ལྟ་ལོག་པ་ཡི་བདེན་པའི་ལྕེ་རྩེ་ཡིས།།འཇིག་རྟེན་བྱ་བ་དྲང་པོས་སྨྲ་བར་འདོད།། གནས་ལུགས་རྡོག་པས་བརྫི་བའི་རི་གྲོང་ན།།རྩིས་ཐང་མཆིལ་མས་འདེད་པའི་མི་ཚོགས་ཁྲོད།།སྤོབས་པའི་མགོ་བོ་ས་ལ་མི་གཞག་པར།།ལྟ་ལོག་པ་ཡིས་འོས་ལངས་རྩོམ་བཞིན་འདུག། མཚན་ཉིད་རིག་པའི་དམག་འཁྲུགས་སློང་བ་དང༌།།བསམ་བློ་གསར་བའི་རྣོ་ངར་བརྡར་བ་སོགས།།སྣ་ཚོགས་འཁོར་བའི་གྲུ་ཁ་ཐམས་ཅད་ལ།།ལྟ་ལོག་པ་ཡིས་མིག་མྱུལ་བྱེད་ཀྱིན་མཆིས།། དགྲ་དང་གཉེན་གྱི་ཁྱད་པར་མ་ཡོད་ལ།།ཕོ་དང་མོ་ཡི་དབྱེ་བ་མི་བཀར་བར།།མི་དོན་བོར་ལ་ཞེན་ལོག་བལྟ་བ་དེ།།ལྟ་ལོག་པ་ཡི་ཆོད་སེམས་ཐོག་མ་ཡིན།། ཐོབ་ཀྱིས་སྟོང་བའི་རྒན་གཞོན་སུ་ཡང་རུང༌།།ནོར་གྱིས་དབུལ་བའི་མཁས་བླུན་ཅི་ཡང་ཆོག །ལེགས་པར་བཤད་ལ་ཞྭ་ལྟར་གཅེས་པ་དེ།།ལྟ་ལོག་པ་ཡིས་ཁྱད་ཆོས་ཉིད་དུ་བརྩི།། རང་གི་སྒལ་ཚིགས་གཞན་ལ་མི་སྟེར་ཞིང༌།།གཞན་གྱི་རྒྱུ་འབྲས་རང་གིས་མི་བསྣོག་པའི།།མི་ཡི་བློ་སྟོབས་གནམ་ལ་ཕྱར་བ་དེ།།ལྟ་ལོག་པ་ཡིས་ཨུ་ཚུགས་བྱེད་ས་ཡིན།། སྤྲེལ་ལད་ཅན་གྱིས་བཀུར་བསྟི་བྱེད་དང་གཅིག།འབྱོར་ལྡན་ཆེན་པོས་མགྲོན་འབོད་གཏོང་དང་གཉིས།།གཡོ་ཅན་བླུན་པོས་ཟུར་ཟ་སྒྲུབ་དང་གསུམ།།ལྟ་ལོག་པ་འདིས་སྣ་དགོད་འཆོར་ས་ཡིན།། སེམས་པ་སྐྱོ་བས་སྙིང་རླུང་འཚང་བ་དང༌།།འཚོ་བས་ཕོངས་ཏེ་ལུས་པོ་མནར་བའི་དུས།།རང་གི་སྐད་སྒྲས“རང་དབང”འབོད་པ་འདི།།ལྟ་ལོག་པ་ཡི་གོམ་གཤིས་ཡིན་པར་ངེས།། གདོང་གི་ཚུལ་འཆོས་གདོད་ནས་འཇགས་པ་དང༌།།ནང་གི་བརྩེ་བ་རྩད་ནས་སློང་བ་སྟེ།།ཤ་དར་ཁྲག་དར་ཅན་གྱི་ལྟ་ལོག་འདི།།ལྟ་བ་དབུ་མར་བརྙེས་པའི་གླེན་པ་ཡིན།། ནང་བསྟན་ཐེག་པའི་སྲོག་ཤིང་མ་དོར་ཞིང༌།།མར་ལེ་རང་ལུགས་བྲན་དུ་མ་བཀོལ་བའི།།སྐྱ་མིན་སེར་མིན་ལྟ་ལོག་ཁྱོད་འདྲའི་རིགས།།ཡང་དང་ཡང་དུ་སྲིད་འདིར་འབྱུང་གྱུར་ཅིག ། 2009.6.16ཉིན་ཁམས་གསེར་ཐང་དུ་བྲིས། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།