Category: ནང་ཆོས།

གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

༄༅། །རྒྱ་གར་སྐད་དུ། ཨཱརྱ་ཨཀྵི་རོ་ག་པྲ་ཤ་ས་ཎི་སྰུ་ཏྲ། བོད་སྐད་དུ་འཕགས་པ་མིག་ནད་རབ་ཏུ་ཞི་བར་བྱེད་པའི་མདོ་སངས་རྒྱས་དང་བྱང་ཆུབ་སེམས་པ་ཐམས་ཅད་ལ་ཕྱག་འཚལ་ལོ།། འདི་སྐད་བདག་གི་ཐོས་པ་དུས་གཅིག་ན། བཅོམ་ལྡན་འདས་རྒྱལ་པོའི་ཁབ་ན་བྱ་རྒོད་ཕུང་པོའི་རི་ལ་བཞུགས་ཏེ། དེ་ནས་གནོད་སྦྱིན་གྱི་སྡེ་དཔོན་ཆེན་པོ་ནག་པོ་བཅོམ་ལྡན་འདས་ག་ལ་བ་དེར་སོང་སྟེ། ཕྱིན་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་རྒྱལ་པོའི་ཁབ་གྲོང་ཁྱེར་ཆེན་པོ་འདིར་མིག་ནད་བྱུང་ན་དེ་དག་ལ་ཇི་ལྟར་སྒྲུབ་པར་གྱིས། བཅོམ་ལྡན་འདས་ཀྱིས་བཀའ་སྩལ་པ། ནག་པོ་མིག་ནད་ཀྱི་སྔགས་ཀྱི་ཚིག་འདི་དག་ཡོད་དེ། ཏ་དྱ་ཐ། རུ་དྷི་རེ་ཕུ་ར་དྷི་ར། ཨཀྵི་ཕུ། རུ་དྷ་རི་པིྃ་ག་ལེ་ཕུ། བྷ་ཏེ་ཕུཿཧ་ན་ཏེ་ཕུཿམཱཾ་ས་དུ་དྷུ་བྷི་ཕུ། པད་མ་ཨཀྵི་ཕུ། པད་མ་དཎྜ་ཧི་ར་ཎི་ཡེ་ཕུ་སཱཧཱ། བཅོམ་ལྡན་འདས་ཀྱི་དེ་སྐད་ཅེས་བཀའ་སྩལ་ནས་གནོད་སྦྱིན་གྱི་སྡེ་དཔོན་ཆེན་པོ་ནག་པོ་ཡི་རངས་ཏེ་བཅོམ་ལྡན་འདས་ཀྱི་གསུངས་པ་ལ་མངོན་པར་བསྟོད་དོ། ། ཆོ་ག་ནི་འདི་ཡིན་ཏེ། སྲད་བུ་དཀར་པོ་ལ་ལན་བདུན་བཟླས་པ་བྱས་ཏེ། མདུད་པ་མདུན་བོར་རོ། །ཆུ་ལ་ལན་བདུན་བཟླས་པ་བྱས་ལག་པས་བྱབས་ན། མིག་ནད་ཞི་བར་འགྱུར་རོ། །འཕགས་པ་མིག་ནད་ཞི་བར་བྱེད་པའི་མདོ་རྫོགས་སོ།། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

ཁུ་ནུ་བླ་མ་བསྟན་འཛིན་རྒྱལ་མཚན་མཆོག ༡༽ བདག་ནི་སངས་རྒྱས་དེ་ཡི་ཆོས།།དེ་ཡི་རྗེས་སུ་འཇུག་རྣམས་ལ།།མི་ཕྱེད་པ་ཡི་དད་པས་ལྟ།།སྐྱབས་སུ་འགྲོ་ཞིང་སྨོན་པའང་བགྱིད།། ༢༽ ཕན་པར་བཞེད་པ་ཟླ་བ་ཡི།།ཆ་ཤས་རྫོགས་པ་ལས་བྱུང་བ།།བཅོམ་ལྡན་འགྲོ་བའི་བླ་མ་སྟེ།། སྲིད་ན་ཚད་མས་གཞན་མི་རྙེད།། ༣༽ གང་གི་གསུང་ལས་བྱུང་བ་ཡི།།དོན་གྱི་ཡིད་བཞིན་ནོར་བུ་ལ།། གཞན་སྡེའི་ལེགས་བཤད་ལྟར་སྣང་བའི།། མཆིང་བུས་འགྲན་པར་ག་ལ་བཟོད།། ༤༽ གང་ལ་གཟུར་གནས་བློ་ལྡན་པ།།དཔྱད་པ་གསུམ་གྱིས་ཡོངས་བརྟགས་པའི།།ཐུབ་བསྟན་མཆོག་ལ་པད་རྫིང་ལྟར།།མཐོང་ནས་ངང་པའི་ཚུལ་གྱིས་འཇུག། ༥༽ རང་གཞན་ཕུན་སུམ་ཚོགས་པའི་གནས།།གཞན་གྱིས་ཤེས་མིན་ལ་སོགས་པའི།།ཡོན་ཏན་བརྒྱད་ལྡན་སངས་རྒྱས་ལ།།སུ་ཞིག་སྐྱབས་སུ་འཛིན་མི་བྱེད།། ༦༽ བདེན་པ་གཉིས་ཀྱི་མཚན་ཉིད་དང༌།།བསམ་མེད་གཉིས་སུ་མེད་པ་སོགས།།ཡོན་ཏན་བརྒྱད་ལྡན་དམ་པའི་ཆོས།།སུ་ཞིག་གི་ནི་སྐྱབས་མ་ཡིན།། ༧༽ ཆགས་ཐོག་དམན་པའི་སྒྲིབ་ལས་གྲོལ།།ཇི་ལྟ་ཇི་སྙེད་ནང་རིག་པ།།རིག་གྲོལ་ཡོན་ཏན་བརྒྱད་ལྡན་པའི།།འཕགས་ཚོགས་སུ་ཡི་སྐྱབས་གནས་མིན།། ༨༽ བྱམས་པའི་ཆུ་དང་སྙིང་རྗེའི་སར་རྒྱས་པ།།བྱང་ཆུབ་སེམས་ཀྱི་དཔག་བསམ་ལྗོན་པ་ཆེ།།སྐྱེས་བུའི་འདོད་དོན་བདེ་བླག་འགྲུབ་པའི་དཔེ།། དབྱངས་ཅན་མགྲིན་པར་གནས་ཀྱང་རྙེད་དཀའ་སྙམ།། ༩༽ ཇི་ལྟར་བྱང་ཆུབ་སེམས་མཆོག་གི།ཕན་པའི་བསམ་པས་འགྲོ་ཀུན་ཁྱབ།།དེ་ལྟར་ཕ་མ་དྲང་སྲོང་དང༌།།ཚངས་པ་ལ་ཡང་ག་ལ་སྲིད།། ༡༠༽ མེ་ཏོག་དབུས་ན་པུབྱྜརི་ཀ་བཞིན།།དགེ་སེམས་ཀུན་གྱི་ནང་ན་བྱང་ཆུབ་མཆོག།དེ་དང་ལྡན་ན་འཕྲལ་དང་ཕུགས་སུ་བདེ།།དེ་ཕྱིར་འབད་པ་ཀུན་གྱིས་བསྐྱེད་པར་བྱ།། ༡༡༽ རྣམ་པ་ཐམས་ཅད་མཁྱེན་པ་ཡང༌།།བྱང་ཆུབ་སེམས་མཆོག་ཁོ་ན་ལས།།འབྱུང་ཕྱིར་གྲོལ་བར་འདོད་པ་དག། འདི་ལ་ནན་ཏན་བྱ་བར་འོས།། ༡༢༽ རང་དང་གཞན་གྱི་དོན་བྱེད་པའི།།ཐབས་མཆོག་ཅི་ཞེས་དཔྱད་པ་ན།།རིན་ཆེན་བྱང་ཆུབ་སེམས་འབའ་ཞིག།ཡིན་པར་ངེས་ནས་དགའ་བས་བསྐྱེད།། ༡༣༽ འབྲས་བུ་ལན་གཅིག་མི་འབྱིན་བྱང་སེམས་དགེ།རྣམ་མཁྱེན་བར་བུ་མི་ཟད་ཡོངས་སུ་འཕེལ།།རྣམ་མཁྱེན་རེག་ནས་གཟུགས་སྐུའི་ཆུ་འཛིན་ལས།།དམ་ཆོས་ཆར་གྱིས་འགྲོ་དགེ་མྱུ་གུ་རྒྱས།། ༡༤༽ རིག་པའི་ནང་ན་ནང་དོན་རིག།རིན་ཆེན་ནང་ན་ཡིད་བཞིན་ནོར།།མྱུར་འགྲོའི་ནང་ན་ཅང་ཤེས་ཏེ།།སེམས་ཀྱི་ནང་ན་བྱང་ཆུབ་སེམས།། ༡༥༽ ཉི་མ་ཟླ་བ་སྒྲོན་མ་གློག་གི་ཕྲེང༌།།གསལ་མོད་ནང་གི་མུན་སྟུག་ག་ལ་སེལ།།བྱང་ཆུབ་སེམས་འདི་འགྲོ་བའི་ནང་གི་སྨག།མཐའ་དག་རྩད་ནས་འབྱིན་པར་དམ་པས་བསྔགས།། ༡༦༽ ཕན་བདེ་ཀུན་གྱི་འབྱུང་བའི་གནས། །རྒྱལ་བའི་སྲས་ཀྱི་བྱང་ཆུབ་སེམས། །དེ་ལ་ཡིད་བཞིན་ནོར་བུ་ཡིས། །འགྲན་པའི་ནུས་པ་ཡོད་རེ་སྐན། ། ༡༧༽ ཆུ་ཤིང་རང་འབྲས་བསྐྱེད་ནས་འཛད། །སླར་ཡང་འབྲས་བུ་འབྱིན་མི་ནུས། །བྱང་ཆུབ་སེམས་ཀྱིས་ཟིན་པའི་དགེ །འབྲས་བུ་འབྱིན་པར་མི་ཟད་འཕེལ། ། ༡༨༽ ཡོངས་འདུ་ས་བརྟོར་རྩར་བྱིན་ནས། །སྨོན་ན་དེ་བཞིན་འདོད་དོན་འགྲུབ། །བྱང་ཆུབ་སེམས་ཀྱང་འགྲོ་བ་ཡི། །འདོད་དོན་རྫོགས་པར་བྱེད་ལ་དབང༌། ། ༡༩༽…

ཇོ་བོ་རྗེ་དཔལ་མར་མེ་མཛད་ཀྱིས་མཛད། ༄༅༅། །ཁ་ཏོན་དང་གླེགས་བམ་ཀླག་པའི་སྔོན་དུ་བྱ་བའི་ཆོ་ག༌།སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་ཕྱག་འཚལ་ལོ། །དང་པོ་རེ་ཞིག་བྱང་ཆུབ་སེམས་དཔའ་ཆོས་ཁ་ཏོན་དུ་བྱ་བར་འདོད་པ་དང་གླེགས་བམ་དུ་བྱ་བ་ཀློག་པར་འདོད་པས་ཕྱོགས་བཅུའི་འཇིག་རྟེན་གྱི་ཁམས་ཀྱི་སངས་རྒྱས་དང་བྱང་ཆུབ་སེམས་དཔའ་ཐམས་ཅད་ལ་གསོལ་བ་བཏབ་སྟེ། ཡིད་ཀྱིས་ཀུན་དུ་དམིགས་ལ། བྱང་ཆུབ་སེམས་དཔའ་སེམས་དཔའ་ཆེན་པོ་ཀུན་དུ་བཟང་པོའི་སྤྱོད་པའི་སྨོན་ལམ་གྱི་ཆོ་གས། ཕྱག་འཚལ་བ་ལ་སོགས་པ་ཡན་ལག་བདུན་གྱི་ཚུལ་དུ་མཆོད་པ་རྣམས་ཀྱིས་ཡང་དག་པར་མཆོད་དོ། །དེའི་རྗེས་ལ་སེམས་ཅན་ཐམས་ཅད་ལ་བྱམས་པའི་སེམས་ཉེ་བར་གཞག་སྟེ། ཡང་དག་པའི་ལྷག་པའི་བསམ་པས་དེ་ལྟར་བསམས་པའི་རྗེས་ལ། ཚིག་ལན་གསུམ་བརྗོད་པར་བྱ་བ་ནི། བཅོམ་ལྡན་འདས་ཀྱིས་གསུངས་པའི་ཆོས་ཀྱི་ཚིག་གཅིག་གི་དོན་གང་ཡིན་པ་དེ་ནི་ཆོས་ཐམས་ཅད་ཀྱི་ཡང་ཡིན་ན། འོན་ཀྱང་བདག་ནི་རང་གི་ལས་ཀྱི་ཉེས་པས་ཤེས་རབ་ཆུང་ཞིང་བློ་ཞེན་ཏེ། དེ་ལྟ་ཡིན་དུ་ཟིན་ཀྱང༌། གང་བཅོམ་ལྡན་འདས་ཀྱི་གསུང་རབ་བཟུང་ནས་དེས་བདག་གི་ཁ་ཏོན་བྱས་ཏེ། ཆོས་ཀྱི་སྒྲ་དེ་སེམས་ཅན་གང་གི་རྣ་ལམ་དུ་གྲག་པ་དེ༑ དེ་བཞིན་གཤེགས་པའི་སྤོབས་པ་ཐེབ་པར་གྱུར་ཅིག །བཅོམ་ལྡན་འདས་ཀྱིས་གསུངས་པའི་ཆོས་ཚིག་གཅིག་གི་དོན་གང་ཡིན་པ་དེ་ནི། ཆོས་ཐམས་ཅད་ཀྱི་ཡང་ཡིན་ན། འོན་ཀྱང་བདག་ནི་རང་གི་ལས་ཀྱི་ཉེས་པས་ཤེས་རབ་ཆུང་ཞིང་བློ་ཞེན་ཏེ། དེ་ལྟར་ཡིན་དུ་ཟིན་ཀྱང༌། གང་བདག་གིས་གླེགས་བམ་དུ་བྱས་པའི་ཆོས་ཀླག་པར་བྱ་སྟེ། ཆོས་ཀྱི་སྒྲ་དེ་སེམས་ཅན་གང་རྣམས་ཀྱི་རྣ་ལམ་དུ་གྲག་པ་དེ་དག །དེ་བཞིན་གཤེགས་པའི་སྤོབས་པ་ཐོབ་པར་གྱུར་ཅིག །ཅེས་ལན་གསུམ་དུ་བརྗོད་པར་བྱའོ། །ཁ་ཏོན་དང་གླེགས་བམ་ཀླག་པའི་ཆོ་ག༌།སློབ་དཔོན་མཁས་པ་ཆེན་པོ་དཔལ་མར་མེ་མཛད་ཡེ་ཤེས་ཀྱི་ཞལ་སྔ་ནས་མཛད་པ་རྫོགས་སོ།། །། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།