དེ་རིང་ང་འབའ་ཐང་དུ་ཐོན་ཡོད།

འབའ་བ་ཕུན་ཚོགས་དབང་རྒྱལ་ལགས་ལ་ཕུལ།

འཇིགས་བྱེད་ཚེ་རིང༌།

 
དྲིན་ཆེན་ཨ་མའི་བྱམས་བརྩེ་ཡོད་སའི་ཁྱེད་ཀྱི་ཕ་ཡུལ་འབའ་ཐང་འདི།།
དྲིན་ལྡན་ཕ་ལོའི་ཁ་ཏ་ཡོད་སའི་ཁྱེད་ཀྱི་ཕ་ས་འབའ་ཐང་འདི།།
མཐོན་པོའི་སྤྲིན་དཀར་ཐོད་དུ་བཏེགས་ནས་དེ་རིང་ཨ་ཕོ་ཐོན་ནས་ཡོད།།
ལེ་དབར་སྟོང་གི་ལམ་ཐག་བཅད་ནས་དེ་རིང་འདིར་རུ་སླེབས་ནས་ཡོད།།
 
རྩྭ་ཐང་སྟེང་གི་མེ་ཏོག་དེ་ཚོ་ཁྱེད་ཀྱི་མཛེས་ཉམས་ཨེ་ཡིན་བསམ།།
དྭངས་ཤིང་གསལ་བའི་ཆུ་ཕྲན་འདི་དག་ཁྱེད་ཀྱི་ཁྲག་རྒྱུན་ཨེ་ཡིན་བསམ།།
རི་བོའི་རྩེ་མོ་སྤྲིན་དང་འདྲེས་པ་ཁྱེད་ཀྱི་སྤོབས་པ་ཨེ་ཡིན་བསམ།།
དེ་རིང་དགུང་གི་ཉི་མ་འདི་ཉིད་ཁྱེད་ཀྱི་ཞལ་རས་ཨེ་ཡིན་བསམ།།
 
མི་ལོ་བཅོ་བརྒྱད་བཙོན་དུ་བཅུག་པ་ཕ་ས་འདི་ཡི་ཆེད་དུ་ཡིན།།
གཞན་གྱིས་ཁྱེད་ལ་ཞྭ་མོ་གཡོགས་པ་ཕ་ཡུལ་འདི་ཡི་ཆེད་དུ་ཡིན།།
མར་ལེ་རིང་ལུགས་ནན་གྱིས་བསླབས་པ་བོད་པ་ཚང་གི་ཆེད་དུ་ཡིན།།
མི་སེར་རྒྱལ་ཁབ་ངོ་རྒོལ་བྱས་པ་ཕ་ཁྱིམ་འདི་ཡི་ཆེད་དུ་ཡིན།།
 
ཁྱེད་ཀྱི་གཅེས་པའི་ཕ་ཡུལ་འདི་ཡང་ད་དུང་གཞན་གྱི་དབང་དུ་ཡོད།།
ཁྱེད་ཉིད་དགའ་བའི་འབའ་ཐང་འདི་ཡང་ད་དུང་ཕམ་ཁའི་ཀློང་དུ་ཡོད།།
ཁྱེད་ཀྱི་ཕུ་ནུ་གཉེན་ཉེ་དེ་ཚོར་ད་དུང་བཤུ་གཞོག་གཏོང་མཁན་ཡོད།།
ཁྱེད་ཀྱི་ཕུགས་བསམ་དར་དཀར་འདྲ་བོ་ད་དུང་མ་འགྲུབ་ལྷག་ནས་ཡོད།།
 
དཔའ་རྒོད་སྟོང་གི་ཟུངས་ཁྲག་བཞུར་ས་ཁྱེད་ཀྱི་ཕ་ཡུལ་འབའ་ཐང་རེད།།
སྨན་ཆུང་བརྒྱ་ཡི་ཤེས་རབ་རྒྱས་ས་ཁྱེད་ཀྱི་ཕ་ཡུལ་འབའ་ཐང་རེད།།
ཕ་ཡུལ་འབའ་ཐང་ཡིད་ལ་དྲན་ནས་ཁྱེད་ཀྱིས་མིག་ཆུ་ཨེ་ཤོར་ཐལ།།
ཕ་ས་འཛིན་འདོད་སེམས་ལ་འཆར་ནས་ཁྱེད་ཀྱིས་འོ་བརྒྱལ་ཨེ་མྱོང་ཐལ།།
 
མི་རིགས་འདི་ཉིད་སེམས་ལ་ཉར་ནས་ལོ་ཟླའི་འཁོར་སྐར་ག་ཚོད་འགོར།།
བོད་པ་ཚང་གི་བདེ་སྐྱིད་ཆེད་དུ་རྨི་ལམ་རྨིས་ནས་ག་ཚོད་འགོར།།
བོད་འབངས་ཡོངས་ཀྱི་འཚོ་གནས་ཕྱིར་དུ་འདུར་རྒྱུག་བྱས་ནས་ག་ཚོད་འགོར།།
ད་དུང་མ་འགྲུབ་སེམས་འཁུར་དེ་ཡིས་སྡུག་ལ་སྦྱར་ནས་ག་ཚོད་འགོར།།
 
ཁ་ཐག་རིང་བའི་སྐུ་མགྲོན་ང་ནི་མདོ་སྨད་ཨ་མདོའི་ཕྱོགས་ནས་ཡིན།།
ཁ་མིན་སྙིང་གི་སེམས་གཏམ་འདི་དག་ཁྱེད་ལ་ལེགས་སྐྱེས་ཁྱེར་ནས་ཡོད།།
ཁ་སེམས་མཐུན་པའི་སྤུན་ཟླ་ཁྱེད་ལ་མ་མཇལ་སེམས་པ་སྡུག་ནས་ཡོད།།
ཁ་བའི་ལས་དབང་ཅི་ལྟར་སྡུག་རུང་ང་ཚོའི་འབད་པ་བྱེད་རྩིས་ཡོད།།