སེན་ཌ་རེ་ལ་Cinderellaཞེས་པའི་ཕྱི་རྒྱལ་གྱི་སྒྲུང་། ར་ས་ཕོ་ཉས་བསྒྱུར།
དུས་ཤིག་ལུང་པ་ཞིག་ལ་བསོད་ནམས་སྒྲོལ་མ་ཟེར་བའི་བུ་མོ་ཤ་ཚ་པོ་ཞིག་བདེ་སྐྱིད་ངང་འཚོ་ནས་བསྡད་ཡོད། འོན་ཀྱང་། ཉིན་ཞིག་བུ་མོ་དེར་ཆགས་སྒོ་ཞིག་བྱུང་། བསོད་ནམས་སྒྲོལ་མའི་ཨ་མ་ལགས་ནད་མནར་གྱི་རྐྱེན་པས་འདས་གྲོངས་སུ་ཕྱིན་པས། བུ་མོ་བསོད་ནམས་སྒྲོལ་མ་ཉིན་ལྟར་ངུས་ནས་བསྡད། “བསོད་ནམས་སྒྲོལ་མ། ད་མ་ངུ་དང་།ʼʼ ཞེས་བསོད་ནམས་སྒྲོལ་མའི་པཱ་ལགས་ཀྱིས་བསླབ་བྱ་བྱས། ཡིན་ནའང་བུ་མོ་བསོད་ནམས་སྒྲོལ་མས་མུ་འཐུད་ནས་ངུ་བཞིན་བསྡད། ཉིན་ཞིག་མོའི་པཱ་ལགས་ཀྱིས། “བསོད་ནམས་སྒྲོལ་མ་ད་ངུ་མ་བསྡད། ཁྱོད་ཀྱི་རང་གི་མ་གཡར་མགྱོགས་པོ་འབྱོར་གྱི་རེད” ལབ།
ཉིན་ཤས་མཚམས། མ་གཡར་གྱིས་བུ་མོ་གཉིས་ཁྲིད་ནས་ཡོང་བ་རེད། བསོད་ནམས་སྒྲོལ་མས་མ་གཡར་དང་མ་གཡར་གྱི་བུ་མོ་གཉིས་ཡོང་བར་དགའ་པོ་བྱས། དེ་ནས་རིང་པོ་མ་སོང་བར་བསོད་ནམས་སྒྲོལ་མའི་པཱ་ལགས་ས་ཐག་རིང་པོ་ཞིག་ལ་འགྲོ་དགོས་བྱུང་། ནང་ནས་འཐོན་ཁར་པཱ་ལགས་ཀྱིས་གསུངས་པར་ལྟར། བསོད་ནམས་སྒྲོལ་མས་མ་གཡར་གྱི་ཞལ་ལ་ཉན་རྒྱུ་དང་། མ་གཡར་གྱི་བུ་མོ་གཉིས་དང་འཆམ་པོ་བྱ་རྒྱུའི་ཁས་ལེན་བྱས་པ་རེད།
ཉིན་ལྟར་རེ་བཞིན་མ་གཡར་གྱི་བུ་མོ་ཉོབ་ཏོ་དེ་གཉིས་ཀྱིས་བསོད་ནམས་སྒྲོལ་མར་བརྙེས་ཀོས་བ་དང་བསམ་གནག་བྱས་པ་མ་ཟད། “བསོད་ནམས་སྒྲོལ་མ། ངའི་ལྷམ་གོག་ག་པར་འདུག ངའི་དུག་ལོག་ཁྲུས་ཡིན་པས” ཞེས་འབོད་ཀྱང་བྱེད་ཀྱི་ཡོད། བསོད་ནམས་སྒྲོལ་མས་ཁོང་གཉིས་ལ་ཁ་ལན་མ་བསློག་པར་ནང་གི་ལས་ཀ་ཆ་ཚང་བྱས་ནས་བསྡད།
ཉིན་ཞིག་རྒྱལ་པོའི་ཕོ་བྲང་ནས་རྒྱལ་སྲས་ཀྱི་གནའ་མ་བཞེས་རྒྱུའི་འདུ་འཛོམས་འཚོགས་ཆེད། ལུང་པའི་བུ་མོ་ཆ་ཚང་ལ་མགྲོན་བརྡ་བཏང་པ་བཞིན། ཁོང་ཚོའི་ནང་ལ་ཡང་མགྲོན་བརྡ་འབྱོར། ལམ་སེང་མ་གཡར་དང་། མ་གཡར་གྱི་བུ་མོ་གཉིས་ཀྱིས་དུག་ལོག་དང་ལྷམ་གོག་ག་རེ་གོན་མིན་ལ་བགྲོས་བསྡུར་བྱས། འོན་ཀྱང་བསོད་ནམས་སྒྲོལ་མར་ཡ་བྱེད་མཁན་མ་བྱུང་། སང་ཉིན་དེར་མ་གཡར་དང་མ་གཡར་གྱི་བུ་མོ་གཉིས་ཀྱིས་གཟབ་འཆོར་ལེགས་པར་སྤྲས་རྗེས་བསོད་ནམས་སྒྲོལ་མར། “རང་ནང་ལ་ཡག་པོ་བྱས་ནས་བསྡད་ལ། ང་ཚོ་ཚུར་ལོག་ཡོང་དུས་ཁང་པ་དང་། སྣོད་ཆས་ཆ་ཚང་བཙང་མ་བཟོས་ཚར་པ་བྱས་དགོས།” ལས་ཀ་བསྐུལ་ནས་རྒྱལ་ཁང་དུ་འཐོན་ཕྱིན། བསོད་ནམས་སྒྲོལ་མ་སེམས་པ་སྐྱོ་ཐག་ཆོད་ནས་ “ཨ་ཙི། ང་ཡང་རྒྱལ་ཁང་ལ་འགྲོ་འདོད་ཞེ་པོ་འདུག” ཞེས་ཆིག་ལབ་བརྒྱབ་ནས་ངུས་བསྡད།
གློ་བུར་དུ་ཁང་པའི་ནང་འོད་ཀྱིས་ཁེངས། ག་ས་ག་ནས་རོལ་ཆའི་སྒྲ་སྙན་པོ་བསྒྲགས། བསོད་ནམས་སྒྲོལ་མས་ཡར་ལྟ་དུས། ལྷ་མོ་ཞིག་མོའི་མདུན་དུ་ཡོང་། “སྙིང་རྗེ་བའི་བསོད་ནམས་སྒྲོལ་མ། ཁྱེད་རང་དེ་ལྟར་ངུ་དགོས་ཡག་ག་རེ་བྱས་སོང་ངམ།” “ང་རྒྱལ་ཁང་ལ་འགྲོ་འདོད་ཞེ་པོ་འདུག ཡིན་ནའང་ཁང་པ་དང་སྣོད་ཆས་བཙང་མ་བཟོས་དགོས་པ་དང་། ལྷག་པར་དུ་ང་ལ་དུག་ལོག་ཡག་པ་གང་ཡག་མེད།” ལབ། ལྷ་མོ་དེས། “སེམས་ཁྲལ་མ་བྱས།ཿ” ལབ་ནས་སྨོན་ལམ་ཞིག་བརྒྱབ་པས། ཁང་པ་དང་སྣོད་ཆས་ཚང་མ་རང་ངོས་ནས་གཙང་མ་ཆགས་པ་དང་། བསོད་ནམས་སྒྲོལ་མའི་དུག་ལག་རྙིང་པ་དེ་དུག་ལོག་གསར་པ་ཡིད་དུ་འོང་བ་ཞིག་ལ་གྱུར་པ་མ་ཚད། རྐང་པའི་ལྷག་གོག་གཉིས་ཀྱང་རིན་པོ་ཆེའི་ལྷམ་གོག་ཆ་ཞིག་ཏུ་གྱུར་པ་རེད། “ཉིན་གུང་མ་ཡོལ་གོང་ནས་ནང་ལ་ལོག་དགོས་པ་མ་བརྗེད་པ་བྱོས། ཉིན་གུང་ཡོལ་རྗེས་རྫུ་འཕྲུལ་གྱི་ནུས་ཐུབ་ཉམས་ཀྱི་རེད་ད།” ཅེས་མངགས་ཆ་ཡང་བྱས།
བསོད་ནམས་སྒྲོལ་མ་རྒྱལ་ཁང་དུ་འབྱོར་དུས་མི་མང་ཚང་མས་བསོད་ནམས་སྒྲོལ་མར་བལྟས་ནས། “འོ་ཛི། བུ་མོ་མཛེས་མ་དེ་སུ་ཡིན་ནམ།” ལབ་ཤོར། རྒྱལ་སྲས་ཀྱིས་བསོད་ནམས་སྒྲོལ་མ་ལྷན་དུ་ཞབས་བྲོ་འཁྲབ་རོགས་ལབ་ནས་ཞབས་བྲོ་འཁྲབ། ཉིན་གུང་མ་ཟིན་ཙམ་ལ་བུ་མོ་བསོད་ནམས་སྒྲོལ་མས་བྲེལ་ཚུབ་ངང་རྒྱལ་ཁང་ནས་འཐོན་ཕྱིན་པས། མོའི་ལྷམ་གོག་ཡ་གཅིག་རྒྱལ་ཁང་ནང་དུ་བརླག་པ་རེད།
རྒྱལ་སྲས་མཛད་སྒོར་འཁྱུག་ཙམ་ལས་མ་བསྡད་པའི་བུ་མོ་བསོད་ནམས་སྒྲོལ་མར་ཐུགས་ཤོར་ནས། རྒྱལ་ཁང་ནང་ནས་རྙེད་པའི་རིན་པོ་ཆེའི་ལྷམ་གོག་ཡ་གཅིག་པོ་དེ་ཁྱེར་ནས་གྲོང་པའི་ནང་གི་མི་ཚང་རེ་རེ་བཞིན་བསོད་ནམས་སྒྲོལ་མ་འཚོར་བར་སོང་། ཇི་ལྟར་བྱས་ཀྱང་ལྷག་གོག་ཡ་གཅིག་པོ་དེ་བུ་མོ་སུ་གཅིག་ལའང་མ་རེན་པར་མཐར། བསོད་ནམས་སྒྲོལ་མའི་ནང་དུ་འབྱོར།
མ་གཡར་གྱི་བུ་མོ་གཉིས་ཀྱིས་ཨུ་ཚུགས་ཡོད་ཚད་ཀྱིས་རིན་པོ་ཆེའི་ལྷམ་གོག་དེ་གྱོན་ཨེ་ཐུབ་བྱས་ཀྱང་། ཁོང་གཉིས་ཀྱི་རྐང་པ་ཧ་ཅང་ཆེ་དྲག་པས་གྱོན་མ་ཐུབ་པར་ཐང་ཆད། རྒྱལ་སྲས་ཀྱང་ཡིད་ཐང་ཆད། སྐབས་དེར་བསོད་ནམས་སྒྲོལ་མས། “ངས་གཅིག་གྱོན་ཀ” ལབ་ནས་གྱོན་པས་ལྷམ་གོག་དེ་མོའི་རྐང་པར་ཏག་ཏག་བྱས། དེ་ནས་བསོད་ནམས་སྒྲོལ་མས་ལྷམ་གོག་ཡ་གཅིག་པོ་དེ་ཡང་མར་བཏོན་ནས་གྱོན་པས། རྒྱལ་སྲས་དགའ་ཐག་ཆོད་དེ། ད་བྱས་དུས་ཁྱེད་རང་ཡིན་པ་རེད། གསུངས། དེ་ནས་རིང་པོ་མ་ཐོགས་པར་རྒྱལ་སྲས་དང་བསོད་ནམས་སྒྲོལ་མ་གཉིས་འཁྲུངས་ས་བསྐྱོན་ནས་གཏན་དུ་བདེ་སྐྱིད་དང་འཆམ་མཐུན་ངང་བསྡད་པ་རེད། ར་ས་ཕོ་ཉས། ༢༠༡༦། ༠༨། ༢༠ བྲིས།