༄༅། །མཆིམས་ནམ་མཁའ་གྲགས་ནི། རབ་བྱུང་བཞི་པའི་ལྕགས་རྟ་ཕྱི་ལོ་ ༡༢༡༠ ལོར་གཙང་མྱང་སྟོད་སྨོན་འགྲོའི་ཁའུར་ཞེས་པའི་སར། ཡབ་དཔོན་དར་མགོན་དང་། ཡུམ་ལྷ་ས་སྨན་གཉིས་ཀྱི་སྲས་སུ་སྐུ་འཁྲུངས། དགུང་ལོ་བཅུ་བཞི་པར་ཁུ་བོ་མཆིམས་བློ་གྲོས་བསྟན་པའི་དྲུང་ནས་གསན་བསམ་སློབ་གཉེར་གྱི་དབུ་ཚུགས་ཏེ་གཞུང་ལུགས་ཀུན་ལ་སྦྱངས་བརྩོནམཛད། དེའི་དྲུང་ནས་དགུང་ལོ་བཅུ་དྲུག་པར་རབ་ཏུ་བྱུང་ཞིང་། དགུང་ལོ་ཉི་ཤུ་པར་དཔལ་ལྡན་གྲོ་བོ་ཆེས་མཁན་པོ་དང་། བ་ཕྱར་བསོད་ནམས་གྲགས་ཀྱིས་ལས་སློབ། མཆིམས་བློ་གྲོས་བསྟན་པས་གསང་སྟོན་མཛད་དེ་དད་པའི་དགེ་འདུན་གྲངས་ཚང་བ་ལས་བསྙེན་རྫོགས་སྡོམ་པ་གནོས་སོ།། དགུང་ལོ་ཉེར་གཅིག་པར་སྣར་ཐང་མདོ་སྔགས་ཀྱི་གསན་བསམ་མཐར་ཕྱིན་པ་མཛད། རབ་བྱུང་བཅུ་བཞི་པའི་ལྕགས་ཁྱི་ ༡༢༥༠ ནས་ཞི་བར་མ་གཤེགས་བར་བགྲང་བྱ་སུམ་ཅུ་སོ་དྲུག་ཏུ་གདན་ས་པ་མཛད་དེ། འཆད་རྩོད་རྩོམ་གསུམ་གྱི་སྒོ་ནས་བསྟན་པ་ལ་བྱ་བ་ཤིན་ཏུ་ཆེན་པོ་མཛད་པས། འགྲོ་མགོན་ཆོས་རྒྱལ་འཕགས་པ་སོགས་ཆེ་དགུ་རྣམས་ཀྱིས་མཆོད་ཅིང་བཀུར་བ་དང་། གདམས་པའི་བརྒྱུད་འཛིན་སློབ་ཚོགས་རྒྱ་ཆེ་བསྐྱངས་པ་ལས་དེ་དག་གི་ནང་ནས་བཤད་སྒྲུབ་གཉིས་ཀྱི་སྒོ་ནས་བསྟན་པ་རིན་པོ་ཆེ་འཛིན་སྐྱོང་སྤེལ་གསུམ་མཛད་པའི་སྐྱེས་བུ་མང་དུ་ཐོན་ཏེ། གྲགས་ཆེ་བ་འགའ་ཞིག་སྨོས་ན། སྐྱིལ་ནག་གྲགས་པ་སེང་གེ རྒྱང་རོ་པཎ་ཆེན། སྐྱོ་སྟོན་སྨོན་ལམ་ཚུལ་ཁྲིམས། བཅོམ་ལྡན་རིག་པའི་རལ་གྲི། དབུས་པ་བློ་གསལ། མཆིམས་འཇམ་པའི་དབྱངས་སོགས་བྱོན་པར་སྣང་ངོ་༎ མཐར་དགུང་གྲངས་དཽན་ལྔར་ཕེབས་པ་རབ་བྱུང་ལྔ་པའི་ཤིང་བྱ་ཕྱི་ལོ་ ༡༢༨༥ ལོར་སྐུ་ཞི་བར་གཤེགས་ཚུལ་བསྟན་ཏོ།།
གསུང་རྩོམ་ལ། ཆོས་མངོན་པ་མཛོད་ཀྱི་ཊཱི་ཀ་ཆེན་མོ། ཆོས་མངོན་པ་མཛོད་ཀྱི་བསྡུས་དོན། དབུ་མའི་ལྟ་ཁྲིད། ཤེར་ཕྱིན་སྒོམ་དོན་རིན་ཆེན་སྤུངས་པ། སྐྱེས་བུ་གསུམ་གྱི་ལམ་རིམ། སྨོན་སེམས་ཆོ་ག །འཇུག་པ་སེམས་བསྐྱེད་ཀྱི་ཆོ་ག །བྱང་ཆུབ་སེམས་འགྲེལ་གྱི་བསྡུས་དོན། ཆོས་འཆད་ཉན་ལ་འཇུག་པའི་ཡན་ལག །བཀའ་གདམས་ལོ་རྒྱུས་དང་འབྲེལ་བའི་བློ་སྦྱོང་། མཁན་པོ་མཆིམས་པའི་གསན་ཡིག་སོགས་གསུང་རྩོམ་མི་ཉུང་བ་ཞིག་ད་ལྟ་ཡང་མཇལ་དུ་ཡོད་པ་བཅས་སོ༎
༼དོགས་སེལ་ཉུང་ངུ་།༽འདིར་དུང་དཀར་ཚིག་མཛོད་དུ་མཁས་པ་འདིའི་ངོ་སྤྲོད་དུ། འདི་དང་ཡོངས་གྲགས་སུ་མཆིམས་མཛོད་ཅེས་གྲགས་པ་མཛོད་འགྲེལ་མངོན་པའི་རྒྱན་གྱི་མཛད་པ་པོ་མཆིམས་འཇམ་པའི་དབྱངས་གཉིས་གང་ཟག་གཅིག་ཏུ་མཛད་ཅིང་། དེ་ལ་བརྟེན་ནས་དེང་སང་དེབ་ཀྱི་གླེང་བརྗོད་དང་མཚམས་སྦྱོར་འབྲི་མཁན་དག་གིས་དེ་གཉིས་གཅིག་ཡིན་ཤག་བྱས་པ་མང་ཡང་། དོན་དངོས་ཐོག་དེ་གཉིས་གང་ཟག་སོ་སོ་བ་ཡིན་པ་ནི། མཆིམས་འཇམ་པའི་དབྱངས་ཀྱིས་མཛོད་འགྲེལ་མངོན་པའི་རྒྱན་གྱི་མཛད་བྱང་དུ། “གངས་ཅན་གྱི་རྒྱུད་ཀྱི་གནས་བརྟན་ཆེན་པོ་མཆིམས་ཐམས་ཅད་མཁྱེན་པ་ལ་སོགས་པའི་ཞབས་ཀྱི་རྡུལ་རྙོག་པ་མེད་པ་སྤྱི་བོས་ལེན་པ་མང་དུ་ཐོས་པ་ཤཱཀྱའི་དགེ་སློང་འཇམ་པའི་དབྱངས་ཀྱིས། དཔའ་ས་སྐྱའི་ཆོས་གྲྭ་ཆེན་པོར་དབུ་བརྩམས་ནས། སའི་དབང་ཕྱུག་རྒྱལ་པོ་ཆེན་པོའི་ཕོ་བྲང་ཅོང་ཏུའི་མཁར་དུ་ལེགས་པར་གྲུབ་པར་བྱས་པའོ།།” ཞེས་གསུངས་ལ། འདིའི་མཆིམས་ཐམས་ཅད་མཁྱེན་པ་ཞེས་པ་ནམ་མཁའ་གྲགས་ཡིན་པ་ནི། མཆིམས་བློབཟང་གྲགས་པས། མཆིམས་ཊཱིཀ་ཆུང་བའི་མཆོད་བརྗོད་དུ། “འཇིག་རྟེན་ཀུན་ལ་ཐམས་ཅད་མཁྱེན་པར་གྲགས༎ སངས་རྒྱས་མཆིམས་ལ་གུས་པས་འདིར་ཕྱག་འཚལ།།” ཞེས་གསུངས་ཤིང་། མཛད་བྱང་དུ། “ནམ་མཁའ་ལྟར་གྱུར་མཁྱེན་པ་རབ་ཡངས་གྲགས་པའི་མཐའ་ཅན་དེས་མཛད་གང་༎ སྟོན་པའི་གསུང་བཞིན་བདག་གིས་བླངས་ཞིང་གཞན་ལ་བཤད་བྱ།” ཞེས་སོགས་གསུངས་པ་གཉིས་གུང་བསྒྲིག་ན་གོ་བར་ནུས་ཤིང་། ཛ་ཡ་པཎྜིཏས་ཀྱང་མཆིམས་ནམ་མཁའ་གྲགས་ཀྱི་རྣམ་ཐར་ཉུང་ངུ་ཞིག་མཛད་པར་ཡང་། “ཡོངས་གྲགས་ལ་མཆིམས་ཐམས་ཅད་མཁྱེན་པ་ཞེས་གྲགས་སོ༎” ཞེས་་ཤིན་ཏུ་གསལ་བར་གསུངས་པས། མཆིམས་ནམ་མཁའ་གྲགས་ཉིད་མཆིམས་ཐམས་ཅད་མཁྱེན་པར་ངེས་ལ། མཆིམས་འཇམ་པའི་དབྱངས་ནི་མཆིམས་ཐམས་ཅད་མཁྱེན་པའི་དངོས་སློབ་ཡིན་པ་ནི་གོང་དུ་བཀོད་པ་ལྟར་ལགས་སོ༎
འདིའི་རྣམ་ཐར་རྒྱས་པ་ཤེས་འདོད་ན་སྐྱོ་སྟོན་སྨོན་ལམ་ཚུལ་ཁྲིམས་ཀྱིས་མཛད་པའི་ `བླ་མ་ཡང་དག་པ་དགེ་བའི་དགེ་བའི་བཤེས་གཉེན་ཐམས་ཅད་མཁྱེན་པ་གཉིས་པ་ལྟ་བུའི་རྣམ་པར་ཐར་པ་ཡོན་ཏན་བསྔགས་པའི་ཕྲེང་བ་ཞེས་བྱ་བ་’ ལས་ཤེས་པར་བྱའོ༎ ༎
