སྐྱ་རེངས་ན་གཞོན་རྩོམ་རིག་དྲ་བ།

༄༅། །བརྩེ་ལྡན་གཅེན་མོ་ཚེ་རིང་སྒྲོལ་མ་དེ་ཉིད། ༡༩༢༠ ལོ་བོད་ཆེན་པོའི་ནང་ཚན་མདོ་སྨད་ཨ་མདོ་སྐུ་འབུམ་གྱི་ཉེ་སྐོར་སྟག་འཚེར་ཁྱིམ་ཚང་དུ་བཙས། གྲོང་གསེབ་ཞིང་པ་ཕལ་བའི་བུ་མོ་དཀྱུས་འགྲེའི་ལུགས་བཞིན་ནང་ཁྱིམ་གྱི་ཉིན་རེའི་ལས་ཀར་གཡེངས་པས་ཤེས་ཡོན་སྦྱངས་བརྩོན་བྱས་པ་མེད། ངེད་ཏཱ་ལའི་བླ་མའི་ཡང་སྲིད་དུ་ངོས་འཛིན་བྱས་ཏེ་ནང་མི་ཡོངས་རྫོགས་བོད་དབུས་ཕྱོགས་སུ་ཡོང་བའི་སྐབས། གཅེན་མོ་དང་། ཡུལ་སྲོལ་ལྟར་ཆུང་གྲོགས་སུ་མཉམ་ཡོད་ཕུན་ཚོགས་བཀྲ་ཤིས་ལྷ་ས་ཆོས་ལྡན་ཞིང་དུ་འབྱོར། ལྷ་སར་སྡོད་རིང་བོད་ཡིག་དང་། རྒྱ་སྐད་སྔར་ནས་ཕྲན་ཤེས་ཐོག རྒྱ་ཡིག་ཁྱར་ཁྱོར་ཙམ་སྦྱངས་བརྩོན་བྱས་ཡོད་པ་དང་། ཡུལ་གཤིས་མིག་ལྟོས་གོམས་པ་ལྟ་བུའི་ཆོས་དད་མི་ཆུང་ཙམ་འཇགས། གཅེན་མོར་བུ་གཅིག་དང་། བུ་མོ་གཉིས་བྱུང་སྟེ་གཅིག་འདས་གྲོངས་སོང། དེ་སྔོན་རྒྱ་གར་དང་། རྒྱ་ནག ནང་སོག་ཁུལ་ལྟ་སྐོར་འགྲོ་མྱོང་བ་དང་། ༡༩༥༣ ལོ་འགོར་པེ་ཅིང་གི་བཀོད་བྱུས་འོག་རྒྱ་ནག་ནས། མོ་སེ་ཁོ་བརྒྱུད་ཨོ་སི་ཌི་རི་ཡ། ཝི་ནར་ཞི་བདེའི་གཞོན་ནུའི་ཚོགས་འདུ་ཞིག་ལ་ཕྱིན། ལྷ་སར་རྒྱལ་གཅེས་བུད་མེད་མཐུན་གྲོགས་ཚོགས་པའི་འཐུས་མི་དང་འགོ་འཛིན་གྲས་ཀྱི་མིང་འཁུར་བླངས། ༡༩༥༩ ལོ་བོད་དུ་རྐྱེན་ངན་བྱུང་སྐབས་ངེད་ཅག་མཉམ་དུ་རྒྱ་གར་དུ་འབྱོར་རྗེས་བཙན་བྱོལ་བོད་མི་ཆེས་མང་རྒྱ་གར་དུ་རིམ་འབྱོར་གྱིས་བུ་ཕྲུག་ལ་ཡུལ་དུས་འཕྲོད་བསྟེན་གསོ་སྐྱོང་ཇི་བཞིན་མ་ཐུབ་པས་བོད་ཕྲུག་འབོར་ཆེ་རྐྱེན་འདས་དཀའ་ངལ་ཚབས་ཆེ་བྱུང་བར་བསྟེན་འདི་ག་པན་ཇབ་རྡ་རམ་ས་ལར་འཕྲལ་སེལ་བུ་གསོ་ཁང་ཞིག་བཙུགས་པའི་འགན་འཁུར་གཅེན་མོ་དེ་ཉིད་ནས་བླངས་ཏེ། ༡༩༦༡ ནས་༡༩༦༤ ལོ་ཚེ་མཐར་མ་སླེབས་བར་བུ་ཕྲུག་༡༠༥༠་ཙམ་ལ་བྱམས་སྐྱོང་བདག་གཅེས་ལྟ་རྟོག་ལྷག་བསམ་རྣམ་དག་གིས་རང་ཉིད་ཤེས་ནུས་གང་ཡང་མེད་ཀྱང་ངལ་འཁུར་དང་ལེན་བྱས་སོང་བ་དེ་ནི་ཁོང་རང་གི་མི་ཚེའི་ནང་བྱས་རྗེས་ཆེ་ཤོས་རྗེས་སུ་ཡི་རངས་བྱ་འོས་པ་ཞིག་ཡིན། གཅེན་མོར་སྔར་དུས་ཤིག་ནས་ཁོང་སྐྲན་དང་། རྩ་དཀར་ལྟ་བུའི་ནད་གཞི་ཞིག་ཡོད་མུས་༡༩༦༤ ཟླ་༥ ནང་འཕར་ལྡང་ལ་ཀ་ཏར་སྨན་བཅོས་ཟླ་བ་ལྔ་ཙམ་བྱས་ཀྱང་ཕན་ཐོགས་མ་བྱུང་སྟབས་སྨན་པའི་ངག་དོན་ལྟར་ཨིང་ལན་དུ་སྨན་བཅོས་བྱེད་སླད་དུ་བསྐྱོད། སྨན་བཅོས་དང་། རི་འགྲོ་ཇི་ལྟར་བྱས་ཀྱང་། འདུས་བྱས་མི་རྟག་པའི་གཤིས་ལུགས་བཟློག་མ་བཏུབ་པར། ༡༩༦༤ ལོའི་ཟླ་༡༡ ཚེས་༢༡ སྔ་དྲོ་ཨིང་ལིན་སྨན་ཁང་དུ་ཚེ་འདས་བྱས་ལུགས་ཐོས་པར། མཆོག་གསུམ་ཐུགས་རྗེ་བསྐུལ་རྒྱུ་ཙམ་ལས་ཐབས་དབེན། ཟླ་གྲོགས་ཕུན་ཚོགས་བཀྲ་ཤིས་ནས་འཁུར་བླངས་ཀྱིས་འཁོས་བསྟུན་རྣམ་དཀར་དགེ་མཇུག་རྒྱ་ཆེར་བསྒྲུབས། ཨིང་ལན་ནས་འཁྱེར་འབྱོར་དེ་ཉིད་ཀྱི་རུས་ཐལ་ལ་ནང་པ་སངས་རྒྱས་པའི་གསུང་རབ་ནས་ཇི་སྐད་གསུངས་པ་ལྟར་གྱི་རུས་ཆོག་གནད་སྨིན་དང་འབྲེལ་ས་ཚར་དཔར་འདེབས་ཀྱིས་སྒྲོམ་བུ་འདི་ནང་སྒྲིག་འཇུག་ཐོག དེ་ཉིད་ཀྱིས་མ་ཤི་གསོན་པའི་རིང་ཉམ་ཐག་བུ་ཕྲུག་མང་པོར་བྱམས་སྐྱོང་བྱས་པས་མཚོན་བདག་གཞན་རྣམ་དཀར་གྱི་ཕུང་པོ་རྣམས་ཕྱོགས་གཅིག་ཏུ་བསྡོམས་པའི་མཐུ་ལ་བརྟེན་ནས་དེ་ཉིད་ངན་སོང་ངན་འགྲོའི་སྐྱེ་གནས་སུ་མི་ལྷུང་བར་དལ་བརྒྱད་འབྱོར་བཅུ་ཚང་བའི་རྟེན་བཟང་ཐོབ། མཚན་ལྡན་དགེ་བའི་བཤེས་ཀྱི་རྗེས་སུ་བཟུང་སྟེ། ས་ལམ་རིམ་བགྲོད་བླ་མེད་རྫོགས་པའི་བྱང་ཆུབ་མྱུར་དུ་ཐོབ་པའི་བསྔོ་སྨོན་མཚམས་སྦྱོར་ཅི་ནུས་བགྱིས། བརྩེ་བའི་མཛུམ་མདངས་མཛའ་བའི་འབེལ་གཏམ་གྱིས།།འགྲོགས་པའི་ཚུལ་ནི་མདང་གསུམ་རྨི་ལམ་བཞིན།།ད་ལྟ་དྲན་ཡུལ་ཙམ་ལས་མངོན་སུམ་དུ།།མཐོང་ཐོས་བྲལ་འདི་སྙིང་ལ་ནད་དུ་ཆེ།། འདི་སྣང་སྒྱུ་མའི་འཇའ་རིས་མཁའ་ལ་དྭངས།།ལས་སྣང་འཁྲུལ་བའི་འཇིགས་གཟུགས་མུན་ལྟར་འཐིབས།།གར་འགྲོའི་གདེངས་མེད་བྱ་སྤུ་རླུང་འཁྱེར་འདྲ།།མགོན་མེད་འོ་དོད་ལྷང་གིས་འབོད་ཚེ་སྐྱོ།། སྲིད་གསུམ་མི་རྟག་སྟོན་ཀའི་སྤྲིན་འདྲ་ཞེས།།དྲང་སྲོང་ཆེན་པོས་གསུངས་བཞིན་མངོན་སུམ་དུ།།མཐོང་ཡང་རྟག་འཛིན་གདོན་གྱིས་སྙིང་མྱོས་པས།།ལོང་ཡོད་སོས་དལ་སྡོད་འདི་ཨ་ཙ་མ།། སྡུག་ཅིང་ཡིད་འོང་དང་བྲལ་མི་སྡུག་འཕྲད།།ན་རྒ་འཆི་སོགས་གདུང་བྲལ་མི་བཟད་པ།།བྱེ་བ་བསམ་ཡས་ད་དུང་མྱོང་འགྱུར་ཚུལ།།བསམ་ན་རང་དོན་འཁོར་རྩ་གཅོད་ལ་འབུངས།། ཤཱཀྱའི་དགེ་སྦྱོང་བསྟན་འཛིན་རྒྱ་མཚོས་ཕྱི་ལོ་ ༡༩༦༥ ཟླ་ ༧ ཚེས་ ༢༤ དང་།…

དེང་སང་བོད་ཡིག་ཡར་རྒྱས་ཀྱི་ཆེད་དུ་དམིགས་ནས་དབྱིན་རྒྱའི་ཚིག་མང་པོ་བོད་སྐད་ནང་གསར་གཏོད་བྱེད་བཞིན་པ་དེ་ཡར་འཐོན་དང་དགའ་འོས་པའི་གནས་སྟངས་ཤིག་ཡིན་ནའང་། སྤེན་ཁྱི་སྤེན་སྐད་ཀྱི་དཔེ་ལྟར་རིགས་འགྲེལ་གྱིས་ཕུང་གི་འདུག་པ་དཔེར་ན། དེང་སང་ཡ་ཧོ་མེ་སེན་ཇར་yahoo messenger ལ་ཨེ་མ་ཕོ་ཉ་དང་ཊེ་ཝི་ཊར་twitter ལ་འཕྲུལ་སྒྲ་དང་ཧོཊ་མེལ་hotmail ལ་འཁོལ་འཕྲིན་ཟེར་བ་ལྟ་བུ་རེད། ཡ་ཧོ་དང་ཊེ་ཝི་ཊར་སོགས་ལ་ཨེ་མ་དང་འཕྲུལ་སྒྲ་ཟེར་མཁན་དེ་འདྲ་བཏགས་པ་དེས་མི་རིགས་དང་སྐད་ཡིག་ལ་ཕན་ཐོགས་བྱས་པ་མིན་པར་སོ་སོའི་མི་རིགས་ཀྱི་སྐད་ཡིག་ལྐུགས་པ་བཟོས་པའི་བགྲངས་སུ་མི་འགྲོ་བའི་ངེས་པ་མེད། འཛམ་གླིང་སྤྱིའི་འགྲོ་སྟངས་དང་མི་མཐུན་པར་ཡ་ཧོ་ལ་ཨེ་མ་ཟེར་བ་དེ་འདྲ་ལབ་བསྡད་ན་ཕྱིས་སུ་བོད་མི་ཞིག་གིས་ཡ་ཧོ་བེད་སྤྱོད་གཏོང་གིན་གཏོང་གིན་ཕྱི་རྒྱལ་བ་ཞིག་གིས་ཡ་ཧོ་ཁ་བྱང་ཡོད་པས་ཟེར་ན་ཧང་སངས་ནས་”མེད། ངས་ཨེ་མ་བེད་སྤྱོད་བྱེད་ཀྱི་ཡོད་”ལབ་རྒྱུའི་ཉེན་ཁ་ཡང་ཡོད། ལར་ན་དབྱིན་ཡིག་གི་མིང་ཚིག་ཚང་མ་བོད་སྐད་དུ་བསྒྱུར་ཐུབ་ཀྱི་འདུག་བསམས་ནས་བསྒྱུར་བསྡད་པ་ཡིན་ན། རྗེས་མ་མིའི་མིང་ཊེ་གྷར་ཝུཌ་tiger wood ལ་སྟག་གི་ཤིང་ཟེར་བ་དང་། ཧོ་ལི་ཝུཌ་hollywoodལ་རྟག་སྔོན་གྱི་ཤིང་ཟེར་བ་དང་། ཕེ་རི་མན་freemanལ་རང་བཙན་མི་ཟེར་བ་ལྟ་བུ་དང་། ཀ་ཇོལ་kajol ལ་མིག་སྨན་ཟེར་བ་འདྲ་མ་ལབ་པའི་ངེས་པ་མི་འདུག་པས། རྗེས་མ་འཛམ་གླིང་ནང་གི་མིའི་མིང་དེ་ཚོ་ཡང་ཧ་མི་གོ་བ་ཆགས་ཡོང་ཉེན་མེད་པ་རེད་མི་འདུག འོ་ན་སྔོན་མ་རྒྱ་གར་གྱི་པཎ་གྲུབ་ནཱ་ག་ཇུ་ན་ལ་མགོན་པོ་ཀླུ་གྲུབ་དང་ཨརྱ་དེ་བ་ལ་འཕགས་པ་ལྷ་ཞེས་པ་ལྟ་བུ་བསྒྱུར་འདུག་པ་དེ་ཇི་ལྟར་ཡིན་ཞེ་ན། དེ་ནི་མཁས་པ་དེ་དག་བོད་ལ་གྲགས་ཆེ་ཞིང་། ལྷག་པར་དེ་དང་དེའི་གཞུང་བོད་དུ་ཚང་བར་བསྒྱུར་དགོས་པས་དང་། ཁྱད་པར་དུ་མཁས་པ་དེ་དག་ལ་བོད་རང་གི་མིང་རེ་བཏགས་ལ་ཡིད་ལ་འཐད་ཅིང་བློ་ཐག་ཉེ་བ་དང་། དད་པ་སྐྱེ་བདེ་བའི་ཆེད་དུ་ཡིན་ནམ་སྙམ། དེ་ལྟར་མ་ཡིན་ན། ན་ལེནྜ་དང་བྲི་ཀརྨ་ལ་ཤི་ལ་ཆོས་སྡེའི་མིང་དེ་ཚོ་ཡང་བོད་སྐད་དུ་བསྒྱུར་དགོས་པ་ལས་བསྒྱུར་ཡོད་ལུགས་མི་འདུག་པས་དཔྱད་པ་རེ་མཛོད།། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

བོད་ཀྱི་ལུང་པ་ཞིག་ལ་མི་ཚང་ཆེན་པོ་ཞིག་ཡོད་པ་དེར་བུ་ཞིག་ཡོད། ཐེངས་ཤིག་ལུང་པ་དེ་གཞན་དང་དཁྲུག་པ་ཤོར་བས་མཚན་མོ་ཞིག་བུ་དེ་གྲོང་མི་མང་པོ་དང་ལྷན་དུ་མེ་མདའ་ཁུར་ནས་འཛིང་སར་སོང་བ་རེད། དཁྲུག་འཛིང་བྱེད་བཞིན་པའི་སྐབས་སྦུར་པ་((འབུ་སྒལ་པ་འཁྲེགས་པོ་ཞིག))ཞིག་འཕུར་ཡོང་ནས་བུ་དེའི་མགོ་བོར་ཤུགས་ཆེན་པོས་བརྡུང་པས། ཁོའི་བསམ་པར་དཱ་མེ་མདའ་ཕོག་སོང་དྲན་ནས་མགོ་བོ་རས་ཞིག་གིས་ཡག་པོ་བསྡམས་ནས་མི་ཚོར་མགོ་ལ་མེ་མདའ་ཕོག་སོང་ལབ་ནས་ལོག་ཡོང་བས་གྲོང་མི་ཚང་མ་ཧང་སངས་ནས་བལྟ་བར་སླེབས། མི་ཚང་མ་འཛོམས་སར་དེར་གཅིག་གིས་ཁོའི་མགོའི་རས་དེ་ག་ལེར་བཀྲོལ་བས་དེའི་ནང་སྦུར་པ་ཆེན་པོ་ཞིག་མ་གཏོགས་མགོ་བོར་རྨ་ཤུལ་གང་ཡང་མེད་པས་མི་ཚོ་གད་མོ་ཤོར་བ་དང༌། ཁོ་རང་ངོ་ཚ་པོ་བྱུང་བ་རེད། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

ཉེ་འཆར་ངས་ཀུན་གླེང་གསར་འགྭུར་ལ་ལྟོས་ནས་རྒྱ་ནག་གི་ལས་ཁུངས་ཐབ་ཤོག་གཅིག་བསྒྲུལ་ཁང་ཟེར་བའི་ལས་བྱེད་ངོ་དམར་དེས་འདེ་ལྟར་བོད་ནས་བོད་མི་རྣམས་་དགའ་ཞིང་སྐྱིད་པའི་ངང་འཚོ་བཞིན་ཡོད་པ་དང་ཕྱི་སྡོད་བོད་མི་གང་མང་ཞིག་ལ་འང་ང་ཚོར་འབྲེལ་བ་ཡོད་པ་དང་ད་དུང་མུ་མཐུད་ནས་འབྲེལ་བ་འཛུགས་གི་ཡོད་་ ཕྱི་སྡོད་བོད་མི་རྣམས་རང་རྒྱལ་ལ་སྐོར་སྐྱོད་ལ་ཕེབས་པ་་དང་རང་རྒྱལ་གྱི་ཡར་རྒྱས་ལ་རོགས་འདོགས་ཞུ་ན་དེ་བས་དགའ་བསུལ་ཡོད་ཟེར་ རྒྱལ་བ་རིན་པོ་ཆེ་ནི་མཁྲུམས་འགལ་གྱི་གཞུང་ཞུག་དང་མཁྲུམས་མཐུན་མིན་པའི་མཁྲུམས་ཞིག་གི་དབུ་འཁྲིད་ཞིག་ཡིན་པར་ཁྱེད་ཚོ་གསལ་འགོལ་པ་ལ་ཤེས་པར་བྱས་པ་ཡིནཟེར འདི་ཚོར་བསམ་བློ་ཅིག་བཏང་ན་ང་ཚོ་ཕྱིར་ཡོད་པའི་བོད་མི་རྣམས་ཀྱིས་དཕྱ་དངུལ་ལག་དེབ་ཐོག་དུ་དཕྱ་དངུལ་ཕུལ་ནས་ཉིས་སྟོང་བཅུ་གཅིག་གི་བཀའ་བློན་འཁྲིད་བའི་འོས་འཕེན་ནང་ཞུགས་ནས་རྒྱལ་བ་རིན་པོ་ཆེ་ནི་མཁྲུམས་མཐུན་གྱི་གཞུང་ཞིག་གི་དབུ་འཁྲིད་ཡང་དག་ཡིན་པ་དང་ཁོང་གི་གཞུང་དེའི་མཁྲུམས་དེ་ཡང་མཁྲུམས་་མཐུན་ཡིན་པར་སྒྭབ་ཆེད་ང་ཚོས་བཀའ་བློནའཁྲིད་བའི་འོས་གཞི་ནང་ཞུགས་ནས་འོས་འཕེན་མཁན་གང་མང་ཡོང་བར་འབེད་དགོས་པར་སྙམ་ནས་ང་་ལ་ལོ་མང་ལ་འབྲེལ་བ་ཡོད་པའི་ཨ་མདོ་ཨ་ཅེ་ཁ་བདེ་བོ་ཞིག་ཡོད་པ་ཁོང་ལ་ཁ་པར་ནང་གླེང་མོལ་ཏོག་ཙམ་བྱ་འདོད་སྐྱེས་ནས་ཁ་པར་བཏང་བ་ཡིན་ ངས་ཁ་པར་ནང་ནས་ཏོག་ཙམ་ཁ་གཏུགས་འདྲ་བོ་ཆགས་སོང་དེ་ ་མོས་ཡང་འཕྲད་མ་ཉིད་དུ་མོ་ལ་རང་བཙན་་ལག་དེབ་ཡོད་མེད་ང་ལ་བབས་མེད་པའི་དོན་དག་ཞིག་ཡིན་པ་དང་མོ་རང་ཚང་ནི་བོད་མི་རྣམ་དག་ཡིན་རུབ་དང་ང་ནི་ཤེས་འཇོན་བསྟན་ཆེད་མོ་ལ་འདི་ལྟར་བཤད་པ་ཡིན་སྟབས་སོགས་མང་པོ་ཞིག་བཤད་རྗེས་ཁ་པར་བསལ་སོང་ ངའི་མཐའ་སྐོར་ནས་ད་དུང་རང་་བཙན་ལག་དེབ་མེད་མཁན་མང་པོ་ཡོད་པ་མ་ཟེར་རང་རློམས་ཆེ་བ་ཅན་དང་རྒྱལ་བ་རིན་པོ་ཆེའི་མདུན་ནས་མགོ་སྒུར་སྒུར་གྱིས་དད་པ་ཡོད་མདོགས་དང་བོད་མི་ཡིན་རུབ་བྱེད་མཁན་འདི་ཚོ་ཅིག་བསམ་ན་སེམས་ལ་་བཤད་མི་ཤེས་བའི་ཚོར་སྣང་ཞིག་གིས་འཁེངས་ནས་ཚོར་སྣང་འདི་བྲིས་པ་ཡིན བློ་བཟང་གིས་ལེ་ཡོང་ནས། གྲོགས་པོ་ཚོས་སྐྱ་རེངས་དྲ་ཚིགས་ཐོག་ཏུ་ཡང་ཕེབས་ནས་རྩོམ་ཡིག་གནང་རོགས།

ལོ་ཧ་ཅང་མང་པོ་ཞིག་གི་སྔོན་དུ་ས་ཆ་ཞིག་ན་གོང་མ་ཞིག་ཡོད། ཁོང་གིས་རང་ཉིད་ལ་གཟབ་མཆོར་སྤྲས་པའི་ཆེད་དུ་དངུལ་ཅི་ཙམ་གྲོན་ཡང་ཕང་སེམས་མེད། ཁོང་གིས་ན་བཟའ་གསར་པ་གཞན་ལ་ངོམ་རྒྱུ་གཙིགས་སུ་འཛིན་པ་ལས། རང་ཉིད་ཀྱི་དམག་ དཔུང་ལ་ཐུགས་ཁུར་མི་བྱེད་ཅིང་། ཟློས་གར་ལ་གཟིགས་པར་མི་དགའ་བ་མ་ཟད། ཤིང་རྟར་བཞུགས་ཏེ་སྤྲོ་འཆམ་དུ་འགྲོ་རྒྱུར་ཡང་མི་དགའ། ཉིན་རེའི་ཆུ་ཚོད་རེ་རེར་ན་བཟའ་གསར་པ་རེ་བརྗེས་ཀྱིན་ཡོད་པས། མི་རྣམས་ཀྱིས་ཁོང་གང་དུ་བཞུགས་པ་དྲིས་ཚེ། ནམ་ཡིན་ཡང་ལན་ལ་གོང་མ་ད་ལྟ་ན་བཟའ་བརྗེ་བའིིསྒང་ཡིན་ཟེར་བ་དེ་ལས་མེད་དོ། ། ཉིན་ཞིག་ལ། ཁོང་བཞུགས་སའི་གྲོང་ཁྱེར་དེ་རུ་ཁྲམ་པ་གཉིས་སླེབས། བཤད་ཚུལ་ལྟར་ན། ཁོ་གཉིས་ནི་ཐགས་མཁན་ཡིན་ཟེར། ཁོ་གཉིས་ཀྱིས་མི་རྣམས་ཀྱིས་བློས་དཔོག་དཀའ་བའི་རས་ཡག་པོ་འཐག་ཐུབ་ལ། རས་དེ་རིགས་ཀྱི་ཁ་དོག་དང་རི་མོ་ཧ་ཅང་མཛེས་པ་མ་ཟད། དེས་བཟོས་པའི་ན་བཟའ་ལ་ལས་གོ་མི་ཆོད་པ་དང་། ཡང་ན་ཧ་ཅང་བླུན་པའི་མི་ཡིན་ཕྱིན་ཁྱད་མཚར་ཅན་གྱི་ན་བཟའ་དེ་མཐོང་མི་ཐུབ་པར་བཤད། གོང་མའི་ཐུགས་སུ་དེ་འདྲ་ཡིན་ན་ནི་བདག་གི་བསམ་ཐོག་ལ་ཁེལ་བའི་ན་བཟའ་ཡིན་ ལ། བདག་གིས་ན་བཟའ་དེ་འདྲ་མན་བས་ཚེ། རང་གི་རྒྱལ་ཁབ་ཀྱི་མི་གང་དག་ནི་ ལས་གོ་མི་ཆོད་པའི་རིགས་དང་། གང་དག་ནི་རིག་པ་རྣོ་བ། གང་དག་ནི་གླེན་པ་ ཡིན་པ་སོ་སོར་ཤན་འབྱེད་ཐུབ་པས། བདག་གིས་ཁོ་ཚོར་ལམ་སང་རས་དེ་འདྲ་ཞིག་འཐག་ཏུ་འཇུག་དགོས་བསམ་ནས། ཁྲལ་པ་དེ་གཉིས་ལ་དངུལ་མང་པོ་བྱིན་ཏེ་རས་འཐག་ཏུ་བཅུག ཁྲམ་པ་དེ་གཉིས་ཀྱིས་ཐགས་ཁྲི་གཉིས་བཙུགས་ནས་ཐགས་འྒ་བཞིན་པའི་བཟོ་ལྟ་བསྟན། འོན་ཀྱང་། ཐག་ཁྲིའི་སྟེང་དུ་སྐུད་པ་རྟ་རྔ་ཙམ་ཡང་མཐོང་རྒྱུ་མེད། ཁོ་གཉིས་ཀྱིས་གོང་མར་ཆེས་ཕྲ་བའི་་དར་སྐུད་དང་། ཆེས་ལེགས་པའི་གསེར་ཅུང་ཟད་གནངདགོས་པའི་རེ་བ་ཞུས། དར་སྐུད་དང་གསེར་གནང་བ་དེ་དག་རང་རང་གི་ཨམ་ཕྲག་ནང་དུ་བཅུག་ནས། སྔར་བཞིན་ཐགས་ཁྲི་སྟོང་པ་དེ་གཉིས་ཀྱི་གཡས་གཡོན་དུ་ཕུག་རོན་ཁོར་ཁོར་བྱས་ཏེ། ནམ་ཕྱེད་བར་དུ་ཐགས་འཐག་ཁུལ་བྱས། གོང་མའི་བསམ་པར་ཁོ་ཚོས་རས་དེ་ཇི་ལྟར་འཐག་ཚུལ་ལ་དངོས་སུ་བརྟག་པར་བྱའོ་སྙམ་ཡང་། མི་བླུན་པོ་དང་ལས་གོ་མི་ཆོད་པའི་རིགས་ཀྱི་མིག་གིས་གོས་དེ་དེ་མི་མཐོང་ཟེར་བའི་གཏམ་དེ་ཡིད་ལ་ཤར་བ་ན། ཁོང་གི་ཐགས་ལ་ཡང་ཐེ་ཚོམ་ཅུང་ཟད་བྱུང་། ཁོང་གིས་རང་ཉིད་སྐྲག་དགོས་དོན་ཅི་ཡང་མེད་སྙམ་ནའང་། གང་ལྟར་རང་ཉིད་དངོས་ སུ་འགྲོ་བ་ལས་མི་ཞིག་མངགས་ནས་བརྟགས་ན་ལེགས་སྙམ། གྲོང་ཁྱེར་ཡོངས་ཀྱི་མི་རྣམས་ཀྱིས་གོས་དེ་ལ་ཁྱད་པར་ཅན་གྱི་ཡོན་ཏན་ཡོད་ཟེར་བ་ཐོས་པས། སྐབས་དེ་དང་བསྟུན་ནས་རང་རང་གི་ཉེ་འཁོར་གྱི་མི་ཚོའི་རིག་པ་རྟུལ་ཚུལ་ཇི་འདྲ་ཡིན་པ་བརྟག་པར་རེ་བྱེད་བཞིན་འདུག་གོ། ། གོང་མའི་ཐུགས་ལ་ངས་རང་ཉིད་ལ་བློ་དཀར་ཞིང་གཞུང་དྲང་བའི་བློན་པོ་རྒན་པ་དེ་མངག་པར་བྱ་སྟེ། ཁོས་བཏགས་རས་ཀྱི་བཟང་ངན་དང་ཁ་དོག་ཇི་འདྲ་ཞིག་ཡིན་པ་ཤེས་ཐུབ་ཅིང་། ཁོ་ནི་བློ་དང་རིག་པ་ལྡན་པ་ཞིག་ཡིན་པས། གོ་ཆོད་མིན་གྱི་ཆ་ནས་བཤད་ན། སུས་ཀྱང་ཁོ་ལ་མི་དོ་སྙམ། དེ་ནས་བློན་པོ་སེམས་བཟང་དེ་ཁྲམ་པ་གཉིས་ཀྱི་ཁང་པའི་ནང་དུ་འཛུལ་བ་ན། དེ་གཉིས་ཀྱིས་ཐགས་ཁྲི་སྟོང་པ་ཞིག་གི་འགྲམ་ན་ལས་ཀའི་བཟོ་ལྟ་སྣ་ཚོགས་སྟོན་བཞིན་ཡོད། བློན་པོ་དེས་མིག་ཟུང་ཆེས་ཆེར་གདངས་ཏེ་བལྟས་ཀྱང་ཅི་ཡང་མ་མཐོང་བས། སེམས་སུ་ཀྱི་ཧུད།…